2017թ. ապրիլի 14-ին ԵՊՀ Իջևանի մասնաճյուղում կայացավ Դասավանդման առաջավոր փորձի փոխանցման և երիտասարդ դասախոսների աջակցման կենտրոնի կազմակերպած՝ «Դասախոսի մասնագիտական  հաղորդակցման հոգեբանական հիմունքները» թեմայով դաս-քննարկումը, որը վարեց Մանկավարժության և հոգեբանության  ամբիոնի ասիստենտ, հ.գ.թ. Դ. Յ. Սարգսյանը:

Դասի ընթացքում ներկայացվեց հաղորդակցման 3D մոդելը (կոմունիկացիա, ինտերակցիա, պերցեպցիա):

Դ.Սարգսյանը դասախոս-ուսանող հարաբերությունների վերաբերյալ նշեց, որ պետք է ճիշտ կառուցել հարաբերությունները ուսանողի հետ և հատկապես գիտակցել նրա սոցիալական դերը, չպետք է անձնական խնդիրները դրսևորել ուսանողի մոտ:

Դասախոսը պետք է լսարան մտնի՝ ձերբազատված բոլոր տեսակի հոգսերից, լինի անկանխակալ, պահպանի բարձր տրամադրությունը և ակտիվությունը, չպետք է սեփական կարծիքը, պատկերացումները, համոզմունքները թելադրի և ստիպի ուսանողին ընդունել դա:

Անհրաժեշտ է ուսանողներին մղել ինքնուրույնության և նախաձեռնողականության, չմիջամտել նրանց անձնական կյանքին:

2017թ. ապրիլի 14-ին ԵՊՀ ԻՄ-ի «Տնտեսագիտության տեսություն» մասնագիտության 3-րդ կուրսի ուսանողները՝ Ընդհանուր տնտեսագիտության ամբիոնի ասիստենտ, տ.գ.թ. Գ.Ավետիսյանի ղեկավարությամբ, «Հաշվապահական հաշվառում» դասընթացի գործնական դասերից մեկն անցկացրին ԵՊՀ ԻՄ-ի անձակազմի կառավարման և հաշվապահության բաժիններում:

Մասնաճյուղում արդեն ավանդույթ է դարձել տարբեր դասընթացներից որոշ  գործնական դասեր իրականացնելը համապատասխան ստորաբաժանումներում:

Նախ՝ Անձակազմի կառավարման բաժնում ուսանողներին ներկայացվեցին բաժնի գործառույթները,  գործավարությունը, աշխատանքային օրենսգրքի համապատասխան հոդվածները, որոնցով կարգավորվում են աշխատանքային հարաբերությունները, աշխատանքի ընդունման,  ազատման,  աշխատանքային պայմանագրերի կնքման գործընթացները:  

Քննարկվեցին մասնավոր դեպքեր, տրվեցին իրավաբանական մեկնաբանություններ: Ներկայացվեցին հնարավոր բոլոր իրավիճակները, որոնք կարող են առաջանալ գործատուի և  աշխատակիցների միջև:  Շեշտվեց, որ յուրաքանչյուր աշխատողի համար կազմվում են անհատական գործեր:

Գործնական դասը շատ հետաքրքիր անցավ նաև Հաշվապահության բաժնում, որտեղ ամբողջական  տեղեկատվություն տրվեց ՀԾ-6 համակարգի և նրա հնարավորությունների մասին: Ուսանողներին տրամադրվեցին հաշվապահական փաստաթղթեր, մեկնաբանվեցին պաշարների պահեստային և հաշվապահական հաշվառման առանձնահատկությունները,   աշխատավարձի հաշվման, պահումների կատարման, վճարման մեխանիզմները:

Ուսանողներն ինքնուրույն կատարեցին հաշվարկներ, գործարքների համար տվեցին հաշվապահական թղթակցություներ: Մասնագետներին ուղղելով իրենց հետաքրքրող հարցերը՝ նրանք ստացան  սպառիչ պատասխաններ:

Մասնաճյուղի ստորաբաժանումներում անցկացված գործնական դասը նպաստեց ուսանողների գիտելիքների, հմտությունների և կարողությունների ամրապնդմանը:

2017թ. ապրիլի 14-ին ԵՊՀ Իջևանի մասնաճյուղում կայացավ Ֆրանկոֆոնիային նվիրված միջոցառում, որը կազմակերպվել էր Ֆրանսերեն լեզվի և գրականության ամբիոնի կողմից:

Այն նպատակ ուներ ամրապնդելու ֆրանսերեն լեզուն այն կրողների շրջանակներում, ևս մեկ անգամ ընդգծելու նրա կարևորությունը` որպես մշակութային, սիրո, քաղաքակրթության լեզու:

Միջոցառմանը մասնակցող «Ֆրանսերեն լեզու և գրականություն» մասնագիտության 3-րդ կուրսի ուսանողները հանդես եկան ֆրանսիացի դասական գրողների (Paul Verlaine, Jacques, Prevert և ուրիշներ) բանաստեղծություններով, երգերով (“Kids United – On Écrit sur les Murs”, “Bonjour” և այլն), հնչեցրին Ֆրանսիայի ազգային օրհներգը (“Marseillaise”), Ֆրանկոֆոնիայի հիմնը (“Hymne de la francophonie”):

Շնորհանդեսի ուղեկցությամբ ներկայացվեց Ֆրակոֆոնիայի պատմությունը, ցուցադրվեց փոքրիկ ֆիլմ, որը պատմում էր ֆրանսախոս երկրների մշակույթի ու ժողովրդի մասին:

Եզրափակիչ ելույթով հանդես եկավ Ֆրանսերեն լեզվի և գրականության ամբիոնի ասիստենտ, մասնագիտության կրթական ծրագրի պատասխանատու Ա.Մարդանյանը՝ իր խոսքում ընդգծելով, որ Հայաստանը՝ որպես ֆրանկոֆոն երկիր, պիտի լինի ոչ միայն այդ լեզվի կրողը, այլև նպաստի նրա տարածմանը:

2017թ. ապրիլի 13-ին ԵՊՀ ԻՄ-ի առկա և հեռակա ուսուցման համակարգերի ուսանողների մասնակցությամբ տեղի ունեցավ «Ուսանողական կառույցների դերն ու նշանակությունը բուհում» թեմայով քննարկում, որը կազմակերպել էր Ուսանողական խորհուրդը:

Քննարկումը նպատակ ուներ վերհանելու ուսանողական կառույցների դերը, հիմնախնդիրները և մշակելու դրանց լուծման ուղիներ:

Նախ մասնակիցներին տրվեցին անանուն հարցման թերթիկներ` պարզելու, թե որքանով են նրանք ծանոթ կառույցների գործունեությանը:

Հարցաթերթը բովանդակում էր այսպիսի հարցեր.

• Ո՞րն է ուսանողական կառույցների դերը:
• Որքանո՞վ են ծանոթ ՈՒԽ-ի աշխատանքներին, գործունեությանն ու նպատակներին:
• Ընդգրկվա՞ծ են արդյոք ուսանողական կառույցների աշխատանքներում, եթե ոչ, ապա ինչո՞ւ:
• Ի՞նչը կարող է ուսանողին մոտիվացնել, որ մասնակցի ուսանողական նախաձեռնություններին ու ծրագրերին:
• Աշխատանքային ի՞նչ սկզբունքներ կառաջարկեն:

Այնուհետև անցկացվեց բանավոր քննարկում, որին ակտիվորեն մասնակցեցին թե՛ առկա և թե՛ հեռակա ուսուցման համակարգերի ուսանողները:  

Առանձնացվեցին մի քանի խնդիրներ, առաջարկվեցին դրանք լուծելու տարբերակներ:

Հատկանշական է, օրինակ, հեռակա ուսուցմամբ ուսանողների ներգրավվածության խնդիրը, որը լուծելու համար առաջարկվեց ստեղծել առցանց խումբ՝ հեռակա ուսուցման համակարգի ուսանողների և ՈՒԽ-ի ակտիվ ներկայացուցիչների անդամակցությամբ: Այն հնարավորություն կտա առկա ուսուցմամբ ուսանողներին հեշտորեն հաղորդակցվելու հեռակա ուսուցման համակարգի ուսանողների հետ, նրանց իրազեկելու և ընդգրկելու ուսանողական նախաձեռնություններում:

2017թ. ապրիլի 13-ին ԵՊՀ Իջևանի մասնաճյուղում կայացավ բադմինթոնի բաց առաջնություն, որին մասնակցում էին ԵՊՀ ԻՄ-ի, Իջևանի մարզադպրոցի տարբեր տարիքային խմբերի սաներ:

Բադմինթոնի առաջնությունն անցկացվեց փոքրիկների  տարիքային (7-12) խմբում շրջանաձև կարգով, 14-ից բարձր տարիքային խմբում՝ օլիմպիական կարգով:

Փոքրիկների խմբում աղջիկներից առաջին տեղը գրավեց Ռուզաննա Սարուխանյանը (թիվ 1 հիմնական դպրոց), երկրորդ տեղը գրավեց Սիրամարգ Մատինյանը (թիվ 5 հիմնական դպրոց), երրորդ տեղը զբաղեցրեց Լիլիթ Բրուտյանը (թիվ 4 հիմնական դպրոց):

Տղաներից մրցանակային տեղեր գրավեցին Արշավիր Թադևոսյանը (թիվ 1 հիմնական դպրոց), Վալերի Չապուխյանը (թիվ 3 հիմնական դպրոց) և Դավիթ Բալինյանը (թիվ 1 հիմնական դպրոց):

14-ից բարձր տարիքային խմբում աղջիկներից հաղթեց «Անգլերեն լեզու և գրականություն» մասնագիտության երկրորդ կուրսի ուսանողուհի Էմիլիա Փայտյանը:

Երկրորդ և երրորդ տեղերը զբաղեցրին թիվ 1 հիմնական դպրոցի սաներ Դիանա Ասատրյանը և Լինա Էդիլյանը:      

Տղաներից հաղթեց «Անգլերեն լեզու և գրականություն» մասնագիտության երրորդ կուրսի ուսանող Հրաչ Ներսիսյանը:

Հաղթողները տնօրենության կողմից պարգևատրվեցին հուշանվերներով:

7-18 տարեկան հաղթողները կմասնակցեն ս.թ. մայիսի 8-10-ը Երևանում կայանալիք բադմինթոնի ՀՀ պատանեկան առաջնությանը: