2017թ. մարտի 4-ին հանրակրթական 13 առարկաներից անցկացվեց դպրոցական ամենամյա օլիմպիադան, որը 2009 թվականից ի վեր կազմակերպվում է ԵՊՀ մինչհամալսարանական կրթության վարչության կողմից:

Տավուշի մարզում օլիմպիադայի աշխատանքներն իրականացնում է ԵՊՀ Իջևանի մասնաճյուղի մասնագիտական կողմնորոշման և պրակտիկայի կազմակերպման բաժինը:

Օլիմպիադայի անցկացման նպատակն է շնորհալի ու ստեղծագործական կարողություններ ունեցող երեխաների հայտնաբերումը, նրանց հետ անհատական աշխատանքի կազմակերպումը:

Դպրոցական օլիմպիադայի մասնակիցներին ողջունեց և գիտելիքների այս ստուգատեսում հաջողություններ մաղթեց մասնաճյուղի տնօրեն Ս. Ա. Առաքելյանը, իր խոսքում կարևորեց մասնագիտության ճիշտ ընտրությունը, մրցունակ մասնագետ դառնալու գործում ընդգծեց տվյալ մասնագիտության հանդեպ սիրո, աշխատասիրության, նպատակասլացության գործոնները:

Այս տարի Տավուշի մարզից օլիմպիադային մասնակցեց 24 միջնակարգ, 4 ավագ դպրոցների և 2 վարժարանի 300 աշակերտ` հանրակրթական հետևյալ առարկաների գծով.

• մաթեմատիկա,
• ֆիզիկա,
• քիմիա,
• ինֆորմատիկա,
• կենսաբանություն     
• աշխարհագրություն,
• հայ ժողովրդի պատմություն,
• հայոց լեզու և գրականություն,
• ռուսաց լեզու,
• անգլերեն,
• գերմաներեն,
• ֆրանսերեն,
• ստեղծագործական աշխատանք:

2017թ. դպրոցականների օլիմպիադան նախատեսված է անցկացնել 2 փուլով:

Մարտի 4-ին ԵՊՀ-ում և ՀՀ բոլոր մարզերում անցկացվեց դպրոցականների օլիմպիադայի I փուլը:

Մարտի 18-ին՝ ժամը 11:00-ին, Երևանի պետական համալսարանում կանցկացվի դպրոցականների օլիմպիադայի II փուլը, որին կմասնակցեն I փուլի հաղթողները:

2016-17 ուստարվա երկրորդ կիսամյակում ԵՊՀ Իջևանի մասնաճյուղի «ՀԼԳ», «ՄՀ», «ԻԿՄ» 3-րդ և «ԱԼԳ», «ՖԼԳ», «ՄՀ» մասնագիտությունների 4-րդ կուրսերի շուրջ 100 ուսանողներ Տավուշի և Գեղարքունիքի մարզերի հանրակրթական դպրոցներում անցկացրին 2016-17 ուստարվա ուսումնական պլանով նախատեսված իրենց մանկավարժական պրակտիկան:

Մանկավարժական պրակտիկայի անցկացման հիմնական նպատակն է ուսանողների մանկավարժական կարողությունների, աշակերտների հետ աշխատելու հմտությունների զարգացումը, մանկավարժական փորձառության ձեռքբերումը:

Պրակտիկայի խմբերի ղեկավարները պրակտիկանտ-ուսանողների հետ սահմանված կարգով իրականացրել են խորհրդատվություններ, պարզաբանել պրակտիկայի նպատակները, խնդիրները, նրա անցկացման ժամկետները, տրամադրել մեթոդական համապատասխան ցուցումներ և անհրաժեշտ գրականություն:

Մանկավարժական պրակտիկան անցկացվում  է երկու փուլով:

Առաջին փուլում ուսանողը ծանոթանում է դպրոցին, իրեն կցված դասարանին, աշակերտներին, ուսուցիչներին, մասնագիտական առարկաների ծրագրերին, դասագրքերին, դասացուցակին:

 Ուսանող-պրակտիկանտները մասնակցում են դասապրոցեսներին, կատարում դասալսումներ, որոնց արդյունքում ինքնավստահություն են ձեռք բերում ակտիվ պրակտիկայի համար: Մանկավարժական պրակտիկայի առաջին փուլը ինքնաճանաչման, ինքնահաստատման բազմաստիճան գործընթացի առաջին աստիճանն է, որտեղ ուսանողները երեք տարիների ընթացքում իրենց ձեռք բերած տեսական գիտելիքները օգտագործում են պրակտիկայում:

Պրակտիկայի երկրորդ փուլում ուսանողն իրականացնում է ակտիվ մանկավարժական պրակտիկա, որի ընթացքում անցկացնում է դաս ուսուցիչ-մեթոդիստի հետ նախապես պլանավորած թեմայով: Ուսանողի վարած դասը լսում են ուսանողին կցված ուսուցիչ-մեթոդիստը և իր ընկեր-ընկերուհիները: Դասն ավարտելուց հետո այն քննարկվում է, մատնանշվում են դասի դրական և բացասական կողմերը:

Մանկավարժական պրակտիկայի ընթացքում դրսևորվում են պրակտիկանտի մանկավարժական ընդունակությունները, աստիճանաբար ձևավորվում է ուսուցչի մանկավարժական տակտ, վարպետություն և տեխնիկա:

2017թ. մարտի 3-ին ԵՊՀ ԻՄ-ի տնտեսագիտության  ֆակուլտետում  տեղի ունեցավ միջոցառում, որին, որպես հատուկ հյուր, հրավիրված էր Տնտեսագիտության ֆակուլտետի դեկան Ն.Խուդավերդյանը, մասնակցում էին ֆակուլտետի դասախոսները և ուսանողները:

Միջոցառման ընթացքում ուսանողները, տիկին Խուդավերդյանին ուղղելով իրենց հետաքրքող հարցերը, ստացան անկեղծ ու անմիջական պատասխաններ:

Հարցերի մոտավոր շրջանակն այսպիսին էր.

• «Ո՞րն է Ձեր կյանքի ամենամեծ ձեռքբերումը»,
• «Ի՞նչ է Ձեզ համար  նշանակում  լինել հաջողակ, հասնել  հաջողությունների»,
• Ինչպե՞ս է հաջողվում զուգակցել  ընտանիքը և  սիրելի աշխատանքը»,
• «Ի՞նչպես եք ընդունում Ձեր  հասցեին  ուղղված  քննադատությունները»,
• «Ի՞նչ դեր  պետք  է  ունենա  փողը  մարդու  կյանքում»,
• «Ի՞նչ եք  սիրում անել  ազատ  ժամանակ»,
• «Ո՞րն է  Ձեր  ամենամեծ  խորհուրդը, որը  կարող  եք  այժմ մեզ տալ»:

Պատասխանելով, օրինակ, «Ո՞րն է Ձեր կյանքի ամենամեծ ձեռքբերումը» հարցին՝ Ն.Խուդավերդյանը նշեց, որ իր երկու զավակները:

«Ի՞նչ  եք  սիրում անել  ազատ  ժամանակ» հարցին պատասխանեց, որ սիրում է լրացնել սուդոկու, նվագել և նկարել:

«Ի՞նչ երգ  է սիրում լսել, ի՞նչ գիրք կարդալ  և ի՞նչ ֆիլմ դիտել»  հարցերին  նա պատասխանեց, որ նախընտրում է  դասական երաժշտություն,  քանի որ այն ավելի խորն է և հոգեհույզ, թեև կան բազմաթիվ գեղեցիկ   երգեր, սակայն սիրելի երգ դժվարանում է առանձնացնել:  Ընդգծելով, որ առհասարակ չկա վատ գիրք կամ ֆիլմ (ցանկացածից կարելի է դաս քաղել)՝ Ն.Խուդավերդյանը խորհուրդ տվեց ընթերցել  առնվազն  Աստվածաշունչը:

Ուսանողների այն հարցին, թե ինչ խորհուրդ կտար ինքն իրեն  6, 16 և  20 տարեկանում, նա ափսոսանք հայտնեց, որ  մանուկ հասակում չի զարգացրել նկարելու  իր  ձիրքը, իսկ ներկաներին խորհուրդ տվեց կյանքին վերաբերվել թեթև, բայց չլինել մակերեսային:

Միջոցառման  վերջում   տիկին  Խուդավերդյանը շնորհակալություն հայտնեց ուսանողներին՝ նման նախաձեռնության, ստեղծված մտերմիկ-անմիջական մթնոլորտի համար, իսկ ներկաները հույս հայտնեցին,  որ նախաձեռնությունը կլինի  շարունակական:

2017 թվականի մարտի 3-ին ԵՊՀ Իջևանի մասնաճյուղում տեղի ունեցավ «Չեզարե Լոմբրոզո. կենսագրություն  և տեսություն» թեմայով սեմինար-քննարկում, որը վարեց Մանկավարժության և հոգեբանության ամբիոնի ասիտենտ, հոգեբանական գիտությունների թեկնածու Դիանա Սարգսյանը:

Ներկա էին Մանկավարժության  և հոգեբանության ամբիոնի անձնակազմի ներկայացուցիչները, «Հոգեբանություն» մասնագիտության առկա և հեռակա ուսուցման համակարգերի տարբեր կուրսերի ուսանողներ:

Սեմինար-քննարկման ընթացքում զեկուցումով հանդես եկավ «Հոգեբանություն» մասնագիտության 2-րդ կուրսի ուսանողուհի Լիլիթ Հայրապետյանը:

Ներկայացվեցին իտալացի մեծ բժիշկ, գիտնական, քրեաբանության  և գանգաբանության ուսմունքի առաջնորդ Չ.Լոմբրոզոյի գիտական հայացքները, հայտնագործությունները և հետազոտության արդյունքները:

Քննարկվեցին հանճարեղության  և խելագարության, հանցավոր վարքի գենեզիսի և նորմայի ու ախտաբանության հիմնախնդիրները:

2017թ. մարտի 3-ին Հայաստանի երիտասարդական հիմնադրամի կողմից ուսման վարձի փոխհատուցման հավաստագիր ստացավ 745 ուսանող, որոնցից 25-ը ԵՊՀ իջևանի մասնաճյուղի ուսանողներ էին:

Այս կիսամյակում ՀԵՀ-ի կողմից հայտարարված մրցույթին մասնաճյուղից դիմած 32 ուսանողից կրթաթոշակի արժանացավ  25 ուսանող.

1. Մելինե Արմենի Թիրաբյան,
2. Աննա Արմենի Դավթյան,
3. Լյովա Խաժակի Հովակիմյան,
4. Տաթևիկ Եսայու Ղևոնդյան,
5. Արաքսյա Հայկի Մնացականյան,
6. Արմիդա Գրիգորի Բաղիյան,
7. Նելլի Միկիչի Բեջանյան,
8. Ռուզան Բորիսի Բալասանյան,
9. Արփինե Ռուբենի Մելիքսեթյան,
10. Թամարա Արսենի Հովհաննիսյան,
11. Սաթենիկ Ղարիբի Բեգլարյան,
12. Դիանա Արմենի Ներսիսյան,
13. Մարինա Իշխանի Խառատյան,
14. Մերի Արայիկի Սարհատյան,
15. Տաթևիկ Սուրենի Իսահակյան,
16. Արթուր Արմենի Հարությունյան,
17. Արինա Նորիկի Ալավերդյան,
18. Լիլիթ Սամվելի Հովսեփյան,
19. Ռոզա Արմենի Մելքումյան,
20. Նարա Վահագնի Սարիբեկյան,
21. Գոռ Արթուրի Եսայան,
22. Անի Սևադայի Բալասանյան,
23. Էմմա Տիգրանի Ջամալյան,
24. Քրիստինե Արթուրի Քոչարյան,
25. Քրիստինե Տիգրանի Բրուտյան:

ՀԵՀ-ի կրթաթոշակ ստացած ուսանողների ընդհանուր ցուցակին կարելի է ծանոթանալ այստեղ:

Երիտասարդական հիմնադրամը պետական բուհերի բակալավրիատի առկա ուսուցման համակարգի առաջին կուրսում սովորողների ուսման վարձի փոխհատուցման ծրագիրն իրականացնում է ՀՀ կառավարության և կրթության և գիտության նախարարության աջակցությամբ։ Այս տարի մրցույթին մասնակցելու համար հայտ է ներկայացրել 1305 ուսանող։ Մրցույթի արդյունքում ուսման վարձի փոխհատուցում են ստացել սոցիալապես անապահով ընտանիքների, երրորդ խմբի հաշմանդամ, սահմանամերձ համայնքների, ինչպես նաև գերազանց առաջադիմություն և հասարակական ակտիվություն ունեցող ուսանողները։ Մասնավորապես, Հայկական պետական մանկավարժական համալսարանից մրցույթին դիմել է 299 առաջին կուրսեցի, որոնցից փոխհատուցվել է 156-ի ուսման վարձը։ Երևանի պետական համալսարանից փոխհատուցվել է 157 ուսանողի (դիմել են 237-ը), Հայաստանի պետական տնտեսագիտական համալսարանից 69 ուսանողի (դիմել են 189-ը) ուսման վարձը և այլն։ 

Մրցույթի շրջանակներում ներգրավված են նաև մարզերում գործող բուհերի ուսանողները։ Մասնավորապես, ուսման վարձի փոխհատուցման ծրագրից օգտվում է Վանաձորի պետական համալսարանի 44 (դիմել են 57-ը), Երևանի պետական համալսարանի Իջևանի մասնաճյուղի 25 ուսանող (դիմել են 32-ը) և այլն։

Ուսման վարձի փոխհատուցում է ստանում նաև զինծառայության ընթացքում մարտական հերթապահություն իրականացրած 11, ինչպես նաև՝ 2016-ի ապրիլյան քառօրյա պատերազմին մասնակցած 5 ուսանող։ 

Ուսման վարձի փոխհատուցման հավաստագրերն ուսանողներին է հանձնել ՀՀ վարչապետ Կարեն Կարապետյանը։ Շնորհավորելով ուսանողներին` կառավարության ղեկավարը վստահություն է հայտնել, որ որոշ ժամանակ անց ունենալու ենք մի երկիր, որով բոլորս հպարտանալու ենք։ Վարչապետը նշել է, որ մեր ունեցած մարտահրավերները ստիպում են մեզ լինել խելացի և կիրթ։ Դիմելով երիտասարդներին` պարոն Կարապետյանը նրանց կոչ է արել, որ շարունակեն իրենց կրթության ուղին, գիտելիքի, ուսման նկատմամբ վերաբերմունքը տարածեն իրենց շրջապատում, լինեն հայրենասեր, ակտիվ քաղաքացիներ, հանդուրժող միմյանց, բայց անհանդուրժող անարդարության նկատմամբ։ 

ՀԵՀ-ի հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանն ընդգծել է, որ ուսման վարձի փոխհատուցումը հիմնադրամի կարևորագույն ծրագրերից է, այն սպասված է ինչպես հիմնադրամի, այնպես էլ մեծաթիվ ուսանողների համար։ «Մենք կարողանում ենք 750 ուսանողի միանվագ աջակցություն ցուցաբերել, աջակցություն նրանց առաջադիմության համար, և նրանց մոտ վստահություն ձևավորել, որ լավ սովորելով կարող են մեղմել սոցիալական խնդիր։ Այս ծրագրի միջոցով շատ ուսանողներ կարողանում են հաղթահարել առաջին կուրսը, այնուհետև գերազանց առաջադիմության շնորհիվ ռոտացիոն համակարգով անցնել անվճար համակարգ»,- նշել է Կարեն Ավագյանը՝ ավելացնելով, որ սա Հայաստանում կրթաթոշակների փոխհատուցման ամենամեծ ծրագիրն է։ 

2011 թվականից ՀԵՀ-ը ՀՀ կառավարության աջակցությամբ իրականացնում է ուսման վարձերի փոխհատուցման ծրագրեր, և այդ թվականից ի վեր տարբեր ծրագրերի շրջանակներում մասնակիորեն կամ ամբողջությամբ փոխհատուցել է շուրջ 6000 ուսանողի ուսման վարձ։ 

Աղբյուրը` heh.am: