2017թ. մարտի 3-ին Հայաստանի երիտասարդական հիմնադրամի կողմից ուսման վարձի փոխհատուցման հավաստագիր ստացավ 745 ուսանող, որոնցից 25-ը ԵՊՀ իջևանի մասնաճյուղի ուսանողներ էին:

Այս կիսամյակում ՀԵՀ-ի կողմից հայտարարված մրցույթին մասնաճյուղից դիմած 32 ուսանողից կրթաթոշակի արժանացավ  25 ուսանող.

1. Մելինե Արմենի Թիրաբյան,
2. Աննա Արմենի Դավթյան,
3. Լյովա Խաժակի Հովակիմյան,
4. Տաթևիկ Եսայու Ղևոնդյան,
5. Արաքսյա Հայկի Մնացականյան,
6. Արմիդա Գրիգորի Բաղիյան,
7. Նելլի Միկիչի Բեջանյան,
8. Ռուզան Բորիսի Բալասանյան,
9. Արփինե Ռուբենի Մելիքսեթյան,
10. Թամարա Արսենի Հովհաննիսյան,
11. Սաթենիկ Ղարիբի Բեգլարյան,
12. Դիանա Արմենի Ներսիսյան,
13. Մարինա Իշխանի Խառատյան,
14. Մերի Արայիկի Սարհատյան,
15. Տաթևիկ Սուրենի Իսահակյան,
16. Արթուր Արմենի Հարությունյան,
17. Արինա Նորիկի Ալավերդյան,
18. Լիլիթ Սամվելի Հովսեփյան,
19. Ռոզա Արմենի Մելքումյան,
20. Նարա Վահագնի Սարիբեկյան,
21. Գոռ Արթուրի Եսայան,
22. Անի Սևադայի Բալասանյան,
23. Էմմա Տիգրանի Ջամալյան,
24. Քրիստինե Արթուրի Քոչարյան,
25. Քրիստինե Տիգրանի Բրուտյան:

ՀԵՀ-ի կրթաթոշակ ստացած ուսանողների ընդհանուր ցուցակին կարելի է ծանոթանալ այստեղ:

Երիտասարդական հիմնադրամը պետական բուհերի բակալավրիատի առկա ուսուցման համակարգի առաջին կուրսում սովորողների ուսման վարձի փոխհատուցման ծրագիրն իրականացնում է ՀՀ կառավարության և կրթության և գիտության նախարարության աջակցությամբ։ Այս տարի մրցույթին մասնակցելու համար հայտ է ներկայացրել 1305 ուսանող։ Մրցույթի արդյունքում ուսման վարձի փոխհատուցում են ստացել սոցիալապես անապահով ընտանիքների, երրորդ խմբի հաշմանդամ, սահմանամերձ համայնքների, ինչպես նաև գերազանց առաջադիմություն և հասարակական ակտիվություն ունեցող ուսանողները։ Մասնավորապես, Հայկական պետական մանկավարժական համալսարանից մրցույթին դիմել է 299 առաջին կուրսեցի, որոնցից փոխհատուցվել է 156-ի ուսման վարձը։ Երևանի պետական համալսարանից փոխհատուցվել է 157 ուսանողի (դիմել են 237-ը), Հայաստանի պետական տնտեսագիտական համալսարանից 69 ուսանողի (դիմել են 189-ը) ուսման վարձը և այլն։ 

Մրցույթի շրջանակներում ներգրավված են նաև մարզերում գործող բուհերի ուսանողները։ Մասնավորապես, ուսման վարձի փոխհատուցման ծրագրից օգտվում է Վանաձորի պետական համալսարանի 44 (դիմել են 57-ը), Երևանի պետական համալսարանի Իջևանի մասնաճյուղի 25 ուսանող (դիմել են 32-ը) և այլն։

Ուսման վարձի փոխհատուցում է ստանում նաև զինծառայության ընթացքում մարտական հերթապահություն իրականացրած 11, ինչպես նաև՝ 2016-ի ապրիլյան քառօրյա պատերազմին մասնակցած 5 ուսանող։ 

Ուսման վարձի փոխհատուցման հավաստագրերն ուսանողներին է հանձնել ՀՀ վարչապետ Կարեն Կարապետյանը։ Շնորհավորելով ուսանողներին` կառավարության ղեկավարը վստահություն է հայտնել, որ որոշ ժամանակ անց ունենալու ենք մի երկիր, որով բոլորս հպարտանալու ենք։ Վարչապետը նշել է, որ մեր ունեցած մարտահրավերները ստիպում են մեզ լինել խելացի և կիրթ։ Դիմելով երիտասարդներին` պարոն Կարապետյանը նրանց կոչ է արել, որ շարունակեն իրենց կրթության ուղին, գիտելիքի, ուսման նկատմամբ վերաբերմունքը տարածեն իրենց շրջապատում, լինեն հայրենասեր, ակտիվ քաղաքացիներ, հանդուրժող միմյանց, բայց անհանդուրժող անարդարության նկատմամբ։ 

ՀԵՀ-ի հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանն ընդգծել է, որ ուսման վարձի փոխհատուցումը հիմնադրամի կարևորագույն ծրագրերից է, այն սպասված է ինչպես հիմնադրամի, այնպես էլ մեծաթիվ ուսանողների համար։ «Մենք կարողանում ենք 750 ուսանողի միանվագ աջակցություն ցուցաբերել, աջակցություն նրանց առաջադիմության համար, և նրանց մոտ վստահություն ձևավորել, որ լավ սովորելով կարող են մեղմել սոցիալական խնդիր։ Այս ծրագրի միջոցով շատ ուսանողներ կարողանում են հաղթահարել առաջին կուրսը, այնուհետև գերազանց առաջադիմության շնորհիվ ռոտացիոն համակարգով անցնել անվճար համակարգ»,- նշել է Կարեն Ավագյանը՝ ավելացնելով, որ սա Հայաստանում կրթաթոշակների փոխհատուցման ամենամեծ ծրագիրն է։ 

2011 թվականից ՀԵՀ-ը ՀՀ կառավարության աջակցությամբ իրականացնում է ուսման վարձերի փոխհատուցման ծրագրեր, և այդ թվականից ի վեր տարբեր ծրագրերի շրջանակներում մասնակիորեն կամ ամբողջությամբ փոխհատուցել է շուրջ 6000 ուսանողի ուսման վարձ։ 

Աղբյուրը` heh.am:

 2017թ. մարտի 1-ին ԵՊՀ Իջևանի մասնաճյուղում կայացավ 2013թ. հոկտեմբերին Տավուշի սահմանում մարտական առաջադրանք կատարելիս զոհված և հետմահու «Մարտական խաչ» 2-րդ աստիճանի շքանշանի արժանացած Գեորգի Գագիկի Մնացականյանի հիշատակին նվիրված միջոցառում, որը կազմակերպվել էր մասնաճյուղի «Տավուշ» ռազմահայրենասիրական ակումբի ու Հայոց լեզվի և գրականության ամբիոնի ասիստենտ, բ.գ.թ. Ա.Հասանյանի կողմից:

Հրավիրված էին Գեորգի Մնացականյանի ընտանիքի անդամները, հարազատները, զինվորականներ, մասնակցում էին տնօրենի գլխավորությամբ՝ ԵՊՀ ԻՄ-ի վարչական և պրոֆեսորադասախոսական անձնակազմի ներկայացուցիչներ, ուսանողներ, քաղաքացիներ:

Հատկանշական է, որ միջոցառմանը մասնակցում էին և ապրիլյան քառօրյա պատերազմին` Թալիշի ինքնապաշտպանական մարտերին մասնակցած ու Արցախի Հանրապետության Մարտակերտի շրջանում ծառայող մեր շնորհալի ուսանողներից:

Միջոցառումը յուրահատուկ հարգանքի տուրք էր մեր քաջարի զինվոր-հերոսներին, նահատակված մեծերին, հայրենիքի սուրբ նվիրյալներին, ի դեմս Գեորգի Մնացականյանի` նրանց ևս մեկ անգամ հիշելու և պատվելու, խոնարհվելու նրանց մեծ կամքի ու սրբազան հավատի առաջ։

Այն բացվեց ՀՀ պետական օրհներգով, որից հետո միջոցառման մասնակիցները հանդես եկան հերոսական ոգեշունչ ձոն-բանաստեղծություններով, ազգային-հայրենասիրական երգ ու պարով` կիթառի ու քանոնի նվագակցությամբ:

Միջոցառման ընթացքում հնչեցին «Քայլ առ առաջ», «Պարոնայք սպաներ», «Բարձունքը մերն է», «Արշալույս», «Ուշանում եք տղերք», «Գնացին, չեկան», «Հայ զինվոր»,  «Սահմանը մոտիկ է», «Սահմանին», «Վեր կաց եղբայր իմ», «Ախպերս ու ես» ստեղծագործությունները:

Մեկ րոպե լռությամբ հարգվեց մեր անմահ հերոսների հիշատակը, համոզմունք արտահայտվեց, որ ոչ ոք չի մոռացվել, ոչինչ չի մոռացվել: Խնկարկվեց բոլոր նրանց հիշատակը, ովքեր իրենց արյան գնով անարգ թշնամուց պաշտպանեցին հայրենի հողը և խաղաղության համար մղված պայքարում դարձան սրբացած նահատակներ:

Այդ առյուծասիրտ տղաներից  մասնավորապես հիշատակվեց Գեորգի Մնացականյանի անունը, ով ոչ մի վայրկյան չերկբայեց հայրենիքի սահմանը պաշտպանելիս, զոհաբերեց իր կյանքը, որ մենք այսօր աշխատենք ու արարենք հային վայել տեսակով:

Ներկայացվեցին նրա կենսագրության հիմնական դրվագները.

Գ.Մնացականյանը ծնվել է 1988թ. Գավառ քաղաքի Արծվաքար թաղամասում:

2005-2009 ընդունվել և ավարտել է Վազգեն Սարգսյանի ռազմական ակադեմիան ` ցուցադրելով գերազանց առաջադիմություն: Ուսումն ավարտելուց հետո նշանակվել է ԶՈՒ 3-րդ բանակային կորպուսի 51-151 զորամասի ինժեներասակրավորական դասակի հրամանատար` լեյտենանտի կոչումով: 4 տարիների ընթացքում հասել է վաշտի հրամանատարի պաշտոնի և ստացել կապիտանի կոչում:

Ծառայության ընթացքում արժանացել է մի շարք մեդալների և կառավարական պարգևների: Հոկտեմբերի 16-ին ՀՀ հյուսիսարևելյան սահմանագոտում տեղակայված զորամասերի հսկողության տարածքում մարտական խնդիր իրականացնելիս Գեորգին  մահացու ականապայթյունային վիրավորում է ստացել` իր մարմնով ծածկելով ականը` ծառայակիցների կյանքը փրկելու առաջնահերթ նպատակով, որի համար հետմահու պարգևատրվել է «Մարտական խաչ» շքանաշանով:

Գավառ քաղաքի Արծվաքար թաղամասի 7 միջնակարգ դպրոցը Գեղարքունիքի մարզպետի որոշմամբ անվանակոչվել է Հայոց բանակի սպա, 2013թ. հոկտեմբերին մարտական առաջադրանք կատարելիս զոհված և հետմահու պարգևատրված Գ. Գ. Մնացականյանի անունով…

Միջոցառումը եզրափակվեց ԵՊՀ ԻՄ-ի տնօրեն Ս. Ա. Առաքելյանի ելույթով, որի ընթացքում տնօրենը խորին շնորհակալություն հայտնեց Գեորգիի ծնողներին`  հայրենիքի համար այդպիսի հերոս զավակ ծնելու և դաստիարակելու համար, ընդգծեց այն գաղափարը, որ Գեորգի Մնացականյանի սխրանքը հայրենասիրության վառ օրինակ է ապրողներիս համար, նրա հերոսական ոգին կապրի բոլորիս սրտերում` պատրաստ սաստելու անարգ թշնամու ամեն  մի ոտնձգություն: 

Իրենց հերոսացած որդու հիշատակը հարգելու, նրան նվիրված ռազմահայրենասիրական միջոցառում կազմակերպելու համար իրենց շնորհակալական խոսքն ասացին Գեորգիի հայրն ու մայրը, իսկ քույրը հանդես եկավ սիրելի եղբորը նվիրված սրտաբուխ ու ոգեշունչ ձոն-բանաստեղծությամբ` խորապես հուզելով ներկաների սրտերը:

2017թ. փետրվարի 27-ին ԵՊՀ ԻՄ-ի տնօրեն Ս. Ա. Առաքելյանը հանդիպեց ուսանողական կառույցների ներկայացուցիչների հետ:

Հանդիպման ընթացքում քննարկվեցին Ուսանողնական խորհրդի և Ուսանողական գիտական ընկերության առջև դրված հիմնական խնդիրները, ներկայացվեցին դրանց հաղթահարման ուղիները:

Շեշտը դրվեց ուսանողական կառույցներում ուսանողների ներգրավվածության հարցի վրա: Խնդրի լուծմանն ուղղված առաջարկներ ներկայացվեցին նաև ուսանողների կողմից:

Ուսանողական կառույցների ներկայացուցիչները նշեցին, որ այս կիսամյակի ընթացքում նախատեսված են ուսանողների հետ տարատեսակ հանդիպումներ, քննարկումներ, մոտիվացիոն տարաբնույթ միջոցառումներ՝ ուսանողական կյանքն առավել հագեցած դարձնելու նպատակով:

Հանդիպման վերջում ՈՒԽ-ի նախագահ Ի.Շաղբաթյանը շնորհակալություն հայտնեց ԵՊՀ ԻՄ-ի տնօրենին՝ ուսանողական նախաձեռնություններին աջակցելու, խնդիրներին տեղում լուծում տալու համար, իր երախտագիտությունն արտահայտեց ՈՒԽ-ի աշխատանքային թիմին՝ համախմբված ու ջանադիր գործունեության համար:

2017թ․ փետրվարի 27-ին “Game Lab”-ի շրջանակներում մասնաճյուղում կայացավ ուսանողների հետ երկրորդ հանդիպումը։

Հանդիպման ընթացքում ուսանողներին ներկայացվեցին խաղային ոլորտը և խաղերի ծրագրավորման հիմնական հասկացությունները, ինչպես օգտագործել խաղային գործիքները, օրինակ՝ Unity և Eye Engine։

Վ.Մելիքսեթյանը դասընթացի մասնակիցներին ներկայացրեց նաև այն հարթակները, որտեղից սկսնակ ծրագրավորողները կարող են օգտվել և բավականին հեշտացնել խաղի ստեղծման գործընթացը։

Երկրորդ հանդիպման ժամանակ ուսանողներին տրվեց հստակ առաջադրանք, յուրաքանչյուրին մեկական խաղ ստեղծելու հնարավորություն։

Տեղում ձևավորվեցին թիմեր, որոնք, միասին աշխատելով, կստեղծեն խաղ։

2017թ. փետրվարի 22-24-ը ԵՊՀ ԻՄ-ի «Տնտեսագիտության տեսություն» մասնագիտության կրթական ծրագրի պատասխանատու, տ.գ.թ., ասիստենտ Գ.Ավետիսյանը մասնակցեց Մասնագիտական կրթության որակի ապահովման ազգային կենտրոնի կողմից հայտարարված կրթության որակի շաբաթին:

Արդեն 3-րդ անգամ կազմակերպվող որակի շաբաթվա նպատակն է թե՛ կրթության ոլորտի ներկայացուցիչների, թե՛ ղեկավար օղակների և թե՛ հասարակության ուշադրությունը հրավիրել կրթության որակի ապահովման վրա՝ քննարկելու առկա խնդիրները, կիսվելու լավագույն փորձով և ձևավորելու ապագայի ընդհանուր տեսլական:

Որակի շաբաթվա ընթացքում տեղի ունեցան աշխատաժողովներ՝ նվիրված ուսանողների, երիտասարդ դասախոսների, մասնագիտության կրթական ծրագրերի և որակավորումների ազգային շրջանակի համապատասխանության խնդիրներին, շաբաթն ամփոփվեց  երկօրյա համաժողովով, որի թեման էր գնահատման համակարգերի բարելավումը:

Որակի շաբաթվա երրորդ օրը (փետրվարի 22-ը) նվիրված էր մասնագիտության կրթական ծրագրերի և որակավորումների ազգային շրջանակի (ՈԱՇ) համապատասխանությանը:  

ՈԱԱԿ-ը ՏԵՄՊՈՒՍ-ի ALIGN ծրագրի հետ համագործակցությամբ փետրվարի 22-ին կազմակերպեց աշխատաժողով, որտեղ ներկայացվեցին ALIGN ծրագրի ձեռքբերումներն ու առկա մարտահրավերները:

Աշխատաժողովի ընթացքում ուսանողների, դասախոսների և կրթության կառավարիչների տեսանկյունից քննարկվեց կրթական ծրագրերի բարեփոխման անհրաժեշտության հարցը, շեշտը դրվեց գնահատման բարելավման վրա՝ որպես դասավանդման արդյունավետության գործիքի:

Մասնակիցներին ներկայացվեցին նաև Հայաստանում, Ռուսաստանում և Ուկրաինայում ծրագրի շահակից բուհերում իրականացված մասնագիտության կրթական ծրագրերի արտաքին գնահատման արդյունքները, ՈԱՇ-ի և վերջնարդյունքների համապատասխանեցման լավագույն փորձը, գործընթացից քաղված դասերը:

Աշխատաժողովի վերջում տեղացի ու միջազգային փորձագետները, ուսանողները և ՈԱԱԿ ներկայացուցիչները առաջարկ ներկայացրին կառավարությանը ազգային մակարդակում մասնագիտության կրթական ծրագրերում անհրաժեշտ փոփոխությունների մասին:

Փետրվարի 23-24-ը Որակի շաբաթն ամփոփվեց «Որակը լսարանում՝ գնահատման համակարգերի բարելավում» թեմայով երկօրյա համաժողովով: 

Գնահատումը պետք է լինի սովորեցնող. այսպիսն էր «Որակը լսարանում՝ գնահատման համակարգի բարելավում» թեմայով  համաժողովի առաջնային ուղերձը:

Համաժողովը մեկնարկեց անակնկալով. ողջունելով համաժողովի մասնակիցներին՝ Շվեյցարիայի հավատարմագրման և որակի ապահովման գործակալության նախագահ, Բարձրագույն կրթության որակի ապահովման եվրոպական ասոցիացիայի (ENQA)  խորհրդի անդամ Քրիստոֆ Գրոլիմունդը հայտարարեց, որ Մասնագիտական կրթության որակի ապահովման ազգային կենտրոնը դարձել է ENQA լիիրավ անդամ: Հայաստանը տարածաշրջանում առաջին երկիրն է, որ անդամակցում է ENQA-ին:

ԿԳ նախարար Լևոն Մկրտչյանը, շնորհավորելով ՈԱԱԿ-ին և կրթական համակարգի ներկայացուցիչներին ENQA անդամակցության առթիվ, նշեց. «Փոքր երկրները կարող են իրենց կրթությունը զարգացնել միմիայն մեծ քաղաքակրթական դաշտում: Եվ անդամակցությունը եվրոպական կառույցին  նաև վստահության քվե է այն գործընթացներին, որ այսօր տեղի են ունենում Հայաստանի բարձրագույն կրթության համակարգում»:

Նախարարը կարևորեց նաև առաջիկայում սպասվող ծրագրային հավատարմագրումը՝ նշելով. «Չի կարող լինել ինստիտուցիոնալ հավատարմագրում առանց ծրագրային հավատարմագրման: Այն շատ կարևոր է և ուղղակիորեն առնչվում է որակին»:

ՈԱԱԿ-ի տնօրեն Ռուբեն Թոփչյանը, խոսելով ENQA-ին անդամակցության մասին, նշեց, թե անդամակցությունը նաև նշանակում է, որ  Հայաստանում  կարելի է դնել այդպիսի հավակնոտ նպատակներ և հասնել դրան:

Անդրադառնալով կոնֆերանսի թեմայի ընտրությանը՝ պարոն Թոփչյանը նշեց, որ ուսումնասիրությունները ցույց են տվել, որ ուսանողը վճարում է, որպեսզի իրեն գնահատեն, և դրա արդյունքում ինքը սովորի: «Կոնֆերանսի նպատակներից է ամրապնդել սովորեցնող գնահատման մշակույթը մեր կրթական համակարգում»,- նշեց նա:

Պարոն Թոփչյանի խոսքով՝ շահակիցների քննարկումները կօգնեն բուհերին նախապատրաստվել նաև առաջիկա կլաստերային  աուդիտին. «Դա ամենածանր չափանիշներից է, ըստ որի՝ բուհը պետք է հավաստի, որ իր գնահատումը սովորեցնող է»:

ՈԱԱԿ հոգաբարձուների խորհրդի նախագահ Վարուժան Ավետիքյանը, ողջունելով մասնակիցներին, կարևորեց համաժողովը սպասվող կրթական բարեփոխումների համատեքստում: Նրա խոսքով՝ հայաստանյան կրթական համակարգի հետագա զարգացման տեսանկյունից կարևոր  է մի շարք բարեփոխումների իրականացումը, օրինակ՝  բուհերի դասախոսական կազմում պետք է ընդգրկված լինեն թե՛ հետազոտող մասնագետներ, թե՛ գործատուներ, պետք է ներդրվի  դասավանդման և ուսումնառության որակի հարցումային համակարգ, ինչպես  նաև պետք է գրագողության հանդեպ անհանդուրժող քաղաքականություն որդեգրել: Պարոն Ավետիքյանը  կարևորեց նաև  ֆակուլտետների ինքնավարության բարձրացումը, արտերկրում սովորած տաղանդավոր մասնագետների  ներգրավումը հայաստանյան բուհական համակարգում:

ՈԱԱԿ հավատարմագրման հանձնաժողովի անդամ Սամվել Շուքուրյանը ևս կարևորեց օտարերկրյա մասնագետների ներգրավումը: Հիշեցնելով առաջիկայում սպասվող կլաստերային աուդիտի մասին՝ Շուքուրյանը նշեց, որ հայաստանյան բուհական համակարգում որակյալ պրոֆեսորադասախոսական կազմի պակաս կա:  «Լուծման ճանապարհը հեռահար միջոցներն օգտագործելով արտերկրի մասնագետների հետ կապվելն է: Սխալ է սահմանափակվել միայն տեղում եղած մասնագետներով»,- ասաց նա:

Համաժողովի մասնակիցներին ողջույնի խոսք հղեցին նաև ՀԱՀ նախագահ Արմեն Տեր-Կյուրեղյանը, Հայաստանում Հնդկաստանի դեսպան Յոգեշվար Սանգվան:

Օրվա ընթացքում  մասնակիցները քննարկեցին, թե ինչպիսի գնահատում է ակնկալում բուհից ուսանողը,  գործատուն և դասախոսը:  Գործատուները կարևորեցին, որ ուսանողներն իրենց մոտ գան որոշակի գործնական հմտություններով, իսկ որպես դրա ապահովման միջոց առաջարկեցին, որ իրենք էլ ներգրավվեն ուսանողի գնահատման գործընթացում:

Քննարկման մասնակից միջազգային փորձագետները  նշեցին, որ իրենց մոտ էլ խզում կա բուհի և գործատուի միջև: Այդ երկու օղակները կապելու, գործատուին կրթական գործընթացում ներգրավելու  համար եվրոպական երկրներում հատուկ կառույցներ են ստեղծված:  Գործատուներին կրթական գործընթացներում ներգրավելու տարբերակ է նաև նրանց  պարբերաբար բուհ հրավիրելը՝ վարպետության դասեր անցկացնելու համար:

Վերջին օրը՝ փետրվարի 24-ին, ամփոփելով կրթության որակի ապահովման շաբաթվա շրջանակներում տեղի ունեցած համաժողովները՝ Մասնագիտական կրթության որակի ապահովման ազգային կենտրոնի (ՈԱԱԿ) տնօրեն Ռուբեն Թոփչյանը նշեց. «Որակի շաբաթը ծառայեց նպատակներին՝ կրթության ոլորտի շահակիցները հնարավորություն ունեցան նոր ինֆորմացիա ստանալ, փորձով ու տեսակետներով  փոխանակվել»:

Նա համոզմունք արտահայտեց, որ որակի շաբաթվա մասնակիցները տեղի ունեցած բաց ու բովանդակալից քննարկումներից հետո բուհ են գնալու նոր գաղափարներով լցված և անմիջապես ձեռնամուխ են լինելու դրանց իրագործմանը:

Կրթության որակի ապահովման շաբաթն ամփոփող «Որակը լսարանում՝ գնահատման համակարգի բարելավում» թեմայով համաժողովի երկրորդ օրը ներկայացվեց բուհերի հավատարմագրման փորձը Ռուսաստանում, Շվեյցարիայում և Մեծ Բրիտանիայում: Օտարերկրյա հավատարմագրման գործակալությունների ներկայացուցիչները մանրակրկիտ անդրադարձ կատարեցին օրենսդրական կարգավորմանը իրենց երկրում և բուհի՝ չհավատարմագրվելու օրենսդրական հետևանքներին:

Պարոն Թոփչյանը, կարևորելով  միջազգային փորձի ներկայացումը, նշեց, թե  քննարկումների արդյունքում պարզ դարձավ, որ բոլոր երկրներում էլ  կրթական ոլորտում կան խնդիրներ,  որոշ խնդիրներ արդեն  լուծված են եվրոպական երկրներում, կան նաև խնդիրներ, որոնք դեռ ոչ մի տեղում լուծված չեն:  «Աշխարհը շեշտակի փոխվել է, իսկ համալսարանական անձնակազմը դեռ հստակ չի ընդունել, որ օրինակ՝ ուսանողն այլ կերպ է ուզում սովորել ու գնահատվել»,- շեշտեց նա:Միջազգային փորձի ներկայացմանը հաջորդեց Հայաստանում առաջիկայում սպասվող կլաստերային աուդիտի քննարկումը: ՈԱԱԿ-ը ներկայացրեց  կլաստերային աուդիտի նպատակը, չափանիշները, ոլորտները և գործընթացի առանձնահատկությունները: Ռուբեն Թոփչյանը պարզաբանեց, թե ինչ է կլաստերային աուդիտը և որքանով այն դրական ազդեցություն կունենա որակի ապահովման վրա. «Մասնագիտական կրթական ծրագրերի քանակը մեծ է, և յուրաքանչյուր մասնագիտության կրթական ծրագրի առանձին հավատարմագրումը բուհերի համար մեծ ֆինանսական բեռ կդառնա: Ուստի առաջարկվում է նախ բուհերում կլաստերային սկզբունքով ծրագրային աուդիտ իրականացնել, որի արդյունքում բուհերը կպատրաստվեն ծրագրային հավատարմագրմանը, ինչպես նաև նույն կրթական ծրագրերն ունեցող բուհերի միջև համեմատության հնարավորություն կլինի,  կունենանք համեմատական մի վերլուծություն և ավելի թափանցիկ կդարձնենք դաշտը։ Ըստ առաջարկվող ծրագրի` կլաստերային աուդիտը պարտադիր պետք է լինի բոլոր բուհերի համար: Յուրաքանչյուր կլաստերում ուսումնասիրություն կիրականացվի 4 չափանիշներով` մասնագիտության կրթական ծրագրերի գնահատում, դասավանդում և ուսումնառություն, դասախոսական կազմ և ռեսուրսներ, որակի ապահովում»:

Անդրադառնալով քննարկումներից դուրս բերված մարտահրավերներին՝ Ռ.Թոփչյանը նշեց, որ հարկավոր է հնարավորինս սեղմ ժամկետներում իրականացնել կլաստերային աուդիտ. «Եթե բուհերն ինտենսիվորեն աշխատեն, ինչպես ինստիտուցիոնալ հավատարմագրման ժամանակ, ապա 2018-ին արդեն կունենանք ոչ միայն բացահայտված խնդիրներ, այլ նաև լուծումներ, ինչից նախ և առաջ կշահի ուսանողը»:

Պարոն Թոփչյանի խոսքով՝  որակի շաբաթվա ընթացքում եղած քննարկումները կամփոփվեն և դրանց հիման վրա առաջարկներ կներկայացվեն կառավարությանը, ԿԳ նախարարությանը և բուհերին: