2017թ.  հուլիսի 1-ին ԵՊՀ Իջևանի մասնաճյուղում կայացավ Տնտեսագիտության ֆակուլտետի գիտական խորհրդի ընդլայնված  նիստ, որին մասնակցում էին ԵՊՀ ԻՄ-ի տնօրեն Ս. Ա. Առաքելյանը, ֆակուլտետի գիտխորհրդի անդամները, վարչական և պրոֆեսորադասախոսական անձնակազմի ներկայացուցիչներ, ուսանողներ:

Նիստի ընթացքում ամփոփվեցին 2016-2017 ուստարվա երկրորդ կիսամյակի քննաշրջանի արդյունքները, ըստ մասնագիտությունների՝ ֆակուլտետի 2017թ. ամփոփիչ ատեստավորման արդյունքները, քննարկվեցին մի քանի ընթացիկ հարցեր:

2016-2017  ուստարվա  երկրորդ  կիսամյակի  քննաշրջանի  արդյունքների վերաբերյալ Տնտեսագիտության ֆակուլտետի գիտական խորհրդի նախագահ, ֆակուլտետի դեկան, տ.գ.թ., դոցենտ Ն.Խուդավերդյանը մասնավորապես նշեց, որ տվյալ կիսամյակի քննաշրջանի  ստուգարքների  և  քննությունների  արդյունքները,  ըստ  ֆակուլտետում  գործող  կրթական  ծրագրերի,  դեկանատի  կողմից  ամենայն  մանրամասնությամբ վեր են լուծվել և ամփոփվել: Քննաշրջանը  ֆակուլտետում  կազմակերպվել  է  թվով  109 (26  անվճար,  83  վճարովի)  ուսանողների  համար, այդ  թվում՝  «Տնտեսագիտության  տեսություն»  մասնագիտության`   74  (15  անվճար,  59 վճարովի)  և  «Սերվիս»  մասնագիտության  35 (11  անվճար,  24  վճարովի)  ուսանողների համար,  ընթացակարգի  պահանջներին  համապատասխան:

Ստուգարքներն ու քննությունները դրական  են հանձնել 80 (51  «Տնտեսագիտության տեսություն», 29 «Սերվիս») ուսանողներ: Ըստ այդմ՝ ընդհանուր  առաջադիմությունը  ֆակուլտետում  կազմել  է 73%  (83%   «Սերվիս»,  70%  «Տնտեսագիտության տեսություն»): Նախորդ՝ 2015-2016  ուստարվա  համապատասխան  կիսամյակի  առաջադիմության  ցուցանիշի (77%)  համեմատ  նվազել  է  4 %-ով,  իսկ այս ուստարվա  առաջին  կիսամյակի  ցուցանիշի (70%)  համեմատ   աճել  է  3% -ով:

Ամփոփելով վերլուծության  արդյունքները նշվեց, որ ֆակուլտետում  անվճար  համակարգում սովորող բոլոր ուսանողները ցուցաբերել են 100% առաջադիմություն: 6 ուսանող ցուցաբերել է բացարձակ «գերազանց» առաջադիմություն (4 «ՏՏ», 2 «Ս»): Իսկ  առարկայական  պարտք  ունեն  հիմնականում հաճախումների  առումով  ֆակուլտետի  անկարգապահ  ուսանողները:

Ընդհանուր առմամբ 2016-2017  ուստարվա  երկրորդ  կիսամյակի  քննաշրջանի արդյունքները համարվեցին  բավարար:

Երկրորդ  հարցի կապակցությամբ ներկայացվեց,  որ  ֆակուլտետում  2016-17  ուստարում  կազմակերպվել  և  անց  է  կացվել ամփոփիչ  ատեստավորում «Տնտեսագիտության  տեսություն» և «Սերվիս»  մասնագիտությունների  գծով, համապատասխանաբար՝  2017թ.  մայիսի  21-ին  և  28-ին,  21-ին  և  27-ին`  ՀՀ ԿԳՆ  բոլոր  պահանջներին  համապատասխան:

Ամփոփիչ  քննությունները  և  ավարտական  աշխատանքների  պաշտպանությունները  անց  են  կացվել  պատշաճ  կազմակերպված`  համաձայն  սահմանված ժամանակացույցի:

«Տնտեսագիտության  տեսություն» մասնագիտության  ամփոփիչ  քննությանը  մասնակցել  են 21  շրջանավարտներ:  Նրանցից  3-ը`  գնահատվել  է «գերազանց»,  13-ը` «լավ»,  5-ը՝ «բավարար»,  «անբավարար»  գնահատական  չի  գրանցվել:

Ավարտական  աշխատանքների  պաշտպանությանը  ևս  մասնակցել  են  21  շրջանավարտներ,  որոնցից  8-ը  գնահատվել է «գերազանց»,  11-ը՝ «լավ»,  2-ը` «բավարար»,  դարձյալ  «անբավարար»  գնահատականներ  չեն  գրանցվել:   Ընդ  որում՝  բարձր  («լավ»  և  «գերազանց»)  գնահատականների  արժանացած  ուսանողների  կողմից  ցուցաբերվել է  իմացության  և  պատրաստվածության բավականաչափ բարձր մակարդակ. մեկ  շրջանավարտ  մասնաճյուղի  կողմից  երաշխավորվել  է  ուսման  վճարի  100%  փոխհատուցմամբ  ուսումը շարունակելու  մագիստրատուրայում  (ԵՊՀ  համապատասխան  ֆակուլտետում):

Ընդհանուր  առմամբ «Տնտեսագիտության  տեսություն» մասնագիտության  ամփոփիչ  քննության  և ավարտական  աշխատանքների  պաշտպանության  արդյունքները համարվեցին բավարար:

Ներկայացվեց, որ «Սերվիս» մասնագիտության  ամփոփիչ  քննությանը  մասնակցել  են 14  շրջանավարտներ: Նրանցից  7-ը  գնահատվել է «գերազանց»,  6-ը` «լավ»,  1-ը`  «բավարար», «անբավարար» գնահատական  չի  գրանցվել:

Ավարտական  աշխատանքների  պաշտպանությանը  ևս  մասնակցել են 14  շրջանավարտներ,  որոնցից  8-ը  գնահատվել է «գերազանց», 11-ը «լավ»,  2-ը`  «բավարար»: Ներկայացված  ավարտական  աշխատանքներն  առանձնացան  հատկապես  իրենց  վերլուծական  և  կատարողական  բարձր  մակարդակով:

Նշվեց, որ ընդհանուր  առմամբ հանձնաժողովների  նախագահները դրական  կարծիքներ  են արտահայտել ֆակուլտետում իրականացվող  ուսումնամեթոդական  աշխատանքների  վերաբերյալ: 

Նիստի ընթացքում ելույթ ունեցավ Տուրիզմի կառավարման և մշակութաբանության ամբիոնի վարիչ Գ.Հովհաննիսյանը՝ ներկայացնելով իր նկատառումներն ու առաջարկները՝ ուսումնական գործընթացի շարունակական բարելավման ուղղությամբ:

Ամփոփիչ խոսքով հանդես եկավ մասնաճյուղի տնօրեն Ս. Ա. Առաքելյանը՝ 2016-2017 ուստարվա  երկրորդ  կիսամյակում  Տնտեսագիտության ֆակուլտետի կողմից իրականացված աշխատանքները գնահատելով բավարար:

2017թ. հունիսի 27-ից հուլիսի 1-ը «Գիտենալու իրավունք» ծրագրի շրջանակներում «Ուրբան» և «Friedrich Ebert Stiftung» հիմնադրամների կողմից Ծաղկաձորում իրականացվեց ամառային դպրոց, որը նախատեսված էր մարզային համալսարանների ուսանողների և  երիտասարդ դասախոսների համար:

Ծրագիրը բաղկացած էր երեք փուլից:

Առաջին փուլում  ծրագրի ներկայացուցիչներն այցելել էին մարզեր, ներկայացրել ծրագիրը բուհերում (այդ թվում՝ ԵՊՀ Իջևանի մասնաճյուղում) և հետաքրքրված անձանց հրավիրել մասնակցելու ծրագրի երկրորդ փուլին՝ ամառային դպրոցին:

Երրորդ փուլում նախատեսված է ԵՊՀ-ում աշնանն անցկացնել կոնֆերանս, որտեղ մասնակիցները, ամառային դպրոցի դասախոսներից ստանալով  խորհրդատվական աջակցություն,  կներկայացնեն  դպրոցում քննարկված և  իրենց հետաքրքրող թեմաներով գիտական զեկուցումներ:

Ամառային դպրոցի մասնակիցները գլխավորապես ՀՀ մարզային  համալսարանների՝  ԵՊՀ Իջևանի մասնաճյուղի, Գորիսի և Շիրակի պետական համալսարանների հումանիտար  գիտությունների դասախոսներ և ուսանողներ էին:

ԵՊՀ ԻՄ-ից դպրոցին մասնակցում էին մի խումբ ուսանողներ՝ մասնաճյուղի շրջանավարտների և կարիերայի աշխատանքների համակարգող Արփինե Եգանյանի ուղեկցությամբ:

Նախ՝ ամառային դպրոցի կազմակերպիչները մասնակիցներին ներկայացրին ծրագրի նպատակներն ու խնդիրները, ընդհանուր գծերով անդրադարձան ՀՀ քաղաքական ու տնտեսական ինտեգրացիոն գործընթացներին, ժողովրդավարության  վերաբերյալ տեսական հիմքերին:

Այնուհետև ծրագրի փորձագետները ներկայացրին ՀՀ հարևան երկրների, Եվրամիության և ԵԱՏՄ հետ համագործացության պատմությունը, նախատեսվող և կորսված տնտեսական և քաղաքական հնարավորությունները, Արևելքի և Արևմուտքի  քաղաքատնտեսական և մշակութային արժեքները, օտարերկյա ԶԼՄ-ների քարոզչության դեմ պայքարի ուղղությունները, ՀՀ տնտեսական զարգացման հեռանկարները:

Քառօրյա դասախոսություններն ընդհատվում էին մասնակիցների ակտիվ միջամտություններով, կազմակերպվում էին բանավեճեր, որտեղ հնչած հետաքրքիր կարծիքները հիմք էին տալիս  նոր տեսակետների ձևավորման համար:

Ամառային դպրոցի կազմակերպիչները, դպրոցի սաների հետ քննարկելով նրանց հետաքրքրող թեմաները, հույս հայտնեցին, որ նրանք ակտիվորեն կմասնակցեն ծրագրի երրորդ փուլին և կստանան հավաստագրեր:

 2017թ. հունիսի 30-ին ԵՊՀ Իջևանի մասնաճյուղում կայացավ Հումանիտար գիտությունների ֆակուլտետի գիտական խորհրդի ընդլայնված նիստ, որին մասնակցում էին գիտխորհրդի անդամները, ֆակուլտետի վարչական և պրոֆեսորադասախոսական անձնակազմի ներկայացուցիչները, ուսանողները:

Նիստի ընթացքում քննարկվեցին 2016-17 ուստարվա ընթացքում ամբիոնների կատարած աշխատանքները, ամփոփիչ ատեստավորման և ավարտական աշխատանքների պաշտպանության և գարնանային քննաշրջանի արդյունքները,  ինչպես նաև Անգլերեն լեզվի և գրականության ամբիոնի դասախոս Ս. Աբրահամյանի՝ «Անգլերենը արվեստի ֆակուլտետի ուսանողների համար» մեթոդական ձեռնարկը տպագրության երաշխավորելու հարցը:

Հումանիտար գիտությունների ֆակուլտետի գիտական խորհրդի նախագահ, ֆակուլտետի դեկան, պ.գ.դ., պրոֆեսոր Ա. Ներսիսյանը ամփոփիչ ատեստավորման և ավարտական աշխատանքների պաշտպանության վերաբերյալ նշեց, որ հանձնաժողովների նախագահները հիմնականում բարձր են գնահատել շրջանավարտների ցուցաբերած գիտելիքները: Վերջիններիս դիտարկումները քննարկվել են համապատասխան ամբիոնների նիստերում, կատարվել անհրաժեշտ հետևություններ:

Այնուհետև ֆակուլտետի հինգ ամբիոնների վարիչները ընդհանուր գծերով ներկայացրին իրենց ամբիոնների տարեկան գործունեությունը: Նրանք նշեցին, որ կատարվել է մեծ ծավալի գիտամանկավարժական աշխատանք, կազմակերպվել են միջոցառումներ, մրցույթներ, քննարկումներ: Ամբիոնների վարիչների կողմից հաճախակի իրականացվել են դասալսումներ: Զեկուցողները հատկապես կարևորեցին այն փաստը, որ Մասնաճյուղում ստացած ուսումնառությունից շրջանավարտների բավարարվածության՝ այս տարվա հարցման արդյունքները բավականին գոհացնող են:

Օրակարգի հաջորդ հարցի վերաբերյալ զեկուցող Վ.Աղաբաբյանը ներկայացրեց քննաշրջանի կազմակերպական աշխատանքների ընթացքի մասին: Նշվեց, որ գարնանային քննաշրջանի ընթացքը եղել է պատշաճ կազմակերպված և գտնվել է դեկանատի մշտական ուշադրության կենտրոնում: Ընդգծվեց, որ տարեցտարի բարձրանում է ստուգարքներին և քննություններին ուսանողների պատրաստվածության մակարդակը: Նշված ժամանակահատվածում ֆակուլտետի առաջադիմությունը կազմել է 90.46%: Դա բացատրվում է նրանով, որ տվյալ առարկայի նյութը մաս-մաս յուրացնելով, կիսամյակի ընթացքում պարբերաբար միջանկյալ քննություններ հանձնելով՝ ուսանողը եզրափակիչ քննությանը ներկայանում է պատշաճ գիտելիքներով:  2016-2017 ուստարվա ձմեռային քննաշրջանին մասնակցել են 325 ուսանողներ:  Միայն գերազանց գնահատականներ է ստացել 37 ուսանող, գերազանց և լավ` 101, խառը գնահատականներ` 149, իսկ միայն բավարար` 7 ուսանող:  31 ուսանողներ չեն կարողացել հանձնել քննությունները և իրենց ուժերը կփորձեն լուծարքային շրջանում: Զեկուցողը նշեց, որ մեկ անբավարար է ստացել 22 ուսանող, երկու անբավարար՝ 6, իսկ երեք և ավելի՝ 3 ուսանող: Նրանց մի մասը անբավարար պատրաստվածության պատճառով չի ներկայացել ստուգարքներին և քննություններին:

Պետք է փաստել, որ քննաշրջանը կազմակերպվել է պատշաճ կերպով, քննություններն ու ստուգումներն իրականացվել են ժամանակացույցի համաձայն:

Օրակարգի 3-րդ հարցի վերաբերյալ նախագահողը նշեց, որ Ս. Աբրահամյանի կողմից կատարվել է մեծածավալ աշխատանք: Գրքի ստեղծմանը մասնակցել է ԵՊՀ ԻՄ-ի գծանկարի, գունանկարի և քանդակի ամբիոնի ասիստենտ, ՀՀ նկարիչների միության անդամ Ս. Հովհաննիսյանը: Ընտրված տեքստերը համապատասխանում են մասնագիտության պահանջներին: Բաց քվեարկությամբ ֆակուլտետի գիտխորհրդի անդամները կողմ քվեարկեցին ձեռնարկը երաշխավորության ներկայացնելուն:

Ամփոփիչ խոսքով հանդես եկավ մասնաճյուղի տնօրեն Ս. Ա. Առաքելյանը: Նա բավարար համարեց կատարված աշխատանքները և նշեց, որ պետք է մեծ ուշադրություն դարձնել միջառարկայական կապերին, ոչ մասնագիտական կուրսերում դասավանդվող առարկաներին:

 2017թ. հունիսի 29-ին ավարտվեց 2016-17 ուստարվա II կիսամյակի սկզբից մեկնարկած՝ «Քարտեզագրություն և կադաստրային գործ» մասնագիտության I և II կուրսերի ուսանողների ուսումնական պրակտիկան՝ «Տեղագրություն գեոդեզիայի հիմունքներով» և «Կադաստրային քարտեզագրում» առարկաներից:

«ՔԿԳ» մասնագիտության առաջին կուրսի պրակտիկան ղեկավարում էր Տուրիզմի կառավարման և մշակութաբանության ամբիոնի ասիստենտ, մասնագիտության կրթական ծրագրի պատասխանատու Պավել Ասիլբեկյանը, երկրորդ կուրսի պրակտիկայի ղեկավարն էր Ընդհանուր մաթեմատիկայի և բնագիտության ամբիոնի ասիստենտ, տ.գ.թ. Արտակ Ամիրխանյանը:

Ուսումնական պրակտիկան իրականացվել է ինչպես նոր ձեռք բերված էլեկտրոնային տախեոմետրով, այնպես էլ լաբորատորիայում առկա սարքավորումներով (թեոդոլիտ, նիվելիր, կիպրեգել):

Պրակտիկայի ընթացքում կատարվել են չափագրումներ մասնաճյուղի մերձակա (կառուցապատված տարածք) և Իջևանի դենդրոպարկի տարածքում (անտառապատ տարածք):

Ուսումնական պրակտիկայի եզրափակիչ փուլում ուսանողներն իրականացրել են մենզուլային հանույթ և ստացել փոքր տեղամասի հատակագիծ։

Հունիսի 29-30-ը ուսանողները հանդես եկան հաշվետվությամբ՝ արժանանալով պրակտիկայի ղեկավարների գոհունակությանը:

2017թ. հունիսի 29-ին ԵՊՀ Իջևանի մասնաճյուղում կայացավ Հեռակա ուսուցման բաժնի աշխատակիցների հետ տնօրեն Ս.Առաքելյանի հանդիպումը, որին հրավիրված էին և մասնագիտությունների կրթական ծրագրերի պատասխանատուները:

Հանդիպման ընթացքում քննարկվեցին 2017թ. հեռակա ուսուցման ամփոփիչ ատեստավորման արդյունքներին, ԵՊՀ ԻՄ-ում ստացած կրթությունից շրջանավարտների բավարարվածության՝ 2016-17 ուստարվա առցանց հարցման արդյունքներին, դասախոսների անհատական ծանրաբեռնվածությսունների արդյունավետ բաշխմանը,  կրթական ծրագրերի, ընդհանրապես ուսումնական գործընթացի շարունակական բարելավմանը վերաբերող մի շարք հարցեր:

Այդ համատեքստում, մասնավորապես՝ կրթական ծրագրերի կատարելագործման հարցում, ընդգծվեց Հեռակա ուսուցման բաժնի և մասնագիտությունների կրթական ծրագրերի պատասխանատուների սերտ համագործակցության կարևորությունը:

Նշվեց, որ այս տարի ինչպես առկա, այնպես էլ հեռակա ուսուցման շրջանավարտները առցանց եղանակով են մասնակցել ԵՊՀ ԻՄ-ում ստացած կրթությունից շրջանավարտների բավարարվածության հարցմանը, ըստ մասնագիտությունների ներկայացրել են իրենց կարծիքները՝ ստացած ուսումնառության և մասնաճյուղի ռեսուրսների (լսարանների, համակարգչային սրահների, համացանցի, ուսումնական լաբորատորիաների, գրադարանի և ընթերցասրահների, ուսանողական կառույցների, մասնաճյուղի և ֆակուլտետների ղեկավարության, պրոֆեսորադասախոսական կազմի, ուսանողների դիմումներին և բողոքներին արձագանքելու ընթացակարգերի և մեխանիզմների, ուսանողների կողմից վերհանված կարիքների) վերաբերյալ, նշել են մի շարք հետաքրքիր առաջարկներ:

Ընդհանուր առմամբ հարցումների արդյունքները գոհացուցիչ են: Հատկանշական է, որ հարցմանը մասնակցած 232 շրջանավարտներից 227-ը (97,8%-ը) դրական է պատասխանել «Խորհուրդ կտա՞ք Ձեր մերձավորներին և ընկերներին ընդունվել ԵՊՀ ԻՄ» հարցին:

Շեշտվեց, որ անհրաժեշտ է առավել մեծ ուշադրություն դարձնել ուսանողների գործնական հմտությունների զարգացման, պրակտիկաների արդյունավետ կազմակերպման խնդիրներին, պրակտիկանտ-ուսանողների հետ հետևողականորեն աշխատել, հստակեցնել տվյալ պրակտիկայի իրականացման նպատակը, խնդիրները, ուսանողներին կողմնորոշել պրակտիկաների անցկացման վայրերի (ուսումնական հաստատություններ, հիմնարկ-ձեռնարկություններ և այլն) նպատակահարմար ընտրության մեջ:

Հանդիպման ընթացքում քննարկվեց նաև ոչ մասնագիտական կուրսերում օտար լեզուների ուսուցման արդյունավետությունը բարձրացնելու հարցը, որի ուղղությամբ առաջարկվեց մասնաճյուղում ստեղծել օտար լեզուների ուսուցման կենտրոններ: