ԵՊՀ-ի մինչհամալսարանական կրթության վարչության նախաձեռնությամբ ԵՊՀ-ում և ՀՀ բոլոր մարզերում կայացած ամենամյա 9-րդ «ԵՊՀ օլիմպիադա-2017»-ին մասնակցել էին Տավուշի մարզի 30 դպրոցների ավելի քան 300 աշակերտներ:

Նրանցից 60-ը հաղթահարել էին մարզային 1-ին փուլի փորձությունը և մասնակցել  2-րդ փուլին, որն անց էր կացվել ԵՊՀ-ում:

Ամփոփելով աշխատանքների արդյունքները՝ I, II և III կարգի դիպլոմների արժանացան 2-ական, գովասանագրերի՝ 9  տավուշցի դպրոցականներ:

ԵՊՀ Իջևանի մասնաճյուղի մասնագիտական կողմնորոշման և պրակտիկայի կազմակերպման բաժնի կողմից կազմակերպվեցին հանդիպումներ բոլոր այն դպրոցներում, որոնցում սովորող դպրոցականները հաջողությամբ էին մասնակցել օլիմպիադային և ցուցաբերել բարձր արդյունքներ:

Հանդիպումների ընթացքում պատվոգրեր հանձնվեցին օլիմպիադայի ընթացքում բարձր միավորներ ստացած աշակերտներին:

Լավագույն մասնակցության և բարձր առաջադիմության համար ԵՊՀ ռեկտորի կողմից հատուկ շնորհակալագրով պարգևատրվեցին Իջևանի ավագ, Կողբի թիվ 2 և Բերդավանի միջնակարգ դպրոցները:

2016-17 ուստարվա II կիսամյակում ԵՊՀ ԻՄ-ի «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանողները «Օպերացիոն համակարգեր» դասընթացի շրջանակներում ներկայացրին օպերացիոն համակարգերի տեսակների և դրանց կիրառության վերաբերյալ զեկուցումներ:

«ՕՀ-ն մոբայլ սարքերի համար» թեմայով զեկուցում  կարդացին Գոհար Գրիգորյանը, Ալիսա Թամրազյանը և Օլյա Գրիգորյանը:

Զեկուցման մեջ ներկայացվեցին ՕՀ-երի տեսակները և դրանց կիրառությունը, մոբայլ սարքերի ՕՀ-ի առավելություններն ու թերությունները:  

«Օպերացիոն համակարգ» թեմայով զեկուցում ներկայացրեց Սուսաննա  Բալասանյանը՝  խոսելով օպերացիոն համակարգի, նրա տեսակների, Android, Linux  օպերացիոն համակարգերի ստեղծման, նրանց առավելությունների և տարբերությունների մասին:

«Android օպերացիոն համակարգ» թեմայով զեկուցում կարդացին Հասմիկ Հակոբյանը և Մարիետտա Ներսիսյանը:

Զեկուցման մեջ ներկայացվեցին ՕՀ-ի բոլոր տարբերակները՝ իրենց հատկություններով, ցուցադրվեցին Android ՕՀ-ով աշխատող խելացի ժամացույցների, ռոբոտների, VR ակնոցների և այլ սարքավորումների նկարներ, տրվեց դրանց վերաբերյալ համապատասխան տեղեկատվություն: 

«Microsoft Windows»  թեմայով զեկուցում ներկայացրին   Գոհար Բեջանյանը և Սիլվա Քալանթարյանը՝  անդրադառնալով ՕՀ-ի տարբերակներին, նրանց առավելություններին ու թերություններին, զարգացման պատմությանը:

«FAT16  և FAT32» թեմայով զեկուցում կարդացին Դիանա Գասպարյանը և Դիանա Մայիլյանը՝ համապատասխան օրինակներով ներկայացնելով տրված օպերացիոն համակարգերը, նրանց առավելությունները և թերությունները:

2017թ. ապրիլի 15-ին ԵՊՀ Իջևանի մասնաճյուղում կայացավ սեղանի թենիսի մարզային առաջնություն, որին մասնակցում էին Դիլիջանի, Գանձաքարի, Պտղավանի, Այգեհովտի, Իջևանի թիվ 5 հիմնական դպրոցի և ԵՊՀ Իջևանի մասնաճյուղի՝ թվով 46 մարզիկ-մարզուհիներ:

Բացման խոսքով հանդես եկավ ԵՊՀ ԻՄ-ի արտակարգ իրավիճակների, մարմնակրթության և սպորտի ամբիոնի վարիչ Վ.Պողոսյանը՝ մասնավորապես նշելով. «Սեղանի թենիսի մարզային առաջնությամբ նպատակ ունենք մասսայականացնել սպորտը մարզում և բացահայտել լավագույններին: Այսպիսի առաջնություն մասնաճյուղում կազմակերպվում է առաջին անգամ, և մտադիր ենք այն դարձնել ամենամյա»:

Խաղերն անցկացվեցին օլիմպիական կարգով:

Աղջիկներից առաջին տեղը գրավեց  Իջևանի թիվ 5 հիմնական դպրոցի ուսուցչուհի Ռիտա Դավթյանը:

Երկրորդ և երրորդ տեղերը զբաղեցրին Պտղավանի միջնակարգ դպրոցի աշակերտուհիներ Լիանա Ղումաշյանը և Թամարա Հայրապետյանը: 

Համառ պայքարում տղաներից 2:1 հաշվով հաղթեց ԵՊՀ ԻՄ-ի հեռակա ուսուցման համակարգի «Տնտեսագիտության տեսություն» մասնագիտության 4-րդ կուրսի ուսանող Շավարշ Կիրակոսյանը:

Երկրորդ տեղը գրավեց Դավիթ Դավթյանը (Դիլիջանից):    

Երրորդ տեղը զբաղեցրեց ԵՊՀ ԻՄ-ի «ՏՏ»-III կուրսի ուսանող Նարեկ Մխիթարյանը:

Հաղթողները տնօրենության կողմից պարգևատրվեցին մեդալներով ու հուշանվերներով:

2017թ. ապրիլի 14-ին ԵՊՀ Իջևանի մասնաճյուղում կայացավ Դասավանդման առաջավոր փորձի փոխանցման և երիտասարդ դասախոսների աջակցման կենտրոնի կազմակերպած՝ «Դասախոսի մասնագիտական  հաղորդակցման հոգեբանական հիմունքները» թեմայով դաս-քննարկումը, որը վարեց Մանկավարժության և հոգեբանության  ամբիոնի ասիստենտ, հ.գ.թ. Դ. Յ. Սարգսյանը:

Դասի ընթացքում ներկայացվեց հաղորդակցման 3D մոդելը (կոմունիկացիա, ինտերակցիա, պերցեպցիա):

Դ.Սարգսյանը դասախոս-ուսանող հարաբերությունների վերաբերյալ նշեց, որ պետք է ճիշտ կառուցել հարաբերությունները ուսանողի հետ և հատկապես գիտակցել նրա սոցիալական դերը, չպետք է անձնական խնդիրները դրսևորել ուսանողի մոտ:

Դասախոսը պետք է լսարան մտնի՝ ձերբազատված բոլոր տեսակի հոգսերից, լինի անկանխակալ, պահպանի բարձր տրամադրությունը և ակտիվությունը, չպետք է սեփական կարծիքը, պատկերացումները, համոզմունքները թելադրի և ստիպի ուսանողին ընդունել դա:

Անհրաժեշտ է ուսանողներին մղել ինքնուրույնության և նախաձեռնողականության, չմիջամտել նրանց անձնական կյանքին:

2017թ. ապրիլի 14-ին ԵՊՀ ԻՄ-ի «Տնտեսագիտության տեսություն» մասնագիտության 3-րդ կուրսի ուսանողները՝ Ընդհանուր տնտեսագիտության ամբիոնի ասիստենտ, տ.գ.թ. Գ.Ավետիսյանի ղեկավարությամբ, «Հաշվապահական հաշվառում» դասընթացի գործնական դասերից մեկն անցկացրին ԵՊՀ ԻՄ-ի անձակազմի կառավարման և հաշվապահության բաժիններում:

Մասնաճյուղում արդեն ավանդույթ է դարձել տարբեր դասընթացներից որոշ  գործնական դասեր իրականացնելը համապատասխան ստորաբաժանումներում:

Նախ՝ Անձակազմի կառավարման բաժնում ուսանողներին ներկայացվեցին բաժնի գործառույթները,  գործավարությունը, աշխատանքային օրենսգրքի համապատասխան հոդվածները, որոնցով կարգավորվում են աշխատանքային հարաբերությունները, աշխատանքի ընդունման,  ազատման,  աշխատանքային պայմանագրերի կնքման գործընթացները:  

Քննարկվեցին մասնավոր դեպքեր, տրվեցին իրավաբանական մեկնաբանություններ: Ներկայացվեցին հնարավոր բոլոր իրավիճակները, որոնք կարող են առաջանալ գործատուի և  աշխատակիցների միջև:  Շեշտվեց, որ յուրաքանչյուր աշխատողի համար կազմվում են անհատական գործեր:

Գործնական դասը շատ հետաքրքիր անցավ նաև Հաշվապահության բաժնում, որտեղ ամբողջական  տեղեկատվություն տրվեց ՀԾ-6 համակարգի և նրա հնարավորությունների մասին: Ուսանողներին տրամադրվեցին հաշվապահական փաստաթղթեր, մեկնաբանվեցին պաշարների պահեստային և հաշվապահական հաշվառման առանձնահատկությունները,   աշխատավարձի հաշվման, պահումների կատարման, վճարման մեխանիզմները:

Ուսանողներն ինքնուրույն կատարեցին հաշվարկներ, գործարքների համար տվեցին հաշվապահական թղթակցություներ: Մասնագետներին ուղղելով իրենց հետաքրքրող հարցերը՝ նրանք ստացան  սպառիչ պատասխաններ:

Մասնաճյուղի ստորաբաժանումներում անցկացված գործնական դասը նպաստեց ուսանողների գիտելիքների, հմտությունների և կարողությունների ամրապնդմանը: