2017թ. նոյեմբերի 22-ին ԵՊՀ ԻՄ-ի տնտեսագիտության ֆակուլտետում տեղի ունեցավ ՀՀ ազգային արժույթի թողարկման 24-ամյակին՝ դրամի պատմությանը, բանկային աշխատողի օրվան նվիրված միջոցառում, որը նախաձեռնել և կազմակերպել էր ֆակուլտետի ուսանողական խորհուրդը՝ ի դեմս ֆակուլտետային խորհրդի նախագահ Հասմիկ Քարտաշյանի և օգնական Արփինե Վերանյանի:

Միջոցառմանը մասնակցում էին «Տնտեսագիտության տեսություն» մասնագիտության առաջին կուրսի ուսանողներ:

Մասնակիցները ներկայացրին հայկական դրամի պատմությունը, ինչպես նաև նրա կարևորությունը երկրի տնտեսության զարգացման գործում։

Միջոցառման ընթացքում ցուցադրվեց հոլովակ, որում ներկայացվում էր դրամի ստեղծման գործընթացը։

Ցուցադրվեցին նաև ներդրումային դրամներ և հուշադրամներ։

Ներկայացվեցին այն արտասահմանյան դրամահատարանները, որոնց հետ համագործակցում է Հայաստանի Հանրապետության կենտրոնական բանկը:

2017թ. նոյեմբերի 20-ին ԵՊՀ ԻՄ-ի «Տնտեսագիտության տեսություն» մասնագիտության III կուրսի ուսանողները՝ նույն ամբիոնի դասախոսներ Ա.Շիրխանյանի և Գ.Մինասյանի գլխավորությամբ ճանաչողական այց կատարեցին ՀՀ կենտրոնական բանկի Դիլիջան ուսումնահետազոտական կենտրոն:

Նախ՝ կենտրոնում ուսանողները հանդիպեցին ԿԲ-ի տնտեսական  հետազոտությունների վարչության պետ Արմեն Նուրբեկյանին, ով ուսանողներին ներկայացրեց ՀՀ ֆինանսական համակարգում ՀՀ կենտրոնական բանկի դերը, գործառույթները, կարևորեց գների կայունացման խնդիրը, որը պետության մակրոտնտեսական կայունացման և տնտեսական աճի հիմքն է:

Անդրադառնալով Կենտրոնի վիճակագրական վարչության խնդիրներին և իրականացվող գործառույթներին՝ Ա.Նուրբեկյանը ընդգծեց վիճակագրության կարևորությունը դրամավարկային քաղաքականության իրականացման հարցում:

Ուսանողներն այցելեցին ԿԲ-ի դրամագիտական  թանգարան, որտեղ համակարգող-էքսկուրսավար Շուշաննա Սարատիկյանը նրանց ներկայացրեց դրամի պատմությունը,  թանգարանում առկա դրամագիտական նմուշների ընդարձակ և հարուստ հավաքածուն՝ ընդգծելով  դրանց պատմամշակութային արժեքը,   ԿԲ-ի՝ տարբեր միջազգային մրցույթներում շահած  մրցանակները:

Ճանաչողական այցի ընթացքում մեր ուսանողներն իմացան իրենց հետաքրքրող հարցերի պատասխանները, ամրապնդեցին իրենց գիտելիքները:

2017թ. նոյեմբերի 18-19-ին Աղվերանի “Best Western” հյուրանոցում (Best Western Aghveran Hotel) կայացավ Հայաստանում անգլերեն լեզվի դասավանդողների ասոցիացիայի 14-րդ ամենամյա համագումարը (AELTA 14^th Annual Convention), որը կազմակերպվել էր Հայաստանում ԱՄՆ դեսպանատան (U.S. Embassy in Armenia) և Հայաստանում անգլերեն լեզվի դասավանդողների ասոցիացիայի (AELTA) կողմից:

Համագումարին մասնակցում էին ասոցացիայի և դեսպանատան ներկայացուցիչներ (Աննա Առաքելյան, Ռոբերտ Անդերսոն և ուրիշներ), Խաղաղության կորպուսի կամավորներ, Երևանի պետական համալսարանի, ԵՊՀ Իջևանի մասնաճյուղի, Եվրասիա միջազգային համալսարանի, Խաչատուր Աբովյանի անվան հայկական պետական մանկավարժական համալսարանի, Երևանի Վալերի Բրյուսովի անվան լեզվահասարակագիտական համալսարանի դասախոսներ:

ԵՊՀ ԻՄ-ից համագումարին ներկա էին Անգլերեն լեզվի և գրականության ամբիոնի դասախոսներ Աստղիկ Սիմոնյանը և Էմմա Թեմրազյանը, ուսանողուհի Սյուզաննա Շահնազարյանը:

Երկօրյա համագումարը նվիրված էր դասավանդման մեջ մշակութային, քննադատական մտածողության, ստեղծարարության և հաղորդակցական տարրերին ավելի բարձր տեղ հատկացնելու միջոցով դրական փոփոխություններ ձեռք բերելուն: Համագումարի կարգախոսն էր “4Cs 4 Change” (Communication, Creativity, Culture, Critical Thinking):

Բացման խոսքով հանդես եկավ Հայաստանում անգլերեն լեզվի դասավանդողների ասոցիացիայի նախագահ Աննա Առաքելյանը:

Մասնակիցները դիտեցին Հայաստանում ԱՄՆ դեսպան Ռիչարդ Միլլզի նախապես տեսագրված ելույթը և համագումարին մասնակցության խրախուսական հղումը:

Անգլերեն լեզվի տարածաշրջանային պատասխանատու Ջոն Սիլվերը իր պլենար ելույթում խոսեց արդյունավետ դասալսման և հետադարձ կապի (Effective Observation and Feedback) մասին:

Այնուհետև մասնակիցներն ընտրեցին զուգահեռաբար ընթացող 3 սեմինարներից մեկը (Listen With All Your 4 Ears by Seda Dallakyan, Teaching: A Map of Actions, by Shushan Melik-Adamyan, The Classroom as a Safe Space, by Kelsey Rowe & Lusine Tadevosyan):

Սեմինարավարները շոշափեցին այնպիսի թեմաներ, ինչպիսիք են լսողական հմտությունները լսարանում զարգացնելու արդյունքում ծագող խնդիրները, քննադատական մտածողության կիրառումը ընթերցանության և խոսքի ձևակերպման ընթացքում (Three Cs of Top-Down Listening, by Lilit Bekaryan, Promoting Intercultural Competence Among Students by Sona Hakobyan & Irina Mkhitaryan, Teaching English Through STEM by Lilit Arshakyan, Flipped Classrooms by Karine Kostanyan, Touching the Roots: Armenian Culture and Geography in the English Classroom by Venera Melkonyan & Meline Ghondyan, Critical Thinking in Reading/Speaking Skills by Tatevik Martirosyan) և այլն:

Սեմինարներից հետո մասնակիցների հիմնական քննարկման առարկան արվեստի տարբեր ճյուղերը լեզվի դասավանդման մեջ ինտեգրելն էր (Connecting Language Learning and Creativity through Art by Mariam Davtyan, Time 4 Tea by Liana Barseghyan):

“AELTA 14^th Annual Convention” hամագումարի գիտական մասը շատ արդյունավետ կերպով համադրված էր հանգստի միջոցառումների հետ, որոնց ընթացքում մասնակիցներին հնարավորություն ընձեռվեց հագեցած օրվա վերջում հանգստանալ բոուլինգի սրահում և դիսկո ակումբում:

Համագումարի 2-րդ օրը ելույթով հանդես եկավ Հայաստանում ԱՄՆ դեսպանատան մշակութային հարցերով պատասխանատու Դայանա Սիթը, որի ելույթին հաջորդեց Օրեգոնի համալսարանի ներկայացուցիչ, համագումարի հատուկ հյուր Ագնեշկա Ալբոշտայի ելույթը:

Մասնակիցներն ակտիվորեն ներգրավվեցին մի շարք թեմաներով (Critical Thinking: Orienting Students, Orienting Teachers by Agnieszka Alboszta, Promoting Communication and Cooperation in EFL Classroom by Anna Ayrapetyan, Ads in the Classroom. Developing Learner’s Writing Skills by Tsovinar Mkrtchyan & Sona Ivanyan, Promoting Speaking Fluency in the EFL Class by Lusik Hovakimyan, Freeze by Anna Arakelyan & Meri Arakelyan, Using Rubrics to Promote Learner Autonomy by Rubina Gasparyan, Student or Teacher: Who is Accountable for Productivity? by Lusine Stepanyan, Discovering the Beauty of Storytelling in English Language Teaching by Ruzan Gabrielyan & Narine Mkrtchyan) սեմինարներում:

Սեմինարներին հաջորդեց ոչ պաշտոնական վիճակահանությունը, որի ընթացքում հաջողակ մասնակիցները ստացան նվերներ՝ գրքերի տեսքով:

Վերջում համագումարի բոլոր մասնակիցներին տրվեցին հավաստագրեր:

2017-2018 ուստարվա I կիսամյակում ԵՊՀ ԻՄ-ի «Տարրական մանկավարժություն և մեթոդիկա» մասնագիտության 2-րդ կուրսի ուսանողները` Տուրիզմի կառավարման և մշակութաբանության ամբիոնի դասախոս Լևոն Լաչիկյանի ղեկավարությամբ, «Մշակութաբանություն» դասընթացի շրջանակներում բաց դաս անցկացրին Իջևանի դենդրոպարկում:

Ակնհայտ է, որ այս տարվա աշունն առանձնանում է իր առինքնող գեղեցկությամբ, գույների զգլխիչ հարստությամբ ու հաճելի ջերմությամբ, ուստի աշնանավերջի ամեն մի ակնթարթն ըմբոշխնելու ցանկությունը յուրաքանչյուրին մղում է գտնելու բնության հետ հաղորդակցվելու նորանոր միջոցներ:

Եվ ինչպես պարոն Լաչիկյանն (Լաճիկյանն) է ասում. «Մշակույթը երկրորդ բնությունն է, ուստի այն խորությամբ ըմբռնելու համար հարկ է ի մոտո ծանոթանալ առաջին բնության հետ: Դրա լավ հնարավորությունն ընձեռում է Տավուշ աշխարհը, Հայաստանն ընդհանրապես, որի ամեն մի քարը, ծերպն ու արահետը վեհացնում է մարդու հոգին, նրան համակում բանաստեղծականությամբ ու քնարական շնչով»:

Չքնաղ բնության գրկում համալսարանականներն արտասանեցին Պարույր Սևակ ու Հովհաննես Շիրազ, Համո Սահյան ու Սիլվա Կապուտիկյան:

Ուսանողների միջև ակամա ծավալվեց մրցակցություն, որի հաղթող Դիանա Պողոսյանը որպես նվեր ստացավ Լևոն Լաճիկյանի կազմած «Իմ Հայաստան» բանաստեղծական ժողովածուն:

Ուշագրավ էր նաև համալսարանական դասախոսի դատողությունն այն մասին, որ հայրենիքից դուրս խաբուսիկ են բոլոր դրախտները, և Հայաստան աշխարհը շարունակում է համայն հայության համար մնալ Երկիր դրախտավայր: Թերևս դա էր նման անմոռանալի դասի գլխավոր խորհուրդը:

2017թ․ նոյեմբերի 17-18-ին Գյումրիի տեխնոլոգիական կենտրոնում առաջին անգամ անցկացվեց «Մարզերի հզորացումը բարձր տեխնոլոգիաների խթանմամբ» խորագրով հանրապետական համաժողովը:

Ներկա էին տեխնոլոգիական կրթությամբ, ճարտարագիտության, ծրագրավորման և նորարար ոլորտներով հետաքրքրված ավելի քան 150 երիտասարդներ ՀՀ բոլոր մարզերից, մարզպետներ, նախարարությունների և մարզպետարանների ներկայացուցիչներ։

Համաժողովին մասնակցում էին նաև ԵՊՀ Իջևանի մասնաճյուղի ընդհանուր մաթեմատիկայի և բնագիտության ամբիոնի դասախոս Սլավիկ Ալավերդյանը, «Ինֆորմատիկա և կիրառական մաթեմատիկա» մասնագիտության 4-րդ կուրսի ուսանողներ Վլադիմիր Ներսիսյանը, Վահե Դավթյանը և 3-րդ կուրսի ուսանող Սարիբեկ Սարիբեկյանը։

Համաժողովի նպատակն էր ներկայացնել Շիրակի մարզի հաջողված փորձը և մոտիվացնել մարզերի երիտասարդներին, բացահայտել կրթությունից բիզնես հնարավորությունները և մարտահրավերները, նպաստել ՀՀ մարզերում տեղեկատվական տեխնոլոգիաների, աշխատանքային շուկայի զարգացմանը և ընդլայնմանը։

Ողջույնի խոսքով հանդես եկան ՀՀ վարչապետ Կարեն Կարապետյանը, Հայաստանում Գերմանիայի արտակարգ և լիազոր դեսպան Բերնհարդ Մաթիաս Քիսլերը, Շիրակի մարզպետ Արթուր Խաչատրյանը, Գյումրիի քաղաքապետ Սամվել Բալասանյանը, Համաշխարհային բանկի Հայաստանի գրասենյակի ղեկավար Սիլվի Բոսութղոն և ԵՄ համագործակցության բաժնի պետ Հոա-Բին Աճեմյանը:

ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի և «Թվային Նուռ» ընկերության հիմնադիր Թոդ Ֆաբաքերի միջև ստորագրվեց հուշագիր՝ ՀՀ ճանապարհների թվայնացման պիլոտային ծրագրի մեկնարկի մասին:

Առաջին օրը տեղի ունեցան պրեզենտացիաների ուղեկցությամբ թեմատիկ քննարկումներ:

Ձեռնարկությունների ինկուբատոր հիմնադրամի (ՁԻՀ) տնօրեն Բագրատ Ենգիբարյանը ներկայացրեց Գյումրու և Վանաձորի տեխնոլոգիական կենտրոնների ռազմավարական ուղղությունները, ՀՀ տնտեսական զարգացման և ներդրումների նախարարության զբոսաշրջության պետական կոմիտեի նախագահ Զարմինե Զեյթունցյանը խոսեց մարզերում զբոսաշրջության խթանմանն ուղղված նորարարությունների մասին, «Աջակցություն ՓՄՁ զարգացմանը Հայաստանում» ծրագրի ներկայացուցիչները, միջազգային փորձագետները խոսեցին ազատ տնտեսական գոտիների, բիզնես միջավայրին աջակցության և բիզնես մտածելակերպի խթանման մասին։

ՀՀ ԿԳ նախարար Լևոն Մկրտչյանը, Գյումրիի կրթական հաստատությունների ներկայացուցիչները և «Մասնավոր հատվածի զարգացում Հարավային Կովկասում» ծրագրի հայաստանյան թիմի ղեկավար Վիլհելմ Հյուգոն ներկայացրին կրթության ոլորտում բարեփոխումների, տարածաշրջանային առանձնահատկություններին, աշխատաշուկայի պահանջարկին կրթական ծրագրերի համապատասխանեցման և բիզնեսի ու կրթական հաստատությունների համագործակցության մասին։

Մարզերի թիմերին տրվեց առաջադրանք ներկայացնել հիմնավորում, թե ինչու պիտի ՏՏ միջազգային ընկերությունները մասնաճյուղեր բացեն հենց տվյալ մարզում, և ստեղծվեն տեխնոլոգիական կենտրոններ։

Տավուշի մարզի 15 հոգանոց թիմի տեսակետը ներկայացրեց Սլավիկ Ալավերդյանը։ Նա նշեց, որ մարզը սահմանամերձ է, ունի շուրջ 50 հազար երիտասարդ, որոնց մեծ մասն ունի բարձրագույն կամ միջին մասնագիտական կրթություն և ցանկանում է մնալ մարզում։ Տավուշի մարզում գործում են ԵՊՀ Իջևանի մասնաճյուղը, ԹՈՒՄՈ կենտրոնը, UWC Դիլիջան միջազգային քոլեջը, առաջիններից մեկը Տավուշում է սկսել գործել «Կրթություն Հայաստան» ծրագիրը, վերջերս հիմնադրվել են «Վեկտր» և «Ստորմ» ծրագրավորման ընկերությունները։ Մարզն ունի տեղեկատվական տեխնոլոգիաների զարգացման համար կարևոր ոլորտ հանդիսացող տուրիզմի մեծ պոտենցիալ, որի զարգացման համար ընդամենը 2 շաբաթ առաջ բացվել է «Տավուշի տուրիզմի զարգացման և հետազոտության կենտրոն»-ը։

Միջազգային փորձագիտական խմբի կողմից ներկայացումը գնահատվեց որպես 2-րդ լավագույն ներկայացում։

1-ինը Սյունիքի, իսկ 3-րդը Գեղարքունիքի մարզի ներկայացումներն էին։

Օրվա վերջում համաժողովի մասնակիցների համար Գյուրիի «Սև բերդ»-ում տեղի ունեցավ ընթրիք և համերգ՝ DJ Smoke-ի մասնակցությամբ։

Երկրորդ օրը համաժողովի աշխատանքները շարունակվեցին հետաքրքիր սեմինարներով և թիմային աշխատանքներով՝ միջազգային փորձագետների մատուցմամբ։ Միաժամանակ ընթանում էին 2 սեմինարներ։ Մասնակիցները իրենց ցանկությամբ էին ընտրում, թե որ սեմինարին մասնակցեն։

«Համայնքային զարգացման նորարարական կենտրոն» ՀԿ-ի նախագահ Կարեն Երզնկանյանը ներկայացրեց ՀԿ-ի և մասնավորապես Ամասիայում ստեղծված 3D մոդելավորաման և միկրոինժեներիայի լաբորատորիայի գործունեությունը։

«Աջակցություն ՓՄՁ զարգացմանը Հայաստանում» ծրագրի միջազգային փորձագետ Չուս Լոզանոն ներկայացրեց գործարարի իր մեծ փորձը, ձախողումները և հաջողությունները և այն կարևոր պայմանները, որոնց պետք է բավարարի բիզնես գաղափարը, որպեսզի հաջողվի։ Մասնակիցները տվեցին իրենց հարցերը, ներկայացրին իրենց գաղափարները և ստացան խորհուրդներ։

Թոդ Ֆաբաքերը և «Թվային Նուռ» ընկերության թիմի անդամները խոսեցին Տուրիզմում տեխնոլոգիական գործիքների, կայքերի, բջջային հավելվածների անհրաժեշտության մասին։

Staff.am կայքի հիմնադիր տնօրեն Լուիզա Ավետիսյանը ներկայացրեց ինքնակենսագրական և ներկայացուցչական նամակ պատրաստելու արվեստը, որը հատկապես օգտակար եղավ ուսանողներին և աշխատանք չունեցողներին։

Րաֆֆի Նիզիբլյանը և “Deem Communications” ընկերության թիմը անցկացրին «Փոքր քաղաքների բրենդավորում» սեմինարը։ Ներկայացվեցին արտասահմանյան և հայաստանյան տարբեր բնակավայրերի բրենդավորման օրինակներ, ապա մասնակիցները բաժանվեցին 5 թիմերի և փորձեցին բրենդավորել Վանաձոր, Գավառ, Իջևան, Արտաշատ և Կապան քաղաքները։ Թիմերը թվարկեցին այն ամենը, ինչ կարող է ծառայել որպես բրենդ (մշակույթ, բնություն, հայտնի մարդիկ, շինություններ, արատադրություն, բարբառ, ավանդություններ և այլն)։ Ապա ընտրեցին դրանցից մեկը և ներկայացրին, թե ինչ է անհրաժեշտ, որ այն դառնա քաղաքի իրական բրենդ։

Իջևանի համար որպես բրենդ ծառայող գործոններ նշվեցին Իջևանի գինու գործարանը, Դենդրոպարկը, ԵՊՀ Իջևանի մասնաճյուղը, անտառը, մոտակայքում առկա վանական համալիրները (Մակարավանք, Մորո ձորո վանք և այլն), Ենոքավանի Լաստիվերը և Yell Extreme Park-ը, վերջերս տեղադրված Աշոտ Երկաթի արձանը։ Անգամ խոսվեց աղտոտված Աղստև գետը մաքրելու և աշխարհին որպես մաքրված գետ ունեցող քաղաք ներկայանալու հեռանկարային առաջարկի մասին։

Որպես քաղաքի բրենդ ընտրվեց «Ուսանողական քաղաքի» տարբերակը, որի համար անհրաժեշտ է զարգացնել ԵՊՀ Իջևանի մասնաճյուղը, խորացնել կապերը այլ մարզերի և արտերկրի հետ, ստեղծել ուսանողական հանրակացարաններ, գիտահետազոտական կենտրոններ, ուսանողական պուրակ և ժամանցի կենտրոններ։

«Աջակցություն ՓՄՁ զարգացմանը Հայաստանում» ծրագրի տեխնիկական փորձագետ Պիեր Պրիուչը և ՁԻՀ ծրագրի ղեկավար Ջուլիա Թումասյանը անցկացրին «Դիզայներական մտածողություն» սեմինարը։

Փակման խոսքով հանդես եկավ Գյումրիի տեխնոլոգիական կենտրոնի բիզնես զարգացման մենեջեր Ամալյա Եղոյանը։ Նա հաջողություն մաղթեց բոլոր մասնակիցներին, հույս հայտնեց, որ երկօրյա համաժողովում ստացած գիտելիքները և փորձը օգտակար կլինեն յուրաքանչյուրին իր մարզում զարգացում ապահովելու համար և նշեց, որ համաժողովը կլինի ամենամյա։