2017թ. հունվարի 21-ին ՀՀ ՊՆ Իջևանի զինկոմիսարիատում տեղի ունեցավ Տավուշի մարզից զինծառայության մեկնող նորակոչիկների ճանապարհման հանդիսավոր արարողությունը, որին մասնակցեցին զինկոմիսարիատի, տարածքային կառավարման մարմինների ներկայացուցիչներ, համալսարանականներ՝ ԵՊՀ ԻՄ-ի տնօրեն Ս. Ա. Առաքելյանի գլխավորությամբ, զորակոչիկների ծնողները, հարազատները, քաղաքացիներ:

Այդ օրը զորակոչված երկու տասնյակ նորակոչիկների մեծ մասը ԵՊՀ ԻՄ-ի առկա և հեռակա ուսուցման համակարգերի ուսանողներ կամ մասնաճյուղի աշխատակիցների զավակներ էին:

Հանդիսավոր միջոցառմանը ելույթ ունեցավ ԵՊՀ Իջևանի մասնաճյուղի տնօրեն Ս. Ա. Առաքելյանը՝ նորակոչիկներին մաղթելով բարի երթ ու խաղաղ ծառայություն, ընդգծեց ամեն հայ երիտասարդի համար զինվորական ծառայության կարևորությունը՝ ոչ միայն որպես հայրենիքի հանդեպ սուրբ պարտքը կատարելու, այլև նրանց մեջ բարոյակամային հատկանիշները զարգացնելու առումով: Զորակոչիկների ծնողներին պարոն Առաքելյանը մաղթեց տոկունություն ու համբերություն, հայտնեց շնորհակալություն՝ հայրենիքի քաջ պաշտպաններ դաստիարակելու համար:

Մեր բոլոր զինվորներին ևս մեկ անգամ մաղթելով խաղաղություն և հաջողություն՝ տնօրենը ամեն նորակոչիկի հանձնեց նվեր-սրբապատկեր, որ նրանց յուրաքանչյուր օրն սկսվի աղոթքով ու Աստծո օրհնությամբ: 

2017թ. հունվարի 20-ին ԵՊՀ Իջևանի մասնաճյուղում կայացավ Դասավանդման առաջավոր փորձի փոխանցման և երիտասարդ դասախոսների աջակցման կենտրոնի կազմակերպած՝ «Հասարակական կարծիքի դերը դասախոսական կոլեկտիվի բարոյահոգեբանական մթնոլորտի ձևավորման մեջ» թեմայով դաս-քննարկումը, որը վարեց Մասնագիտական կրթության որակի ապահովման բաժնի մասնագետ, Հայոց պատմության և հասարակագիտության  ամբիոնի դոցենտ, փ.գ.թ. Է. Ա. Կյուրեղյանը:

Ներկայացվեց թեմայի արդիականությունը և հրատապությունը լիարժեք դասախոսական գործունեության համար, ինչը համահունչ է կրթական բարեփոխումների բովանդակությանը, մասնավորապես՝ բուհում նոր ներդրված «Կրթական ծրագրի ղեկավար»-ի ինստիտուտի ակնկալվող գործունեությանը:

Առանձնակի կա­րև­որվեցին մատուցվող նյութի հետ դասախոսի անձնական նկարագրի ներդաշնա­կելիության,  դասախոսական կոլեկտիվում ոչ պաշտոնական հարաբերությունների ներուժը մասնագիտական կրթության արդյունավետ կազմակերպմանը ծառայեցնելու խնդիրները: Ընդգծվեց, որ նման խնդիրների լուծման հարցում վճռական նշանակություն է ձեռք բերում ամբիոնում և ֆակուլտետում ձևավորվող համարժեք ու խրախուսող հասարակական կարծիքը:

Պարոն Կյուրեղյանը հակիրճ ներկայացրեց սոցալական տարբեր մակարդակներում հասարակական կարծիքի ձևավորման և գործառման յուրահատկությունները, հասարակական կյանքի տարբեր բնագավառներում (քաղաքական, արտադրական, կրթական) նրա կիրառման պատմությունը: Պարզաբանվեցին հասարակական կարծիքի հետազոտման մասնագիտական նրբությունները (մասնավորապես՝ հետազոտման արդյունքների ներկայացուցչության, հավաստելիության խնդիրները), սոցիոլոգ-հոգեբանի, լրագրության,  բարոյականության կապը ստացված տվյալների, դրանց հրապարակման ու օգտագործման հետ:

Հատուկ ուշադրություն դարձվեց հավաստի հասարակական կարծիքի ձևավորման մեջ դասախոսների աշխարհայացքի, տարածաշրջանային, հանրապետական ու ազգային յուրահատկությունների նշանակությանը:

Այնուհետև տեղի ունեցավ շոշափված խնդիրների ակտիվ քննարկում: Երիտասարդ դասախոսներին հետաքրքրում էր, թե ինչպես է հնարավոր հավաստի հասարակական կարծիքը տարբերել կեղծ լուրերից, որքանով են արդարացված հասարակական կարծիքի ուսումնասիրությունները հանրապետությունում, ինչպես են լուծվում դրանց ֆինանսավորման խնդիրները, ինչպես է հնարավոր շահարկել հասարակական կարծիքի ուսումնասիրություններն ու դրանց արդյունքների օգտագործումը:

Անկեղծ երկխոսության ընթացքում քննարկվեցին դասախոսի գործունեության գնահատման մեջ վերջին տարիներին ուսանողների կարծիքներն ու գնահատականները օգտագործելու հետ կապված մասնագիտական ու բարոյական նրբությունները: Ծավալված երկխոսությունը հանգեցրեց դասախոս-ուսանող հարաբերությունների բարդ համակարգի գործառման հետ կապված խնդիրների քննարկմանը, ինչի շուրջ ձևավորվեց միասնական կարծիք, այն է՝ բոլոր դեպքերում ուսանողը մնում է բարձրագույն կրթության առանցքային դեմքը և նրան, անկախ հանգամանքներից, գործող օրենքների ու կանոնակարգերի շրջանակում պետք է վերաբերվել որպես լիարժեք քաղաքացու՝ հարգելով նրա բոլոր իրավունքները:    

2017թ. հունվարի 14-20-ին Հումանիտար գիտությունների ֆակուլտետում կայացան կուրսային աշխատանքների պաշտպանություններ:

Հունվարի 14-ին տեղի ունեցավ «Անգլերեն լեզու և գրականություն» մասնագիտության չորրորդ կուրսի ուսանողների կուրսային աշխատանքների պաշտպանությունը, որի հանձնաժողովը ղեկավարում էր Անգլերեն լեզվի և գրականության ամբիոնի վարիչ, բ.գ.թ., դոցենտ Ք.Հարությունյանը:   

Հունվարի 19-ին կայացավ «Հայոց լեզու և գրականություն» մասնագիտության չորրորդ կուրսի ուսանողների կուրսային աշխատանքների պաշտպանությունը (հայ գրականությունից), որի հանձնաժողովը ղեկավարում էր Հայոց լեզվի և գրականության ամբիոնի վարիչ, բ.գ.թ., դոցենտ Վ.Ավագյանը:

Հունվարի 20-ին տեղի ունեցավ «Հայոց լեզու և գրականություն» մասնագիտության երրորդ կուրսի ուսանողների կուրսային աշխատանքների պաշտպանությունը (հայոց լեզվից), որի հանձնաժողովը ղեկավարում էր Հայոց լեզվի և գրականության ամբիոնի դոցենտ, բ.գ.թ., մասնագիտության կրթական ծրագրի պատասխանատու Ա.Սարհատյանը:

Նույն օրը կայացավ «Ֆրանսերեն լեզու և գրականություն» մասնագիտության չորրորդ կուրսի ուսանողների կուրսային աշխատանքների պաշտպանությունը, որի հանձնաժողովը ղեկավարում էր Ֆրանսերեն լեզվի և գրականության ամբիոնի վարիչ, բ.գ.թ., դոցենտ Ռ.Միրզոյանը:

Բոլոր պաշտպանություններն էլ կազմակերպված էին պատշաճ մակարդակով, անցան ազատ ու անկաշկանդ մթնոլորտում, տեսական նյութի գործնական հիմնավորումներով, գրականագիտական ու լեզվաբանական վերլուծություններին զուգահեռ՝ գեղարվեստական օրինակների համապատասխան մեջբերումներով:

«Հայոց լեզու և գրականություն» մասնագիտության երրորդ կուրսի կուրսային աշխատանքների պաշտպանության հանձնաժողովի նախագահ, կրթական ծրագրի պատասխանատու Ա.Սարհատյանի խոսքով՝ բոլոր աշխատանքները համապատասխանում էին կուրսային աշխատանքներին ներկայացվող պահանջներին (թեմայի արդիականություն, բովանդակության և թեմայի համապատասխանություն, նպատակի և խնդիրների ներկայացում ու հիմնավորում, «հարցի պատմություն» և այլն), ունեին կանոնիկ կառուցվածք, կարևոր հղումներ, որոշակի ինքնուրույնություն: «Դրանց մեջ իր ինքնուրույնությամբ, ազգագրական լուրջ ու հետաքրքիր ուսումնասիրություններով աչքի ընկավ առանձնապես Լիլիթ Լյովայի Սիմոնյանի՝ «Դարբինը հայոց ծիսակարգերում» թեմայով աշխատանքը՝ արժանանալով հանձնախմբի ջերմ հավանությանն ու խրախուսաքին: Ներկայացված կուրսային աշխատանքները, – ընդգծեց Աիդա Սարհատյանը, – ևս մեկ անգամ վկայում են Հայոց լեզվի և գրականության ամբիոնի դասախոսների պատասխանատվության ու բարեխիղճ աշխատանքի մասին»: 

Հանձնաժողովների կողմից կուրսային աշխատանքների պաշտպանությունը կարևորվեց հատկապես որպես ավարտական աշխատանքների պաշտպանության նախնական փուլ, որի ընթացքում կատարված արժեքավոր դիտարկումներն ու ցուցումները կուղղորդեն ուսանողներին առավել հաջող դրսևորվելու ամփոփիչ ատեստավորման ժամանակ:

2017թ. հունվարի 19-ին ԵՊՀ Իջևանի մասնաճյուղում կայացավ պրակտիկաների ղեկավարների հետ տնօրեն Ս. Ա. Առաքելյանի հանդիպումը, որին մասնակցում էին և Ուսումնամեթոդական վարչության պետ Ա.Դավթյանը, Մասնագիտական կողմնորոշման և պրակտիկայի կազմակերպման բաժնի աշխատակիցները:

Հանդիպման ընթացքում քննարկվեցին մասնաճյուղի՝ 2016-17 ուստարվա մանկավարժական, ուսումնական և արտադրական պրակտիկաների արդյունավետ կազմակերպման վերաբերյալ հարցեր:

Ընդգծվեց, որ պրակտիկաների ղեկավարները պրակտիկանտ-ուսանողների հետ հետևողականորեն իրականացնեն նախապատրաստական աշխատանքներ, հստակեցնեն տվյալ պրակտիկայի իրականացման նպատակը, խնդիրները, ուսանողներին կողմնորոշեն պրակտիկաների անցկացման վայրերի (ուսումնական հաստատություններ, հիմնարկ-ձեռնարկություններ և այլն) նպատակահարմար ընտրության հարցում:

Պրակտիկաների ղեկավարները հավաստեցին, որ  պրակտիկաների՝ նոր կազմված ծրագրերն ընդգրկում են այդ անհրաժեշտ դրույթները (ներածություն, պրակտիկայի նպատակը, խնդիրները, անցկացման ժամկետները, վայրը, ընթացքն ու բովանդակությունը, պրակտիկայի ավարտին ակնկալվող վերջնարդյունքները), և իրենք աշխատում են հնարավորինս արդյունավետ կազմակերպել ու իրականացնել դրանք, մշակվում են և ընթացքում կներկայացվեն լրացուցիչ առաջարկներ:

2017թ. հունվարի 16-ին ԵՊՀ Իջևանի մասնաճյուղում կայացավ տնօրեն Ս. Ա. Առաքելյանի հանդիպումը ստորաբաժանումների ղեկավարների հետ:

Հանդիպման ընթացքում մասնաճյուղի  բաժինների վարիչները տնօրենին ներկայացրին նախորդ շաբաթվա ընթացքում իրենց բաժինների կողմից իրականացված գործունեության մասին հաշվետվություն և հաջորդ շաբաթվա ընթացքում պլանավորված աշխատանքների մասին տեղեկատվություն:

Բուհի տնօրենի և ենթակառուցվածքների ներկայացուցիչների կողմից բարձրացվեցին ուսումնագիտական գործընթացի արդյունավետ կազմակերպմանն ուղղված տարբեր հարցեր, որոնք վերաբերում էին մասնաճյուղում պարբերաբար բարելավվող նյութատեխնիկական, տեղեկատվական ռեսուրսներին, որակի ներքին ապահովման գործընթացներին, փաստաթղթային հենքին, գրքային ֆոնդի համալրմանը և այլն:

Ընդգծվեց, որ եվրոպական կրթական չափորոշիչներին և Որակավորումների ազգային շրջանակի պահանջներին համապատասխան՝ կրթական ծրագրերի կառուցվածքային և բովանդակային համապատասխանեցման ուղղությամբ է աշխատում մասնաճյուղում ներդրված կրթա­կան ծրագրի ղեկավարի «ինստի­տուտ»-ը:

Նշվեց, որ անհրաժեշտ է հատուկ ուշադրություն դարձնել 2014 թվականից մասնաճյուղում ներդրված՝ դասախոսի կողմից որակի ապահովման մեխանիզմներով համալրված դասընթացների փաթեթների՝ պորտֆոլիոների գործնական կիրառությանը, մշակել հատուկ մեխանիզմներ՝ լսարանում դրանք լիարժեք գործարկելու նպատակով: