2016թ. մարտի 25-ին ԵՊՀ Իջևանի մասնաճյուղում տեղի ունեցավ նորաստեղծ Բանավեճի ակումբի առաջին՝ «Հասարակական կարծիքը որպես բարոյական հսկիչ» թեմայով քննարկումը, որը վարում էր ՄԿՈԱ բաժնի մասնագետ, սոցիոլոգ, փ.գ.թ., դոցենտ Է.Կյուրեղյանը:

Քննարկմանը մասնակցում էին տարբեր ֆակուլտետների և կուրսերի ուսանողներ, մասնաճյուղի աշխա­տակիցներ:

Նախ՝ պարոն Կյուրեղ­յանը ներկայացրեց «հասարակական կարծիք» կոչվող երևույթի գիտական ըմբռնումը, նրա ձևավորման մեխանիզմները, հնարավոր ազդեցությունները մարդկանց վարքի վրա, գի­տակցաբար այն կառավարելու ռեսուրսները:

Կոնկրետ օրինակների օգնությամբ ցուցադրվեցին հասարակական կյանքի կառավարման մեջ դրա գործնական կիրառության պատմությունը, մեր հանրապետությունում ձևավորվող մշակույթը, առկա դժվարությունները:

Մասնակիցնե­րին հատկապես հետաքրքրեցին այն վնասները, որը սոցիալական միջավայրը կրում է հա­սա­րակական կարծիքը չիմանալու, կամ այն իր «հակոտնյայի»՝ ասեկոսների, շշուկների հետ շփոթելու հետևանքով:

Սեփական կենսափորձի և հետազոտությունների արդ­յունքների ներկայացման, մանկավարժական, արտադրական ու կենցաղային կյանքից բերված օրինակների միջոցով հիմնավորվեցին այն ավերիչ հետևանքները, որոնք կարող են տեղի ունենալ այդ բացասական երևույթի՝ բամբասանքի պատճառով, հակիրճ ներկայացվեցին դրա դեմ գիտականորեն հիմնավորված «դեղատոմսերը»:

Այնուհետև տեղի ունեցավ մտքերի աշխույժ փոխանակություն: Մասնակիցները քննարկեցին երևույթի կոնկրետ ազդեցությունը իրենց ուսման, ընտանեկան կյանքի վրա, սոցիալական կյանքի տարբեր մակարդակ­նե­­րում հասարակական կարծիքի կամ բամբասանքի յուրա­հատ­կությունները, վերջինի դեմ պայքարի հնարավորությունները:

Ողջունելի էր, որ ուսանողներն իրենք էին իրենց հուզող հարցերի պատասխաններ գտնում:

Այս քննարկումը սեփական կարծիքը հայտնելու, դիմացինի կարծիքը լսելու, այն սեփականի հետ համադրելու և մասնագիտականի հետ համեմատելու լավ հնարավորություն էր մասնակիցների համար:

Նորաստեղծ Բանավեճի ակումբի առաջին քննարկումը հաջողությամբ կայացավ և ճանապարհ բացեց նոր ու հետաքրքիր քննարկումների համար:

 2016թ. մարտի 24-ին «Առաջին լրատվական»-ի թղթակցին ԵՊՀ Իջևանի մասնաճյուղի կողմից առաջարկվող մասնագիտությունների վերաբերյալ հարցազրույց տվեց տնօրեն Ս.Առաքելյանը:

Հարցազրույցի ընթացքում ներկայացվեցին գործող մասնագիտություններից բացի՝ վերջին չորս տարիներին  մասնաճյուղում ներդրված նոր մասնագիտությունները՝ «Կիրառական մաթեմատիկա և ֆիզիկա», «Քարտեզագրություն և կադաստրային գործ», «Հոգեբանություն» և «Դիզայն»:

Ընդգծվեց, որ տարածաշրջանում մասնագետների պահանջարկով պայմանավորված` 2016 թվականից մասնաճյուղն ընդունելություն է իրականացնում երկու նոր՝ «Տարրական մանկավարժություն և մեթոդիկա», «Համակարգչային գրաֆիկա» մասնագիտություններով: Առաջինը ներդրվել է Հումանիտար գիտությունների, երկրորդը՝ Կիրառական արվեստի ֆակուլտետում:

Նշվեց նաև, որ իր գործունեության 22 տարիների ընթացքում ԵՊՀ Իջևանի մասնաճյուղը հաջողությամբ իրականացնում է մարզի երիտասարդներին բարձրագույն կրթություն տալու, տարածաշրջանը բարձր որակավորում ունեցող մասնագետներով ապահովելու իր առաքելությունը. տվել է շուրջ 5000 շրջանավարտ, որոնք աշխատանքի են անցել ամենատարբեր ոլորտներում, 400-ից ավելին՝ դպրոցներում:

Հայտնի են ՀՀ բուհերի առկա ուսուցման համակարգի առաջին կուրսի անվճար համակարգում չընդգրկված ուսանողների շրջանում Հայաստանի երիտասարդական հիմնադրամի կողմից 2015-16 ուստարվա երկրորդ կիսամյակում հայտարարված մրցույթի արդյունքում կրթաթոշակի արժանացած ուսանողների անունները:

ԵՊՀ Իջևանի մասնաճյուղից ՀԵՀ-ի կազմակերպած ուսման վարձի փոխհատուցման մրցույթում հաղթող են ճանաչվել հետևյալ ուսանողները.

1. Ամյան Նարե Արմենի,
2. Մարտիրոսյան Նարա Մարտիկի,
3. Հարությունյան Արևիկ Սուրենի,
4. Համբարձումյան Նարինե Հակոբի,
5. Բալասյան Տանյա Տիգրանի,
6. Սարդարյան Արփինե Գարեգինի,
7. Մխիթարյան Լիա Անդրանիկի,
8. Խուդյան Անյուտա Կամոյի:

Ընդհանուր ցուցակին կարելի է ծանոթանալ այստեղ:

Աղբյուրը` heh.am

 2016թ. մարտի 19-ին Իջևանի թիվ 1 հիմնական դպրոցում անցկացվեց շախմատի մրցաշար, որը կազմակերպել էր Տավուշի մարզի միջազգային հայրենակցական միավորումը` միավորման նախագահ Սերգեյ Բարսեղյանի գլխավորությամբ:

Տավուշի մարզում առաջին անգամ անցկացվող շախմատի՝ հիմնարկ-ձեռնարկությունների թիմային մրցաշարին մասնակցում էին նաև ԵՊՀ Իջևանի մասնաճյուղի սաները՝ «Ինֆորմատիկա և Կիրառական մաթեմատիկա» մասնագիտության 1-ին կուրսի ուսանող Գիգուշ Մկրտչյանը, «Տնտեսագիտության տեսություն» մասնագիտության 2-րդ կուրսի ուսանող Արման Հարությունյանը, նույն մասնագիտության 4-րդ կուրսի ուսանող, ՈՒԽ-ի նախագահ Ռազմիկ Հովսեփյանը, «Անգլերեն լեզու և գրականություն» մասնագիտության 2-րդ կուրսի ուսանող Հայկ Դանիելյանը:       

Մասնակից 5 թիմերից լավագույն արդյունք ցուցաբերեց Նոյեմբերյանի ՀԷՑ-ը, 2-րդ տեղը գրավեց Հայ առաքելական եկեղեցու Տավուշի թեմի Նոյեմբերյանի համայնքը, 3-րդ տեղը զբաղեցրեց Տավուշի մարզպետարանը:

Առաջին տեղ գրաված թիմը պարգևատրվեց գավաթով, իսկ մրցանակային տեղեր գրաված շախմատիստները` համապատասխան մեդալներով ու դիպլոմներով:

ԵՊՀ Իջևանի մասնաճյուղի շախմատիստները, մրցաշարի կազմակերպիչների հավաստմամբ, ցուցադրեցին բավականին հետաքրքիր ու դիտարժան խաղ՝ զբաղեցնելով 4-րդ հորիզոնականը: