2019թ. հուլիսի 18-ին ԵՊՀ Իջևանի մասնաճյուղում կայացավ տնօրենության ընդլայնված նիստ` Ա. Վ. Ցուցուլյանի նախագահությամբ:

Նիստին մասնակցում էին տնօրենության անդամները, Ուսումնամեթոդական վարչության աշխատակիցները:

Ընդլայնված նիստում քննարկվեցին ԵՊՀ ԻՄ-ի ուսումնամեթոդական վարչության՝ 2018-19 ուսումնական տարվա գործունեությանը վերաբերող և մի քանի ընթացիկ հարցեր:

2018-19 ուստարում ՈՒՄՎ կողմից իրականացված գործունեության մասին զեկուցեց Ուսումնամեթոդական վարչության պետ Արկադի Դավթյանը: Նա մասնավորապես նշեց, որ ԵՊՀ ԻՄ-ի ուսումնամեթոդական վարչությունն իր գործունեությունն իրականացրել է ըստ հաստատված աշխատանքային պլանի, որը բխում է ԵՊՀ ԻՄ-ի՝ 2016-2020 թթ. զարգացման ռազմավարական ծրագրից:

Սահմանված ժամկետում վարչության կողմից, ըստ կրթական ծրագրերի չափորոշիչների, ստուգվել են թվով 8 կրթական ծրագրեր, դեռևս ընթացքի մեջ է «Դիզայն» կրթական ծրա­գիրը:

Ուսա­նող­ների տեղեկացվածությունն ապահովելու նպատակով լրամշակվել են առկա և հեռակա ուսուց­ման համակարգերի բակալավրի կրթական ծրագրով սովորող ուսանողների 2019-2023 թթ. և 2019-2024 թթ. համար նախատեսված «Կրեդիտային համա­կարգով ու­սումնառության ուղեցույց և դասըն­թաց­ների տեղեկագիրք» տեղեկատվական ձեռ­նարկ­ները: Ընթացքի մեջ են «Դեկորատիվ-կիրառական արվեստ» և «Դիզայն» կրթական ծրագրերը:

Ֆակուլտետների և մասնագիտական ամբիոնների հետ համատեղ «SuperVision YSU» հա­մակարգի միջոցով կազմվել են ուսում­նական պլանները, աշխատանքային ուսումնական պլանները, ամբիոնների ժամերի հաշվարկները, դասախոսների ուսում­նական բեռնվածությունները, ըստ ֆա­կուլ­տետների դասատախտակների համապա­տասխանելիությունը, ժամավճարային հի­մունք­ներով դասավանդող դասախոսների ժամերի հաշվարկները, առարկայական մուտքերի կատարողականի հաշվարկները:

Կազմվել են քննաշրջանի ամենօրյա ժամանակացույցներ: Ընթացիկ քննությունները և ամփոփիչ ատեստավորումը իրականացվել են տեսախցիկներով վերազինված 4 լսարան­ներում:

Շարունակվել են ուսանողական շարժի հաշվարկման և վերահսկման գործընթացները: Աշխատանքներ են տարվել սովորողների՝ ՀՀ զինված ուժերում ծառայելու, ազատման, տեղափոխման, վերականգնման, հիվանդությունների պատճառով տարկետ­ման, ինչպես նաև ուսումնական գործընթացին առնչվող այլ հրամանների ուղղությամբ:

Իրականացվել է ԵՊՀ ԻՄ ուսանողական նպաստների, պետական և ներբուհական կրթաթոշակների հատկացման գործընթացը՝ առաջնորդվելով գործող կանոնակարգով:

Ըստ մեկ ուսումնական տարվա առաջադիմության արդյունքների՝ պետության կողմից ուսման վարձավճարի լրիվ փոխհատուցմամբ  տրամադրվել է ուսանողական նպաստ 116 ուսանողի, կատարվել է ընդհանուր 17 փոխատեղում: Կրթաթոշակ է տրամադրվել 1-ին կիսամյակում 101 ուսանողի, 2-րդ կիսամյակում՝ 140 ուսանողի:

«Կրթության մասին» ՀՀ օրենքի համաձայն` բուհի վճարովի համակարգում սովո­րող ուսանողներին հատկացվել է ուսման վարձավճարի մասնակի փոխհատուցում, որից օգտվել են սոցիալապես անապահով 80 ուսանող, սահմանամեր­ձ համայնքի բնակիչ 225 ուսանող:

ԵՊՀ Իջևանի մասնաճյուղն իր ֆինանսական միջոցներից 2018-2019 ուստարվա կտրվածքով ուսանողական նպաստի ձևով տրամադրել է  100% փոխհատուցում 13 ուսանողի, կատարել  ուսման վարձավճարի 286 մասնակի փոխհատուցում (քառօրյա պատերազմի մասնակից 23 ուսանող, տնօրենի հայեցողությամբ՝ 140 ուսանող):

Հաշվետու ժամանակաշրջանում կազմակերպվել և իրականացվել են մանկավար­ժի որակավորման լրացուցիչ դասընթացներ՝ 5 կրթական ծրագրերով («Պատմություն», «Անգլերեն լեզու և գրականություն», «Ֆրանսերեն լեզու և գրականություն», «Հայոց լեզու և գրականություն», «Ինֆորմատիկա և կիրառական մաթեմատիկա»), որոնց մասնակցում է ԵՊՀ ԻՄ-ի 77 ուսանող  (II  կուրս՝ 45 ուսանող, III կուրս՝ 32 ուսանող), մասնակցելու համար դիմում-հայտ է ներկայացրել առաջին կուրսի 22 ուսանող:

Թե՛ առկա և թե՛ հեռակա ուսուցման համակարգերում առցանց եղանակով իրականացվել են դասավանդման որակի և արդյունավետության վերաբերյալ ուսանող­ների կիսամյակային հարցումները (ամփոփված են I կիսամյակի հարցումների արդյունքները, II կիսամյակի հարցումները դեռևս ընթացքի մեջ են), ինչպես նաև ԵՊՀ ԻՄ-ում ստացած կրթությունից բավարարվածության վերաբերյալ շրջանավարտների ամենամյա հարցումները:

Հաշվետու ուստարվա I կիսամյակի հարցումներին մասնակցել են մասնաճյուղի՝ առկա ուսուցման 342 ուսանողներ (ուսանողական հիմ­նական համակազմի 61.73 %-ը), հեռակա ուսուցման 347 ուսանողներ (ուսանողական հիմնական համակազմի 40.58 %-ը):

2018-2019 ուստարվա առկա և հեռակա ուսուցմամբ ամփոփիչ ատես­տա­վորումը մասնաճյուղում իրականացվել է հաստատված գրաֆիկի համաձայն սույն թվականի  մայիսի 18-ից մինչև հունիսի 23-ը, որի մասին հաշվետվությունը ներկայացվել է ԵՊՀ ԻՄ-ի գիտական խորհրդի նիստում:

Տվյալ ուստարում առկա և հեռակա ուսուցմամբ մասնաճյուղն ունեցել է ընդհանուր 377 շրջանավարտ, այդ թվում առկա ուսուցմամբ` 154 շրջա­նա­վարտ (38 անվճար, 116 վճարովի) և հեռակա ուսուցմամբ` 223 շրջանավարտ, որոնցից 6-ը նախորդ տարիներից:

Գերազանցության դիպլոմ ստացել է 22 շրջանա­վարտ­ (20 առկա, 2 հեռակա):

Առաջին փուլով մագիստրատուրա կրթական աստիճանում ուսումը շարունակելու համար հայտ է ներկայացրել 16 շրջանավարտ:

Հաշվետու ուստարում ևս ՀՀ ազգային վիճակագրական ծառայության Տավուշի մարզային գործակալությանն են ներկայացվել 3-ԳՄ ձևաչափերով հաշվետվությունները, որոնք ներառում են ուսանողների և շրջանավարտների վերաբերյալ տվյալներ, ինչպես նաև ԵՊՀ ԻՄ-ի պրոֆեսորադասախոսական կազմին առնչվող տեղեկատվություն: Ուսանողների առաջադիմության վերաբերյալ տվյալները, ըստ ուսուցման ձևերի՝ անվճար, վճարովի, ընդհանուր (ձև 34) և (ձև 10), ամփոփվել և ներկայացվել են ԵՊՀ:

Համաձայն ՈՒՄՎ ՄԿՊԿ բաժնի 2018-2019 ուստարվա աշխատանքային ուսումնական պլանի՝ բաժնի կողմից իրականացվել են 38 պրակտիկաներ (առկա ուսուցմամբ՝ 6 ուսումնական, 9 արտադրական /մանկավարժական/, 7 արտադրական, հեռակա ուսուցմամբ` 4 ուսումնական, 7 արտադրական, 5 արտադրական  /մանկավարժական/), որոնց մասնակցել են 831 ուսանողներ:

Ուսանողների պրակտի­կայի կազմակերպման մասին 39 պայմանագրերից 9-ը կնքվել է 2018-2019 ուստարում, բացի այդ՝ ձեռք է բերվել մեկ համաձայնագիր:

ՄԿՊԿ բաժնի կողմից իրականացվել է ԵՊՀ-ի կողմից կազմակերպված՝ 2019թ. դպրոցական օլիմպիադայի 1-ին փուլը, որին մարզի 34 հանրակրթական դպրոցներից մասնակցելու հայտ են ներկայացրել 268 աշակերտներ, մասնակցել՝ 235-ը: Օլիմպիադայի 2-րդ փուլ է անցել 27-ը, որոնցից 2-ը արժանացել է 3-րդ կարգի դիպլոմի, 18-ը՝ գովասանագրի:

2018-19 ուստարում Տավուշի և հարակից մարզերի  ավագ և միջնակարգ դպրոցներում և միջին մասնագիտական ուսումնական հաստատություներում ՄԿՊԿ բաժինն իրականացրել է մասնագիտական կողմնորոշման աշխատանքներ: ԵՊՀ ԻՄ կողմնորոշված դպրոցների շրջանավարտների թիվը (216, որից 200-ը՝ հստակ կողմնորոշված, 16-ը՝ մասնակի կողմնորոշված), համապատասխանում է ԵՊՀ ԻՄ-ի դիմորդների թվին:

Հաշվետու ժամանակահատվածում Ուսումնամեթոդական վարչության գործունեության վերաբերյալ ՈՒՄՎ պետի հաշվետվությունը տնօրենության նիստի ընթացքում ընդունվեց ի գիտություն, իսկ վարչության գործունեությունը գնահատվեց բավարար: 

 2019թ. հուլիսի 4-ին ԵՊՀ Իջևանի մասնաճյուղում Ա. Վ. Ցուցուլյանի նախագահությամբ կայացավ տնօրենության ընդլայնված նիստ, որին մասնակցում էին տնօրենության անդամները և բուհի աշխատակիցները:

Ընդլայնված նիստում քննարկվեցին ԵՊՀ ԻՄ-ի՝ 2019թ. (01.01.2019-01.07.2019)  եկամուտների և ծախսերի նախահաշվի (բյուջե) կատարողականին վերաբերող և մի քանի ընթացիկ հարցեր:

Մասնաճյուղի՝ 2019թ. եկամուտների և ծախսերի նախահաշվի (բյուջե) կատարողականի մասին զեկուցեց ԵՊՀ ԻՄ-ի տնօրենի պաշտոնակատար Ա. Վ. Ցուցուլյանը:

Նա մասնավորապես նշեց, որ 2019թ. հունվարից մինչև հուլիսի 1-ն ընկած ժամանակահատվածում ԵՊՀ ԻՄ-ի դրամական միջոցների մուտքերը կազմել են 258 մլն 166 հազար ՀՀ դրամ, որի 71%-ը գոյացել է ուսման վարձավճարներից, 15.84 %-ը՝ պետական ֆինանսավորումից:

Ընթացիկ ծախսերի  85%-ն ուղղվել է աշխատանքի վարձատրությանը և դրան հավասարեցված վճարումներին: Ուսանողներին տրամադրվող կրթաթոշակների ընդհանուր գումարը կազմել է մասնաճյուղի ծախսերի 2,4%-ը, կոմունալ վճարումները՝ 3,3 %-ը:

Պարոն Ցուցուլյանն անդրադարձավ ուսումնական և արտադրական պրակտիկաների կազմակերպման  և ֆինանսավորման, տարբեր վարչական ստորաբաժանումների համար նախատեսված բյուջետային ծախսերին՝ ստորաբաժանումների ղեկավարներին առաջարկելով տարեսկզբին ներկայացնել մյուս տարվա համար նախատեսվող ծրագրերի անհրաժեշտ ֆինանսական ծախսերը:

Տնօրենի պաշտոնակատարը նշեց նաև, որ ոչ տեղացի դասախոսների ուղևորափոխադրման հաճախականության ավելացմանը զուգընթաց մեծացել են գործուղումների ծախսերը:

Խոսելով տարվա ձեռքբերումների մասին՝ Ա. Վ. Ցուցուլյանն աշխատակիցներին շնորհակալություն հայտնեց համատեղ աշխատանքի համար, իսկ դասախոսական անձնակազմի ներկայացուցիչներին, հաշվի առնելով, որ հուլիսի 8-ից նրանք անցնում են հերթական արձակուրդի, մաղթեց արդյունավետ հանգիստ: 

 2019թ. հունիսի 25-ին ԵՊՀ Իջևանի մասնաճյուղում կայացավ տնօրենության ընդլայնված նիստ՝ Ա. Վ. Ցուցուլյանի նախագահությամբ:

Ընդլայնված նիստին մասնակցում էին ԵՊՀ ԻՄ-ի տնօրենության և  գրադարանային խորհրդի անդամները:

Նիստում քննարկվեցին ԵՊՀ ԻՄ-ի գրադարանի՝ 2018-2019 ուստարվա գործունեությանը վերաբերող և մի քանի ընթացիկ հարցեր:

ԵՊՀ ԻՄ-ի գրադարանի՝ 2018-2019 ուստարվա գործունեության մասին հաշվետվությամբ հանդես եկավ գրադարանի վարիչ Վլադիմիր Պողոսյանը:

Նախ Վ.Պողոսյանը ներկայացրեց հաշվետու ուստարում ԵՊՀ ԻՄ-ի գրադարանային ֆոնդի համալրման մասին՝ նշելով, որ 2019թ. հունիսի 25-ի դրությամբ գրադարանային ֆոնդում առկա է շուրջ 18.970 միավոր գրականություն, որից 1950 էլեկտրոնային գրականություն, ավելի քան 1200 գիտական ամսագրեր և ժողովածուներ, ավելի քան 70 քարտեզ, 15.550 հայերեն, անգլերեն, ֆրանսերեն և ռուսերեն գիտական, ուսումնական, ուսումնամեթոդական և գեղարվեստական գրականություն։ Վ.Պողոսյանը նշեց, որ հաշվետու ուստարում գրադարանային ֆոնդը համալրվել է ավելի քան 640 միավոր գրականությամբ, որից 116 միավոր գրականությունը՝ գնման միջոցով, իսկ ավելի քան 500-ը՝ նվիրատվությամբ։ Հաշվետու ուստարում գրադարանի աշխատակիցների և համալսարանական այլ ստարաբաժանումների աշխատակիցների ջանքերով իրականացվել են 3 գրքերի շնորհանդեսներ, 5-ից ավելի բաց դաս-քննարկումներ, հեղինակների և ընթերցասերների հետ հանդիպումներ։

Գրադարանի վարիչը շեշտեց, որ հաշվետու ուստարում գրադարանի աշխատակիցներն ունեցել են մասնագիտական աճ, մասնակցել են տարբեր աշխատաժողովների։ Օրինակ՝ 2018թ. նոյեմբերի 1-2-ին ԵՊՀ ԻՄ-ի գրադարանի վարիչը մասնակցել է ՀՀ գրողների միության Ծաղկաձորի ստեղծագործական տանը կայացած «Նորարար գրադարաններ 2018» աշխատաժողովին, 2018թ. հոկտեմբերի 7-11-ին Վ.Պողոսյանը մասնակցել է Ռուսաստանի Դաշնության Ղրիմի Ինքնավար Հանրապետությունում կազմակերպված՝ ԱՊՀ և Արևելյան Եվրոպայի երկրների երիտասարդ հասարակական գործիչների ու ռուսաց լեզու և գրականություն դասավանդողների գիտաճանաչողական միջազգային աշխատաժողովին։

Անդրադառնալով ԵՊՀ ԻՄ-ի էլեկտրոնային գրադարանին՝ Վ.Պողոսյանը շեշտեց, որ բավականին մատչելի են կայքի կառուցվածքը, բաժինները, գիրք փնտրելու սկզբունքները։ Նա նշեց, որ կայքում գրքերը տեղադրված են ըստ մասնագիտական ուղղվածության, աջ մասում տեղադրված են նոր հրատարակված գրքերը, ձախ մասի ստորին հատվածում՝ հիմնական մասնագիտական գրքերը։ Ս.թ. հունիսի 25-ի դրությամբ էլեկտրոնային գրադարանում առկա է 906 գիրք, գրանցվել է 2.159.969 այցելություն, 185.498 այցելու: Վերջին 20 օրերին արձանագրվել է 71.728 այցելություն, 8.625  այցելու։

Տնօրենության նիստում ԵՊՀ ԻՄ-ի գրադարանի՝ 2018-2019 ուստարվա գործունեությունը գնահատվեց բավարար։

Նիստի մասնակիցներն էլ հանդես եկան մասնաճյուղի գրադարանի բարելավմանն ուղղված առաջարկություններով, որոնք քննարկվեցին և արձանագրվեցին՝ դրանք հաշվի առնելու նպատակով։

Ընթացիկ հարցերից հատկանշական է ԵՊՀ ԻՄ-ից երկու ուսանողի հեռացնելու հարցը, որի վերաբերյալ զեկուցեց Ուսումնամեթոդական վարչության ուսումնական գործընթացի պլանավորման և վերահսկման բաժնի վարիչ Նաիրա Առուշանյանը:

Այդ հարցի կապակցությամբ որոշվեց՝

• Հիմք ընդունելով «ՀՀ ԲՈՒՀ-ի ուսանողների հեռացման (ազատման) և վերականգնման» կարգի III մասի 17-րդ կետը՝ Կիրառական արվեստի ֆակուլտետի «Դիզայն» մասնագիտության «Դիզայն» բակալավրի կրթական ծրագրի երկրորդ կուրսի (պայմանական հրամանագրված) ուսանողուհի Սրբուհի Արարատի Մաթևոսյանին հեռացնել մասնաճյուղից՝ մինչև 2018-2019 ուսումնական տարվա երկրորդ կիսամյակի քննաշրջանի սկիզբը ուսումնական պլանով առաջացած առարկայական տարբերությունը չհանձնելու պատճառով։
• Հիմք ընդունելով «ՀՀ ԲՈՒՀ-ի ուսանողների հեռացման (ազատման) և վերականգնման» կարգի III մասի 21-րդ կետը՝ Հեռակա ուսուցման բաժնի «Ընդհանուր մանկավարժություն» մասնագիտության «Տարրական մանկավարժություն և մեթոդիկա» բակալավրի կրթական ծրագրի առաջին կուրսի ուսանողուհի Անժիկ Գերասիմի Մովսիսյանին 2018-2019 ուսումնական տարվա երկրորդ կիսամյակից հեռացնել մասնաճյուղից՝ տարկետման ժամկետը լրանալու և սահմանված ժամկետում տարկետումից վերադառնալու դիմում չներկայացնելու պատճառով:

 2019թ. մայիսի 21-ին ԵՊՀ Իջևանի մասնաճյուղում կայացավ տնօրենության հերթական նիստը, որը նախագահում էր Ա. Վ. Ցուցուլյանը:

Տնօրենության նիստում քննարկվեցին 2018-19 ուստարվա II կիսամյակի քննաշրջանի նախապատրաստական աշխատանքներին, 2018-19 ուստարվա  I կիսամյակի ուսանողական հարցումների արդյունքներին, 2019թ. հեռակա ուսուցման ընդունելության մասնագիտությունների ցանկին վերաբերող և մի շարք ընթացիկ հարցեր:

2018-19 ուստարվա II կիսամյակի քննաշրջանի նախապատրաստական աշխատանքների մասին զեկուցեցին ֆակուլտետների դեկանները՝ մասնավորապես նշելով, որ կազմվել են ընթացիկ ստուգումների, ընթացիկ քննությունների և ամառային քննաշրջանի ժամանակացույցները, դրանք քննարկվել են դասախոսների և ուսանողների հետ, սահմանված ժամկետներում ներկայացվել ՈՒՄՎ, ծրարավորվել և կնքվել են ընթացիկ քննությունների տոմսերը, թեստերը և տարբերակները:

Նույն ուստարվա I կիսամյակի ուսանողական հարցումների արդյունքների վերաբերյալ դեկանները նշեցին, որ վերհանվել են խնդիրները, և ձեռնարկվել են համապատասխան քայլեր:

2019թ. հեռակա ուսուցման ընդունելության մասնագիտությունների ցանկը (ընդունելության քննությունները, տեղերը և վարձավճարների չափը) տնօրենության անդամների քննարկմանը ներկայացրեց Ուսումնամեթոդական վարչության պետ Ա.Դավթյանը: Այս հարցի կապակցությամբ նշվեց, որ շուրջ 5 տարի է «Հայոց լեզու և գրականություն» մասնագիտությամբ հեռակա ուսուցման համակարգում չի իրականացվել ընդունելություն: Աշխատաշուկայի պահանջների ուսումնասիրության հիման վրա առաջարկվեց 2019թ. մասնագիտությունների ցանկում ներառել «Հայոց լեզու և գրականություն» մասնագիտությունը, որը տնօրենության անդամների կողմից արժանացավ հավանության:  

 2019թ. մայիսի 3-ին ԵՊՀ Իջևանի մասնաճյուղում կայացավ տնօրենության հերթական նիստը՝ Ա. Վ. Ցուցուլյանի նախագահությամբ:

Տնօրենության նիստում ամփոփվեցին 2018-2019 ուսումնական տարվա II կիսամյակի առաջին ընթացիկ քննությունների և ստուգումների արդյունքները, որոնց մասին զեկուցեցին ֆակուլտետների դեկանների պաշտոնակատարները:

Հումանիտար գիտությունների ֆակուլտետի դեկանի պաշտոնակատարը մասնավորապես նշեց, որ 2019թ. ապրիլի 8-13-ը ֆակուլտետում կայացած ընթացիկ քննություններին և ստուգումներին մասնակցել է 200 ուսանող (IV կուրսի 74 ուսանող հանձնել է ավարտական քննություններ): Ընթացիկ քննությունների միջին ցուցանիշը 3,10 է (3,88՝ անվճար ուսուցման համակարգում սովորողների շրջանում), ընթացիկ ստուգումների միջին ցուցանիշը 6,63 է (8,65՝ անվճար ուսուցման համակարգում սովորողների շրջանում):

Տնտեսագիտության ֆակուլտետի դեկանի պաշտոնակատարը նշեց, որ ֆակուլտետում ընթացիկ քննություններին և ստուգումներին մասնակցել է 74 ուսանող («Ֆինանսներ», «Տնտեսագիտություն»՝ 49 ուսանող, «Զբոսաշրջություն, «Սերվիս»՝ 25 ուսանող), իսկ IV կուրսի 33 ուսանող հանձնել է հանրագումարային քննություններ: Ընթացիկ քննությունների միջին ցուցանիշը 2,68 է (3,77՝ անվճար ուսուցման համակարգում սովորողների շրջանում), ընթացիկ ստուգումների միջին ցուցանիշը 5,92 է (7,83՝ անվճար ուսուցման համակարգում սովորողների շրջանում):

Կիրառական արվեստի ֆակուլտետում ընթացիկ քննություններին և ստուգումներին մասնակցել է 46 ուսանող, IV կուրսի 16 ուսանող հանձնել է ավարտական քննություններ: Ֆակուլտետում ընդհանուր առաջադիմությունը կազմել է  90,3% (անցյալ տարվա համեմատ աճել է մոտ 8%-ով): Գնահատման պրոցեսին մասնակցել են նաև ամբիոնների վարիչները:

Բնական գիտությունների ֆակուլտետում քննությունների արդյունքների հիման վրա արձանագրվել է այս և նախորդ տարվա առաջադիմության համեմատական հետևյալ պատկերը.

 2017-18 ուստարի                                                  2018-19 ուստարի

1. «ԻԿՄ» I կուրս 88,8%                                   1. «ԻԿՄ» I կուրս   33%
2. «ԻԿՄ» II կուրս 85,7%                                  2. «ԻԿՄ» II կուրս  51,6%
3. «ԻԿՄ» III կուրս 84,5%                                 3. «ԻԿՄ» III կուրս  57,2%
4. «ՔԿԳ» II կուրս 85,2%                                  4. «ՔԿԳ» II կուրս    82,6%
5. «ՔԿԳ» III կուրս 90%                                    5. «ՔԿԳ» III կուրս   51,8%:

2018-2019 ուսումնական տարվա II կիսամյակի առաջին ընթացիկ քննությունների և ստուգումների արդյունքները տնօրենության նիստում գնահատվեցին բավարար:

Նիստի ընթացքում քննարկվեցին նաև 2018-19 ուստարվա II կիսամյակում (11.02.2019-03.04.2019) ուսանողների հաճախումներին վերաբերող  և մի քանի ընթացիկ հարցեր, որոնց վերաբերյալ զեկույցներն ընդունվեցին ի գիտություն: