2013թ. հոկտեմբերի 25-ին Իջևանում բացվեց արվեստի փառատոն, որը  1985-1991թթ. Իջևանում կայացած քանդակի միջազգային սիմպոզիումի շարունակությունն է:

Իջևանի կենտրոնում տեղադրվել էին բացօթյա տաղավարներ, որտեղ ՓՄՁ ԶԱԿ-ի աջակցությամբ գործող Տավուշի մարզի սնունդ, գեղարվեստական իրեր թողարկող ձեռնարկությունները ներկայացրին իրենց արտադրանքը:

Արվեստի փառատոնում ԵՊՀ Իջևանի մասնաճյուղին հատկացվել էր առանձին տաղավար, որտեղ ցուցադրվեցին կիրառական արվեստի ֆակուլտետի ուսանողների կուրսային և ավարտական բազմաժանր աշխատանքների նմուշներ (գոբելեն, մետաքսանկարչություն, կերամիկական աշխատանք, փայտի գեղարվեստական մշակում, ասեղնագործություն և այլն):

Տավուշի մարզպետ Արմեն Ղուլարյանի և Իջևանի քաղաքապետ Վարդան Ղալումյանի ուղեկցությամբ տաղավարներ այցելեցին ՀՀ վարչապետ Տիգրան Սարգսյանը, մշակույթի նախարար Հասմիկ Պողոսյանը:

ԵՊՀ Իջևանի մասնաճյուղի կիրառական արվեստի ֆակուլտետի դեկան Կամո Այվազյանը և դեկորատիվ կիրառական արվեստի ամբիոնի ասիստենտ Անուշ Չիբուխչյանը վարչապետին, մշակույթի նախարարին և փառատոնի այցելուներին ներկայացրին ցուցադրված աշխատանքների թեմատիկան, կիրառական արվեստի ֆակուլտետի անփոխարինելի դերն ու ներդրումը մարզի արվեստների զարգացման գործում:

Վարչապետն իր խորին հիացմունքն արտահայտեց ներկայացված աշխատանքների կապակցությամբ:

2013թ. հոկտեմբերի 22-ին ԵՊՀ  Իջևանի  մասնաճյուղի վեց ուսանող և կիրառական արվեստի ֆակուլտետի դեկան Կամո Այվազյանը հյուրընկալվեցին  «ՎիվաՍել-ՄՏՍ» ընկերությունում:

Նպատակը ընկերության կողմից ուսանողների ուսման վարձավճարները փոխանցելու ավանդական դարձած նախաձեռնությունն էր:

Մասնաճյուղից ներկայացվել էր ընկերության սահմանած պահանջները բավարարող 40 ուսանող, որոնցից ընտրվել էին 6-ը (3 ուսանող Հումանիտար գիտությունների ֆակուլտետից, իսկ մնացած  ֆակուլտետներից` մեկական ուսանող): Ընտրված ուսանողների ուսուման վարձավճարները փոխանցելու է «ՎիվաՍել-ՄՏՍ» ընկերությունը:

Կ.Այվազյանը մասնաճյուղի անունից շնորհակալություն հայտնեց «ՎիվաՍել-ՄՏՍ»-ի գործադիր տնօրեն Ռալֆ Յիրիկյանին`    ընկերության հայրենանվեր նախաձեռնությունների համար և նրան նվիրեց Կիրառական արվեստի ֆակուլտետի ուսանողուհի Հերմինե Մինասյանի «Ծաղիկներ» գոբելենը:

2013թ. հոկտեմբերի 19-ին Տավուշի մարզի Մովսես գյուղում ՀՀ-ում Ռուսաստանի Դաշնության դեսպանատան և Դոնի Ռոստով քաղաքի հայ համայնքի համատեղ նախաձեռնությամբ  կազմակերպվել էր հանդիսավոր միջոցառում, որին մասնակցեցին ԵՊՀ ԻՄ-ի և Ռուսաստանի Հարավային Դաշնության Ռոստովի համալսարանի պատվիրակությունները:

Միջոցառման ընթացքում հայ համայնքի ներկայացուցիչները նաև գյուղի միջնակարգ դպրոցին նվիրեցին էլեկտրոնային հրաձգարան:

Հանդիսավոր միջոցառումը կրեց գործնական բնույթ:

Երկու բուհերի ներկայացուցիչները և ՀՀ-ում Ռուսաստանի Դաշնության դեսպանի խորհրդականը քննարկեցին երկու համալսարանների միջև հնարավոր համագործակցության հեռանկարը, ձեռք բերվեց որոշակի պայմանավորվածություն: