2014թ. փետրվարի 3-ին մասնաճյուղը հյուրընկալեց Իջևանում տեղակայված զորամասի հրամանատար Մ.Մախսուդյանին:

Ներկաներին ողջունեց ԵՊՀ ԻՄ-ի տնօրեն Ս.Առաքելյանը, շնորհավորեց Հայոց բանակի 22-րդ տարելիցի կապակցությամբ: Նա նշեց, որ Տավուշի մարզը ամենաերկար սահմանն ունի հակառակորդի հետ, և բուհի ու զորամասի սերտ համագործակցությունը խիստ կարևոր է: Մասնաճյուղն էլ մի սահմանապահ զորամաս է, որն ամուր վահանի պես պաշտպանում է մեր երկրի հյուսիսարևելյան հատվածը:

Այնուհետև ելույթ ունեցավ գնդի հրամանատար, գնդապետ Մ.Մախսուդյանը: Հրամանատարը ներկայացրեց նախարարի ուղերձը դպրոցներին ու բուհերին, ընդգծեց, որ տարեցտարի կարևորվում է բուհ-բանակ համագործակցությունը: Պարոն Մախսուդյանը խոսեց հայ զինվորների կատարած սխրագործությունների, բանակի համալրման, առկա խնդիրների և նպատակների մասին:

Հրամանատարը նաև պատասխանեց դասախոսների և ուսանողների հղած հարցերին: Ծավալվեց անկեղծ երկխոսություն:

2014թ. հունվարի 29-ին Հայոց բանակի 22-րդ տարելիցի կապակցությամբ ԵՊՀ Իջևանի մասնաճյուղում տեղի ունեցավ սեղանի թենիսի առաջնություն, որին մասնակցում էին ԵՊՀ Իջևանի մասնաճյուղի աշխատակիցները (Արկադի Դավթյան, Ալեքսան Մարգարյան, Արտակ Ցուցուլյան, Մհեր Աթոյան, Վարդիթեր Պողոսյան, Արթուր Վանեսյան, Ալվինա Առուստամյան, Սլավիկ Սարգսյան,  Օնիկ Ճոկլինյան և այլք):

Այն կազմակերպել էր Երևանի պետական համալսարանի Իջևանի մասնաճյուղի արտակարգ իրավիճակների, մարմնակրթության և սպորտի ամբիոնը:

Առաջնությունն անցկացվեց օլիմպիական ձևով:

Գերազանց խաղաց Բնական գիտությունների ֆակուլտետի դեկան Արտակ Ցուցուլյանը և դարձավ առաջնության հաղթող:

2014 հունվարի 27-ին ԵՊՀ ԻՄ մասնաճյուղում տեղի ունեցավ հանդիպում վերջին հինգ տարիներին ուսումնառությունը գերազանցությամբ ավարտած մի խումբ ուսանողների հետ:

Հանդիպման ընթացքում մասնաճյուղի տնօրեն Ս. Առաքելյանը կարևորեց շրջանավարտների ակտիվ դերակատարությունը բուհի կայացման գործում: Նա նշեց, որ մասնաճյուղը միշտ հետաքրքրվում է իր շրջանավարտներից յուրաքանչյուրի գործունեությամբ, հպարտանում նրանց ձեռքբերումներով, տխրում անհաջողությունների դեպքում, կարևորում երիտասարդների նոր գաղափարներն ու մտահղացումները, խրախուսում նախաձեռնությունները:

Հնչեցին տարաբնույթ հարցեր և պատասխաններ: Շրջանավարտները նշեցին մասնաճյուղի առավելությունները իրենց ուսանած այլ բուհերի նկատմամբ, ներկայացրին այն բացթողումները, որոնց լուծումը հնարավորություն կտա առավել որակյալ կրթություն տրամադրել և լինել մրցունակ:

Մասնակիցները ներկայացրին գիտության բնագավառում իրենց ունեցած հաջողությունները: Մասնաճյուղի տնօրենությունը մի քանի շրջանավարտների առաջարկեց դասախոսական աշխատանք՝ իրենց մասնագիտացմամբ, որը շրջանավարտներին հնարավորություն կտա կուտակած տեսական գիտելիքները կիրառել գործնականում:

Ս.թ. հունվարի 23-ին տեղի է ունեցել ՀՀ բուհերի վարկանիշավորման  ազգային համակարգի շնորհանդեսը, որի ընթացքում ներկայացվել են ծրագրի փորձնական արդյունքները: ՀՀ կրթության և գիտության նախարար Արմեն Աշոտյանը, կարևորելով  բուհերի վարկանիշավորման համակարգի ներդրումը, նշել է, որ դրա նպատակը բուհերի միջև մրցակցության և դրանց հաշվետվողականության բարձրացումն է, բուհական համակարգի շահառուների՝ բուհերի մասին բաց և թափանցիկ  տեղեկատվություն ստանալու հնարավորության ընդլայնումը, ինչպես նաև հասարակության  իրազեկվածության բարձրացումը` կրթության որակի և կրթական գործընթացի արդյունավետության վերաբերյալ:

«Աբողջ աշխարհում ընդունված է, որ այն երկրները, որոնց բուհերը հասկանալի պատճառներով չեն ընդգրկվում համաշխարհային բուհական վարկանիշավորման համակարգերում, մշակում են սեփական վարկանիշավորման համակարգերը: Եվ այս առումով Հայաստանը բացառություն չէ: Նշեմ, որ ազգային համակարգը մշակվել է`  հաշվի առնելով լավագույն միջազգային փորձը. ավելին` համակարգի մշակման գործընթացում ներգրավված են  եղել մարդիկ, ովքեր եղել են, օրինակ, Շանհայի և այլ միջազգային վարկանիշային համակարգերի հեղինակներ: Այսինքն` մենք ներկայացնում ենք տեղայնացված, ազգային առանձնահատկությունները հաշվի առնող, մեր կրթական միջավայրին հարմարեցված, բայց միջազգային փորձի վրա խարսխված տեղեկատվություն, որը կրում է փորձնական բնույթ: Այն մեթոդաբանությունը, որն ընդգրկում է տասնյակ չափանիշներ, մեկ տարվա ընթացքում լրամշակման կարիք ունի, որպեսզի արդյունքում ստեղծվի համակարգ, որն ամբողջությամբ կարտացոլի բուհական համակարգի իրական պատկերը»,-նշել է Արմեն Աշոտյանը` ընդգծելով, որ նախարարությունը շնորհակալ կլինի բոլոր մասնագիտական կարծիքների համար: Նախարարը հավելել է նաև, որ վարկանիշավորման մշակման գործընթացի վրա մեծ ազդեցություն  է ունեցել սոցիոլոգիական հարցումը, որն արվել է` պարզելու հատկապես գործատուների շրջանում երիտասարդ կադրերի ներգրավվածության աստիճանը:
Նշենք, որ բացի Բոլոնիայի գործընթացի նոր տասնամյա ծրագրի գործողություններից, ՀՀ բուհերի վարկանիշավորման համակարգի մշակումը ներառված է եղել նաև ՀՀ կառավարության 2012 թվականի գերակա խնդիրների  և միջոցառումների ցանկում: ՀՀ բուհերի վարկանիշավորման համակարգի ներդրումը նպատակ ունի Հայաստանյան բուհերի խմբավորումը իրականացվել է երկու հիմնական չափանիշների հիման վրա: Դրանք են` բուհում առկա կրթական ծրագրերը՝ բակալավրի, մագիստրոսի, հետբուհակա, բուհում առկա մասնագիտական ոլորտների թիվը՝ մինչև երեք մասնագիտական ոլորտում կրթություն իրականացնող բուհեր և երեք ու ավել մասնագիտական ոլորտներում կրթություն իրականացնող բուհեր, ինչպես նաև արվեստի բուհեր:
ՀՀ  բուհերի վարկանիշավորման  ազգային համակարգը հանրությանը հասանելի կլինի հունվարի 24-ից, ranking.armedu.am կայքում:

Աղբյուրը` edu.am