2021թ. մարտի 27-ին տեղի ունեցավ ԵՊՀ ԻՄ-ի տնօրենության հերթական նիստը, որը նախագահում էր Ա.Մակարյանը:

Նիստի ընթացքում քննարկվեցին օրակարգով նախատեսված հետևյալ հարցերը.

1. 2020-2021 ուստարվա առկա և հեռակա ուսուցման համակարգերում ավարտական կուրսերի քննաշրջանի և ոչ ավարտական կուրսերի առաջին ընթացիկ քննությունների ու ստուգումների նախապատրաստական աշխատանքների մասին (զեկուցող՝ Ա.Դավթյան):
2. Հաղորդում առկա ուսուցման ավարտական աշխատանքների նախապաշտպանությունների անցկացման մասին (զեկուցողներ՝ Ա.Դավթյան, ֆակուլտետների դեկաններ):
3. Ընթացիկ հարցեր.
   • ԵՊՀ բակալավրի և մագիստրոսի կրթական ծրագրերի մասնագիտական դասընթացներում հետազոտական աշխատանքի կատարման կարգով հատկացվող միավորներում փոփոխություններ կատարելու առաջարկի մասին (զեկուցող՝ Ա.Մակարյան):
   • Պաշտոնների անձնագրերի վերանայման և հաստատման գործընթացի մասին (զեկուցող՝ Ա.Մակարյան):
   • Իջևանի համայնքապետարանի «Իջևան» անվանական կրթաթոշակին և Տավուշի թեմի կողմից տրամադրվող ակտիվության կրթաթոշակին հավակնող ուսանողների առաջադրման և ընտրության մասին (զեկուցող՝ Ա.Դավթյան):

Օրակարգի առաջին հարցի վերաբերյալ Ուսումնամեթոդական վարչության պետ Ա.Դավթյանը նշեց, որ առկա և հեռակա ուսուցման համակարգերում ավարտական կուրսերի քննաշրջանը կիրականացվի ըստ հաստատված ժամանակացույցի (առկա ուսուցման համակարգում՝ մարտի 29-ից ապրիլի 10-ը, հեռակա ուսուցման համակարգում՝ մարտի 29-ից ապրիլի 17-ը): Նա հավելեց, որ ֆակուլտետների դեկանները և Հեռակա ուսուցման բաժնի վարիչը ավարտական և ոչ ավարտական կուրսերի քննաշրջանների գրաֆիկները ներկայացրել են ՈՒՄՎ, դրանք ստուգվել և հետ են ուղարկվել:

Ա.Մակարյանը հանձնարարեց, որ նախքան քննություններն սկսելը ևս մեկ անգամ ստուգվեն հարցաշարերն ու տոմսերը:

Որոշվեց.

1. 2020-2021 ուստարվա առկա և հեռակա ուսուցման համակարգերում ավարտական կուրսերի քննաշրջանը և ոչ ավարտական կուրսերի առաջին ընթացիկ քննություններն ու ստուգումներն իրականացնել նախատեսված ժամանակացույցին համապատասխան՝ առցանց եղանակով, իսկ դասախոսների և ուսանողների համաձայնության դեպքում՝ առկա եղանակով (դեկանների կողմից նախապես ներկայացված զեկուցագրերի հիման վրա):
2. Նախքան ընթացիկ քննությունների և ստուգումների մեկնարկը ՈՒՄՎ ներկայացնել առկա ուսուցման համակարգում դասերի կատարողականը 8 շաբաթվա կտրվածքով:
3. Քննությունների տեղեկագրերը չսքանավորել առանց ուսանողների հետ գնահատականների քննարկման։

Երկրորդ հարցի կապակցությամբ ՈՒՄՎ պետ Ա.Դավթյանը նշեց, որ ավարտական աշխատանքների նախապաշտպանություններն անհրաժեշտ է իրականացնել մասնաճյուղի գիտական խորհրդի՝ 2020թ. դեկտեմբերի 25-ի №48 նիստով հաստատված՝ «Երևանի պետական համալսարանի Իջևանի մասնաճյուղում բակալավրի ավարտական աշխատանքի պատրաստման և գնահատման կարգ»-ին համապատասխան, այսինքն՝ պաշտպանությունից առնվազն 2 շաբաթ առաջ։ 2020-2021 ուստարվա II կիսամյակի ուսումնական գործընթացի կազմակերպման ժամանակացույցով նախատեսված է ամփոփիչ ատեստավորումները կազմակերպել 2021թ. մայիսի 3-29-ը, այսինքն՝ նախապաշտպանությունները պետք է սկսել ապրիլի 5-ից՝ պայմանավորված ամփոփիչ ատեստավորման օրով։ Ա.Դավթյանն առաջարկեց մինչև նախապաշտպանությունները մասնագիտական ամբիոններում կազմակերպել ավարտական աշխատանքների արդյունքների ամփոփում։

ԵՊՀ ԻՄ-ի տնօրենի պաշտոնակատար Ա.Մակարյանը նշեց, որ անկախ նրանից, թե ինչ տարբերակով կիրականացվի ամփոփիչ ատեստավորումը (առցանց, առկա), հարկավոր է պաշտպանությունից 5 օր առաջ հանձնաժողովների անդամներին ուղարկել ավարտական աշխատանքների ամբողջական փաթեթները (PDF տարբերակ, տեսասահիկ, ղեկավարի և գրախոսի կարծիքներ)։ Ամփոփիչ ատեստավորման հանձնաժողովների նախագահների հաստատումից անմիջապես հետո անհրաժեշտ է ձևավորել հանձնաժողովների կազմերը։

Որոշվեց.

1. Հանձնարարել ֆակուլտետների դեկաններին՝ հետևել, որպեսզի ավարտական աշխատանքների նախապաշտպանություններն իրականացվեն մասնաճյուղի գիտական խորհրդի՝ 2020թ. դեկտեմբերի 25-ի №48 նիստով հաստատված՝ Երևանի պետական համալսարանի Իջևանի մասնաճյուղում բակալավրի ավարտական աշխատանքի պատրաստման և գնահատման կարգին համապատասխան։
2. Հանձնարարել ամբիոնների վարիչներին շարունակել հետևողական լինել ավարտական աշխատանքների իրականացման ընթացքին։

Առաջին ընթացիկ հարցի վերաբերյալ ԵՊՀ ԻՄ-ի տնօրենի պաշտոնակատար Ա.Մակարյանը նշեց, որ ԵՊՀ բակալավրի և մագիստրոսի կրթական ծրագրերի մասնագիտական դասընթացներում հետազոտական աշխատանքի կատարման կարգով մասնաճյուղում ներդրվել է հետազոտական բաղադրիչ մասնագիտական առարկաներից։ Ըստ կարգի III մասի 9 կետի՝ դասընթացի շրջանակներում կատարված աշխատանքի արդյունքները հաշվի են առնվում տվյալ դասընթացի արդյունարար գնահատականում որպես 2-րդ ընթացիկ քննության գնահատական՝ եզրափակիչ գնահատումով դասընթացի դեպքում առավելագույն 5 միավոր արժեքով, իսկ առանց եզրափակիչ գնահատման դասընթացի դեպքում՝ 10 միավոր արժեքով։ Ա.Մակարյանը նշեց, որ I կիսամյակում հետազոտական բաղադրիչ պարունակող առարկաների գնահատման և կազմակերպման վերաբերյալ Կրթական բարեփոխումների և դասախոսների վերապատրաստման ու Մասնագիտական կրթության որակի ապահովման բաժինների կողմից համատեղ անցկացվել է հարցում դասախոսների և ուսանողների շրջանում։ Հարցման ընթացքում և՛ դասախոսները, և՛ ուսանողներն առաջ են քաշել այն հարցը, որ առանց եզրափակիչ գնահատման դասընթացի դեպքում դասընթացի երկրորդ մասը գնահատումից դուրս է մնում։ Դասախոսները և ուսանողներն առաջարկում են նմանատիպ մի մոտեցում՝ առանց եզրափակիչ գնահատման դասընթացում հետազոտական բաղադրիչին տալ 5 միավոր, մյուս 5 միավորը հատկացնել առարկայի երկրորդ մասին։

Որոշվեց՝ առաջարկել դասախոսներին փորձի կարգով որոշ առանց եզրափակիչ գնահատման դասընթացների համար կիրառել 5/5 մոտեցումը՝ 5 միավոր հատկացնել հետազոտական աշխատանքին, 5 միավոր՝ դասընթացի երկրորդ մասին։

Երկրորդ ընթացիկ հարցի մասին պարոն Մակարյանը նշեց, որ «Երևանի պետական համալսարան» հիմնադրամի պաշտոնի անձնագրերը կազմվում են բուհի իրավախորհրդատուի և համապատասխան բաժինների հետ համատեղ, հաստատվում են տնօրենի հրամանով։ Կորոնավիրուսային համավարակով պայմանավորված՝ աշխատողների մի մասն ունի առողջական խնդիրներ։ Բուհի աշխատանքը բնականոն շարունակելու նպատակով դրսից հրավիրվել են աշխատակիցներ (խոսքը վերաբերում է վարորդներին)։ Թեև մասնաճյուղում առկա է վարորդի մի քանի հաստիք, սակայն վարորդական իրավունքի կարգերը չեն համապատասխանում մեծ մարդատար տրանսպորտներ վարելու կարգին։ Այժմ դասերն իրականացվում են համակցված՝ առկա և առցանց եղանակներով, և դրսից եկող դասախոսներին տեղափոխելու խնդիր է առաջանում։ Ուստի ՏԳԿՍ բաժնի ղեկավարը առաջարկ է ներկայացրել վարորդի պաշտոնի անձնագրում կատարել որոշակի փոփոխություններ՝ հետագայում խնդիրներից խուսափելու նպատակով։

Որոշվեց՝ հանձնարարել իրավախորհրդատուին վարորդի պաշտոնի անձնագրում պարտադիր դարձնել D կարգի պահանջը, իսկ ՏԳԿՍ բաժնի ղեկավարին՝ հետևողական լինել, որ ամեն տարի վարորդներն անցնեն բժշկական բուժզննում՝ օտվելով ԵՊՀ ԻՄ-ի առողջապահական ապահովագրությունից։

Երրորդ ընթացիկ հարցի վերաբերյալ Ա.Դավթյանը նշեց, որ ֆակուլտետների դեկանները և Հեռակա ուսուցման բաժնի վարիչը «Իջևան» անվանական կրթաթոշակի համար ներկայացրել էին հավակնորդ ուսանողների թեկնածությունները՝ առաջնորդվելով Երևանի պետական համալսարանի Իջևանի մասնաճյուղի ուսանողական նպաստների, պետական և ներբուհական կրթաթոշակների հատկացման կանոնակարգի 4-րդ կետի դրույթներով: «Իջևան» անվանական կրթաթոշակի համար առաջադրված թեկնածուներից ընտրվեց հեռակա ուսուցման համակարգի «Բնապահպանություն և բնօգտագործում» մասնագիտության 3-րդ կուրսի ուսանողուհի Լուսինե Գառնիկի Դավթյանը, ով վերջին չորս կիսամյակի ընթացքում ցուցաբերել է գերազանց առաջադիմություն (ՄՈԳ-ը 18-ից բարձր է) և ունի հասարակական բարձր ակտիվություն։

Տավուշի թեմի կողմից տրամադրվող ակտիվության կրթաթոշակի կապակցությամբ Ա.Դավթյանը նշեց, որ ԵՊՀ ԻՄ-ի ուսանողական խորհրդի №8 նիստում (12.12.2020թ.) որոշում է կայացվել ուսանողական կառույցների սահմանած ակտիվության սանդղակի համաձայն՝ կրթաթոշակը տրամադրել Հումանիտար գիտությունների ֆակուլտետի «Հոգեբանություն» մասնագիտության 2-րդ կուրսի ուսանողուհի Հրաչուհի Հրաչիկի Թամամյանին։

Որոշվեց.

1. «Իջևան» անվանական կրթաթոշակը տրամադրել հեռակա ուսուցման համակարգի «Բնապահպանություն և բնօգտագործում» մասնագիտության 3-րդ կուրսի ուսանողուհի Լուսինե Գառնիկի Դավթյանին։
2. Տավուշի թեմի ակտիվության կրթաթոշակը տրամադրել Հումանիտար գիտությունների ֆակուլտետի «Հոգեբանություն» մասնագիտության 2-րդ կուրսի ուսանողուհի Հրաչուհի Հրաչիկի Թամամյանին։

Նիստի ընթացքում Կիրառական արվեստի ֆակուլտետի դեկանի ԺՊ Վ.Աղաբաբյանը ներկայացրեց ԵՊՀ ռեկտորի հրամանը, ըստ որի, պայմանավորված համավարակի թվերի աճով, դպրոցական օլիմպիադան չի իրականանալու, քանի որ ոչ բոլոր ուսումնական հաստատություններն են ի վիճակի ապահովել հակահամաճարակային բոլոր պայմանները։

Գլխավոր հաշվապահ Մ.Մխիթարյանն ադրադարձավ ուսման վճարների մուծման դինամիկային։ Նա նշեց, որ ընդհանուր առմամբ ուսման վարձերը վճարվում են, սակայն առկա ուսուցման 8 և հեռակա ուսուցման 3 ուսանողներ դեռևս առաջին կիսամյակից ունեն ուսման վճարների պարտք։ Այդ ուսանողները հիմնականում Արցախի մարտական գործողությունների մասնակիցներ են, և նրանց ուսման վճարները փոխհատուցելու է պետությունը։

2021թ. մարտի 12-ին տեղի ունեցավ ԵՊՀ ԻՄ-ի տնօրենության հերթական նիստը՝ Ա.Մակարյանի նախագահությամբ:

Նիստում քննարկվեցին օրակարգով նախատեսված հետևյալ հարցերը.

1. 2020-2021 ուստարվա առկա ուսուցման 2-րդ կիսամյակում ուսանողների հաճախելիության մասին (զեկուցողներ՝ ֆակուլտետների դեկաններ):
2. Հաղորդում ուսանողների՝ մինչև 12 կրեդիտ կուտակած ակադեմիական պարտքերի վերահանձնման գործընթացի մասին (զեկուցող՝ Ն.Առուշանյան):
3. 2020-2021 ուստարվա առկա ուսուցման առաջին կիսամյակի քննաշրջանի ամփոփում (զեկուցող՝ Ա.Դավթյան):
4. Ընթացիկ հարցեր.

4.1. Հեռակա ուսուցման համակարգում ուսանողների իրավունքների վերականգնման հարցը (զեկուցող՝ Ա.Դավթյան):

4.2. Հաղորդում ԵՊՀ-ի հետ համատեղ Տավուշի մարզի դպրոցների ավարտական դասարանների աշա­կերտ­ների համար հանրակրթական տարբեր առարկաների գծով ամե­նամյա օլիմպիա­դայի կազմակերպման ընթացքի մասին (զեկուցող՝ Վ.Աղաբաբյան):

4.3. Հաղորդում պրակտիկաների (արտադրական, ուսումնական, մանկավարժական) կազմակերպման ընթացքի մասին (զեկուցող՝ Լ.Բեգինյան):

4.4. Իջևան քաղաքի անվանական կրթաթոշակ նշանակելու մասին (զեկուցող՝ Ա.Եգանյան):

Օրակարգի առաջին հարցի կապակցությամբ ֆակուլտետների դեկանները ներկայացրին 2020-21 ուստարվա 2-րդ կիսամյակի դասերին ուսանողների մասնակցության ընդհանուր վիճակը (մեկ ամսվա կտրվածքով): Նրանք նշեցին, որ ընդհանուր առմամբ 2020-2021 ուստարվա առկա ուսուցման 2-րդ կիսամյակում ուսանողների հաճախելիությունը բավարար է: Սակայն բոլոր ֆակուլտետներում էլ առկա են ուսանողներ, ովքեր ունեն 40 և ավել ժամ բացակայություններ, ընդ որում՝ մի մասը հարգելի, մյուս մասը՝ անհարգելի: Դեկանները զեկուցեցին, որ անհարգելի բացակայած ուսանողներին տրվել են նկատողություններ: 

Որոշվեց՝ ֆակուլտետների դեկաններին հանձնարարել, առաջնորդվելով «Երևանի պետական համալսարան» հիմնադրամի Իջևանի մասնաճյուղի ներքին կարգապահական կանոններ»-ի 10-րդ կետի դրույթներով, պատասխանատվության ենթարկել ուսումնական կարգապահությունը խախտած ուսանողներին:  

Երկրորդ հարցի վերաբերյալ զեկուցող Ն.Առուշանյանը նշեց, որ 2020-2021 ուստարվա 1-ին կիսամյակում ունեցել ենք 12 կրեդիտ կուտակած 44 ուսանող, որից 5-ը՝ առկա, 39-ը՝ հեռակա ուսուցման համակարգում: 44 ուսանողից 22-ն ուներ ակադեմիական պարտքերը մարելու վերջին հնարավորություն: Հեռակա ուսուցման համակարգի 17 ուսանողից 16-ը դիմել է վերահանձնելու համար, պարտքերը մարել է 15 ուսանող: Առկա ուսուցման համակարգի 4 ուսանող պիտի դիմեր վերահանձնելու համար, դիմել և պարտքերը մարել է 3 ուսանող: Վերոնշյալից ելնելով՝ վերահանձնման համար չդիմելու և ակադեմիական պարտքերը չմարելու պատճառով 3 ուսանող ենթակա է հեռացման:    

 Որոշվեց՝ Ն.Առուշանյանի հաղորդումն ընդունել ի գիտություն:

Երրորդ հարցի մասին  զեկուցող Ա.Դավթյանը նշեց, որ 2020-2021 ուստարվա առկա ուսուցման առաջին կիսամյակի քննաշրջանն իրականացվել է ըստ նախատեսված ժամանակացույցի: Քննաշրջանի արդյունքների համաձայն՝ ԵՊՀ Իջևանի մասնաճյուղից հեռացվել է 6 ուսանող, իսկ 7 ուսանող կուտակել է կրեդիտ՝ ակադեմիական պարտք: Ըստ այդմ՝ կազմվել է 34 ձևին համապատասխան հաշվետվություն՝ ՀՀ կրթության, գիտության, մշակույթի և սպորտի նախարարություն ներկայացնելու համար:

Որոշվեց՝ Ա.Դավթյանի հաղորդումն ընդունել ի գիտություն:

Առաջին ընթացիկ հարցի՝ հեռակա ուսուցման համակարգում ուսանողների իրավունքների վերականգնման մասին դարձյալ զեկուցեց Ուսումնամեթոդական վարչության պետ Ա.Դավթյանը: Նա ներկայացրեց, որ ԵՊՀ ԻՄ-ի հեռակա ուսուցման համակարգի «Տնտեսագիտություն» մասնագիտության 4-րդ կուրսի ուսանող Արթուր Արգիշտի Սիմոնյանը դիմել է ուսանողական իրավունքները վերականգնելու համար:

Նա նշեց, որ Ուսումնամեթոդական վարչության կողմից ստուգվել է ուսանողի ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին (17.12.2018, N 1676 -Ն), և դրանք բավարարում են վերոնշյալ կարգի III մասի կետերին:

Որոշվեց՝ «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգի III մասի կետերին համապատասխան՝ թույլատրել վերականգնել ԵՊՀ ԻՄ-ի հեռակա ուսուցման համակարգի ուսանող Արթուր Արգիշտի Սիմոնյանի ուսանողական իրավունքները «Ֆինանսներ» մասնագիտությունում 2021-2022 ուստարվա 1-ին կիսամյակում:

Երկրորդ ընթացիկ հարցի վերաբերյալ զեկուցող Վ.Աղաբաբյանը նշեց, որ Մայր բուհից տեղեկացրել են ԵՊՀ օլիմպիադայի 1-ին փուլի հետաձգման  մասին: Այն պիտի կայանար 2021թ. մարտի 13-ին, սակայն ՀՀ-ում եղանակի անբարենպաստ պայմանների պատճառով անորոշ ժամանակով հետաձգվել է: Օլիմպիադայի անցկացման օրը ԵՊՀ-ից լրացուցիչ կհայտնեն:

Որոշվեց՝ Վ.Աղաբաբյանի հաղորդումն ընդունել ի գիտություն:

Երրորդ ընթացիկ հարցի կապակցությամբ զեկուցող Լ.Բեգինյանը նշեց, որ 2020-2021 ուստարվա 2-րդ կիսամյակի ընթացում նախատեսված է իրականացնել 17 պրակտիկա, որից 9-ը՝ առկա, 8-ը՝ հեռակա ուսուցման համակարգում (7-ը՝ բակալավրում, 1-ը՝ մագիստրատուրայում): Առկա ուսուցման համակարգում պրակտիկաներն անցկացվել են առկա և առցանց եղանակներով, իսկ հեռակա ուսուցման համակարգի պրակտիկաներն, ըստ ժամանակացույցի, կմեկնարկեն ապրիլից: Պրակտիկաների մի մասը նախատեսված է իրականացնել մշակված երթուղիներով, որոնք ընդգրկում են Տավուշի, Լոռու, Արագածոտնի, Վայոց ձորի մարզերը և մայրաքաղաք Երևանը:

Մինչհամալսարանական կրթության և պրակտիկաների կազմակերպման բաժնին հանձնարարվեց հետևել պրակտիկաների պատշաճ իրականացմանը, մշակել վերահսկողության արդյունավետ մեխանիզմներ՝ պրակտիկաներին ուսանողների լիարժեք մասնակցությունն  ապահովելու համար:

Որոշվեց՝ Լ.Բեգինյանի հաղորդումն ընդունել ի գիտություն:

Չորրորդ ընթացիկ հարցի մասին զեկուցեց Արտաքին կապերի բաժնի վարիչ Ա.Եգանյանը: Նա տնօրենության անդամներին ներկայացրեց, որ Իջևան համայնքի ավագանու՝ 2021թ. մարտի 4-ի նիստում քննարկվել և հավանության է արժանացել ԵՊՀ ԻՄ-ի ուսանողներից մեկին Իջևան քաղաքի անվանական կրթաթոշակ նշանակելու մասին հարցը: Զեկուցողը նշեց, որ Իջևանի համայնքապետարանը Իջևան քաղաքի անվանական կրթաթոշակ տրամադրելու կարգն ու պայմանները թողել է ԵՊՀ ԻՄ-ի հայեցողությանը:

Որոշվեց՝ հանձնարարել ֆակուլտետների դեկաններին տնօրենության առաջիկա նիստի քննարկմանը ներկայացնել Իջևան քաղաքի անվանական կրթաթոշակին հավակնող ուսանողների թեկնածությունները՝ առաջնորդվելով Երևանի պետական համալսարանի Իջևանի մասնաճյուղի ուսանողական նպաստների, պետական և ներբուհական կրթաթոշակների հատկացման կանոնակարգով:

2021թ. փետրվարի 27-ին տեղի ունեցավ ԵՊՀ ԻՄ-ի տնօրենության հերթական նիստը, որը նախագահում էր Ա.Մակարյանը:

Նիստում քննարկվեցին օրակարգով նախատեսված հետևյալ հարցերը.

1. ԵՊՀ ԻՄ-ի կառուցվածքային ստորաբաժանումների աշխատանքները և ուսումնական գործընթացն առկա ձևով կազմակերպելու մասին (զեկուցող՝ Ա.Մակարյան):
2. Հաղորդում հեռակա ուսուցման բակալավրի և մագիստրատուրայի՝ 2020-2021 ուսումնական տարվա երկրորդ կիսամյակի ուսումնական պարապմունքների կազմակերպման մասին (զեկուցող՝ Մ. Զուրաբյան):
3. Ընթացիկ հարցեր:

Առաջին հարցի կապակցությամբ ԵՊՀ ԻՄ-ի տնօրենի պաշտոնակատար Ա.Մակարյանը ներկայացրեց ԵՊՀ ռեկտորի պաշտոնակատար Գ.Գևորգյանի հրամանը (25.02.2021, թիվ 34/80), ըստ որի՝ մարտի 15-ից ԵՊՀ-ի բոլոր կրթական ծրագրերով ուսումնական գործընթացը պետք է իրականացվի առկա ձևով՝ պահպանելով հակահամաճարակային կանոնները: ԵՊՀ-ի կառուցվածքային ստորաբաժանումների ղեկավարները մարտի 15-ից պետք է ապահովեն իրենց ստորաբաժանումների բնականոն աշխատանքը՝ պահպանելով ԵՊՀ-ի ներքին կարգապահական կանոններով հաստատված աշխատաժամանակի ռեժիմը: Կորոնավիրուսային հիանդության տարածման կանխարգելման նպատակով կրթական ծրագրեր իրականացնող ստորաբաժանումներում կիրառվող հակահամաճարակային կանոնների պահպանման նկատմամբ հսկողությունը պետք է վերապահվի համապատասխան ստորաբաժանումների ղեկավարներին:

Ա.Մակարյանը նշեց, որ, ըստ էության, 2020թ. սեպտեմբերից ստորաբաժանումներն իրենց գործունեությունը հիմնականում իրականացնում են ԵՊՀ ԻՄ-ի ներքին կարգապահական կանոններով հաստատված աշխատաժամանակով՝ պահպանելով հակահամաճարակային կանոնները: Ինչ վերաբերում է դասերն ամբողջությամբ առկա ձևով իրականցնելուն, ապա ԵՊՀ ԻՄ-ի ֆակուլտետները Ուսումնամեթոդական վարչության հետ համատեղ արդեն սկսել էին համապատասխան դասացուցակների կազմումը, քանի որ նախատեսված էր առկա ձևով դասերն սկսել ապրիլի 1-ից:

Այս հարցի մասին արտահայտվեցին տնօրենության անդամները: Մ.Զուրաբյանը մասնավորապես նշեց, որ մարդկանց հոսքը դեպի մասնաճյուղ բավականին մեծ է լինելու, ուստի անհրաժեշտ է առավել ուժեղացնել հսկողությունը հակահամաճարակային կանոնների պահպանման նկատմամբ: Բացի այդ, նախնական խոսակցությունները երևանաբնակ դասախոսների հետ ցույց են տալիս, որ կա լուրջ խնդիր դասացուցակների համաձայնեցման տեսակետից: Վերոնշյալից ելնելով՝ նա առաջարկեց դասերը սկսել մեկ շաբաթ ուշ, իսկ հեռակա ուսուցման բակալավրի և մագիստրատուրայի դասերը հնարավորության դեպքում իրականացնել առցանց: Մ.Զաքարյանը նշեց, որ ապրիլին ավարտված է լինելու ավարտական 4-րդ կուրսերի դասապրոցեսը, և Երևանից եկող դասախոսների մոտ այլևս ծանրաբեռնվածության խնդիր չէր լինի, հնարավոր էր ամբողջությամբ դասերն իրականացնել առկա, սակայն մարտի 15-ից սկսելու դեպքում խնդիր է առաջանում:

Ա.Մակարյանը նշեց, որ ցանկալի կլիներ ավարտական կուրսերի դասերը կազմակերպել առկա եղանակով, բայց քանի որ կա խնդիր՝ կուտակումների և դասախոսների ծանրաբեռնվածությունների հետ կապված, ուստի նպատակահարմար է այդ կուրսերի դասերը կազմակերպել առկա և առցանց ձևերի համադրությամբ:

Որոշվեց.

1. Հաշվի առնելով վերոնշյալ խնդիրները՝ ԵՊՀ ԻՄ-ում դասերն առկա եղանակով սկսել մեկ շաբաթ ուշ՝ մարտի 23-ին:
2. Հեռակա ուսուցման բակալավրի և մագիստրատուրայի դասերն իրականացնել մարտի 9-ից առցանց եղանակով, ընթացիկ քննություններն ու ստուգումները՝ առկա եղանակով:
3. Ավարտական 4-րդ կուրսերի դասերն իրականցնել առկա և առցանց եղանակների համադրմամբ:
4. ԵՊՀ ԻՄ-ի կառուցվածքային ստորաբաժանումների ղեկավարներին հանձնարարել մարտի 16-ից ապահովել իրենց ստորաբաժանումների բնականոն աշխատանքը՝ ըստ ԵՊՀ ԻՄ-ի ներքին կարգապահական կանոններով հաստատված աշխատաժամանակի:

Երկրորդ հարցի՝ հեռակա ուսուցման բակալավրի և մագիստրատուրայի՝ 2020-2021 ուստարվա երկրորդ կիսամյակի ուսումնական պարապմունքների կազմակերպման վերաբերյալ Հեռակա ուսուցման բաժնի վարիչ Մ.Զուրաբյանը նշեց, որ մարտի 9-ից սկսվելու են հեռակա ուսուցման դասերը: Արդեն կազմված են դասացուցակները, որոնք ներկայացվել են Ուսումնամեթոդական վարչություն, որոշակի շտկումներից հետո դրանք կհաստատվեն և կուղարկվեն  դասախոսներին և ուսանողներին, կտեղադրվեն նաև ԵՊՀ ԻՄ-ի կայքէջում: Մ.Զուրաբյանը նաև նշեց, որ առաջին կիսամյակի լուծարքային շրջանը սկսվելու է մարտի 1-ից:

Հեռակա ուսուցման բաժնի մագիստրատուրայի՝ 2020-2021 ուստարվա առաջին կիսամյակի վերաբերյալ հեռակա ուսուցման մագիստրատուրայի «Դպրոցական մանկավարժություն և մեթոդիկա»  կրթական ծրագրի համակարգող Ա.Մարգարյանը նշեց, որ ավարտվել է առաջին կիսամյակը, 25 ուսանողներից ոչ մեկը ակադեմիական պարտք չունի, գնահատականները հիմնականում տատանվում են 14-19-ի միջակայքում, կան նաև 20 միավոր ստացած ուսանողներ: Առաջադիմությունը եղել է 100%, ունենք գերազանց (ՄՈԳ-ով) առաջադիմությամբ 13 ուսանող: Ուսման վճարներն այս պահին հիմնականում վճարված են:

Երկրորդ կիսամյակի դասացուցակն արդեն պատրաստ է՝ հարմարեցրած Zoom հարթակին, սակայն կա որոշակի շտկումների կարիք: Փետրվարի 23-ին կազմակերպվել է ուսանողների հետ հանդիպում, որի ընթացքում քննարկվել են դասերի արդյունավետ կազմակերպմանը վերաբերող հարցեր, վերհանվել են խնդիրներն ու դիտարկվել դրանց լուծման ուղիները: Նախատեսվում է մարտի 3-ին իրականացնել հանդիպում մագիստրոսական թեզերի ղեկավարների հետ՝ թեզի պատրաստման և գնահատման կարգը քննարկելու նպատակով:

Որոշվեց՝ հեռակա ուսուցման բակալավրի և մագիստրատուրայի՝ 2020-2021 ուստարվա երկրորդ կիսամյակի ուսումնական պարապմունքները սկսել՝ համաձայն նախատեսված ժամանակացույցների:

Ընթացիկ հարցերից էր ուսանողական իրավունքների վերականգնման մասին հարցը, որի մասին զեկուցեց Ուսումնամեթոդական վարչության պետ Ա.Դավթյանը: Նա ներկայացրեց, որ ԵՊՀ ԻՄ-ի հեռակա ուսուցման համակարգի «Բնապահպանություն և բնօգտագործում» կրթական ծրագրի 2-րդ կուրսի ուսանող Պավել Մհերի Զուրաբյանը դիմել է 2020-2021 ուստարվա 2-րդ կիսամյակում համապատասխան մասնագիտությամբ իր ուսանողական իրավունքները վերականգնելու համար: Նա նշեց, որ Ուսումնամեթոդական վարչության կողմից ստուգվել է ուսանողի ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման» կարգին (17.12.2018, N 1676 -Ն), և դրանք բավարարում են վերոնշյալ կարգի III մասի կետերին:

Որոշվեց՝ վերոնշյալ կարգի III մասի կետերին համապատասխան՝ վերականգնել ԵՊՀ ԻՄ-ի հեռակա ուսուցման համակարգի ուսանող Պավել Մհերի Զուրաբյանի ուսանողական իրավունքները 2020-2021 ուստարվա 2-րդ կիսամյակում:

ԱԿԻԱ բաժնի վարիչի պաշտոնակատար Վ.Եգանյանը նշեց, որ ՈՒՄՎ աշխատակիցները դիմել են ԱԿԻԱ բաժնին՝ աշխատաժամանակի վերաբերյալ տրամադրելու մանրամասն տեղեկատվություն՝ ըստ իրենց դրույքաչափերի:

Իրավախորհրդատու Ն.Նազարյանը նշեց, որ աշխատանքային օրենսգրքի և մասնաճյուղի կանոնադրության ու ներքին կարգապահական կանոնների համաձայն՝ միայն տոն և հիշատակի օրերի նախօրյակին է թույլատրվում աշխատանքն ավարտել մեկ ժամ շուտ, ազատ օրերին նախորդող օրն աշխատանքն իրականացվում է ամբողջական աշխատաժամանակով:

Որոշվեց՝ ԵՊՀ ԻՄ-ի բոլոր աշխատակիցներին տրամադրել իրենց աշխատաժամանակի վերաբերյալ տեղեկատվություն՝ ըստ իրենց դրույքաչափերի:

2021թ. փետրվարի 16-ին տեղի ունեցավ ԵՊՀ ԻՄ-ի տնօրենության հերթական նիստը, որը նախագահում էր Ա.Մակարյանը:

Նիստում քննարկվեցին օրակարգով նախատեսված հետևյալ հարցերը.

1. 2020-2021 ուստարվա առաջին կիսամյակի առկա քննաշրջանի ամփոփում:
2. Հաղորդում ավարտական աշխատանքների կատարման ընթացքի մասին:
3. 2021թ. բակալավրի կրթական ծրագրով առկա և հեռակա ուսուցման ամփոփիչ ատեստավորման հանձնաժողովների նախագահների թեկնածությունների հարցի քննարկում:
4. Անվանական կրթաթոշակի ներկայացվող ուսանողների հարցի քննարկում:
5. Ընթացիկ հարցեր.

5.1. ԵՊՀ  ԻՄ-ի  2021թ. բակալավրի կրթական ծրագրերի վերանայման ընթացքի մասին:

5.2. Առկա և հեռակա ուսուցման համակարգերում ուսանողների իրավունքների վերականգնման ընթացքի մասին:

5․3. ԵՊՀ ԻՄ-ի ստորաբաժանումների աշխատանքային պլանների կազմման ընթացքի մասին:

Առաջին հարցի վերաբերյալ զեկուցեց Ուսումնամեթոդական վարչության պետ Ա.Դավթյանը՝ մասնավորապես նշելով, որ 2020-2021 ուստարվա 1-ին կիսամյակի առկա ուսուցման քննաշրջանն իրականացվել է ըստ նախատեսված ժամանակացույցի՝ հունվարի 11-30-ը, ուսանողների կողմից քննությունների արդյունքների բողոքարկումներ չեն եղել: 1-ին քննաշրջանի արդյունքում ամենաբարձր առաջադիմություն ցուցաբերել են հումանիտար գիտությունների ֆակուլտետի ուսանողները (82,2%), իսկ ամենացածրը՝ բնագիտական ֆակուլտետի ուսանողները (46,6%)։ Միջին առաջադիմությունը մասնաճյուղում կազմել է 76.7%:

Որոշվեց 2020-2021 ուստարվա առաջին կիսամյակի առկա քննաշրջանի ամփոփման մասին ԵՊՀ ԻՄ-ի ՈՒՄՎ պետ Ա.Դավթյանի հաղորդումն ընդունել ի գիտություն:

Երկրորդ հարցի վերաբերյալ զեկուցեցին ֆակուլտետների դեկանները և Հեռակա ուսուցման բաժնի վարիչը: Նրանք մասնավորապես նշեցին, որ բոլոր ուսանողներն արդեն ընտրել են ավարտական աշխատանքների թեմաները, հիմնական մասը ղեկավարներից ստացել է գրականության ցանկը և աշխատանքի պլանը:

Պարոն Մակարյանը նշեց, որ միայն Բնական գիտությունների ֆակուլտետում են կազմվել ավարտական աշխատանքների անոտացիաներ, որտեղ նկարագրվում են ուսանողի առջև դրվող խնդիրները և աշխատանքի ավարտին սպասվող արդյունքները: Հետագայում մյուս ֆակուլտետները ևս պետք է ներդնեն այդ դրական փորձը, քանի որ անոտացիաները թույլ են տալիս բովանդակային առումով հետևել ավարտական աշխատանքների կատարմանը: Տնօրենը նշեց, որ դեկանները պարբերաբար կապի մեջ լինեն ամբիոնների վարիչների հետ, ամբիոններից ստանան ավարտական աշխատանքների իրականացման մասին տեղեկատվություն և հետևեն դրանց ընթացքին:

Որոշվեց.

1. Հանձնարարել ֆակուլտետների դեկաններին հետևելու ավարտական աշխատանքների կատարման ընթացքին՝ առաջնորդվելով «ԵՊՀ Իջևանի մասնաճյուղում բակալավրի ավարտական աշխատանքի պատրաստման և գնահատման կարգ»-ով (25.12.2020թ., 48/6 նիստի որոշում):
2. Հանձնարարել Հեռակա ուսուցման բաժնի վարիչին մինչև 2021թ. փետրվարի 20-ը ՈՒՄՎ և տնօրենին ներկայացնել ամփոփ տեղեկատվություն հեռակա ուսուցման համակարգի ավարտական աշխատանքների կատարման ընթացքի մասին:

Երրորդ հարցի վերաբերյալ զեկուցեց ԵՊՀ ԻՄ-ի տնօրենի պաշտոնակատար Ա.Մակարյանը: Նա մասնավորապես նշեց, որ «Բակալավրի կրթական ծրագրով առկա և հեռակա ուսուցման 2020-2021 ուստարվա երկրորդ կիսամյակի ուսումնական գործընթացների կազմակերպման ժամանակացույց»-ի համաձայն՝ մինչև փետրվարի 23-ը պետք է ներկայացնել ամփոփիչ ատեստավորման նախագահների թեկնածությունները: Ա.Մակարյանը շեշտեց, որ այս հարցում առաջնորդվելու ենք «ՀՀ բարձրագույն մասնագիտական կրթական ծրագրեր իրականացնող հաստատությունների շրջանավարտների ամփոփիչ ատեստավորման կարգ»-ով, որի 3.7 դրույթի համաձայն՝ ամփոփիչ ատեստավորման նախագահ կարող է լինել համապատասխան ոլորտի (բնագավառի) գործընկեր կազմակերպությունների, գերատեսչությունների, ակադեմիական հաստատությունների գիտական աստիճան և / կամ կոչում ունեցող մասնագետներից, ովքեր տվյալ հաստատության աշխատողներ չեն և նախորդող երեք տարիների ընթացքում չեն եղել ամփոփիչ ատեստավորման հանձնաժողովի նախագահ:

Դեկանները նշեցին, որ ամբիոնների վարիչներն արդեն ունեն հանձնաժողովների նախագահների թեկնածուներ և բանակցություններ են վարում նրանց հետ:

Որոշվեց հանձնարարել դեկաններին մինչև փետրվարի 23-ը տնօրենին ներկայացնել 2021թ. ամփոփիչ ատեստավորման հանձնաժողովների նախագահների թեկնածությունները:

Չորրորդ հարցի վերաբերյալ զեկուցեց Ուսումնամեթոդական վարչության պետ Ա.Դավթյանը: Նա նախ ներկայացրեց ՀՀ ՊՆ կողմից հատկացվող «Վազգեն Սարգսյան» և «Մոնթե Մելքոնյան» անվանական կրթաթոշակներին հավակնող ուսանողներին, ովքեր աչքի են ընկնում բարձր առաջադիմությամբ և  հասարակական ակտիվ գործունեությամբ.

1. Մետաքսե Սարգսի Մելյան – «Դիզայն» մասանգիտության 3-րդ կուրս («Վազգեն Սարգսյան» անվանական կրթաթոշակ),
2. Արայիկ Գառնիկի Շահնազարյան – «Ինֆորմատիկա և կիրառական մաթեմատիկա» 4-րդ կուրս («Մոնթե Մելքոնյան» անվանական կրթաթոշակ):

2020-2021 ուստարվա երկրորդ կիսամյակում անվանական կրթաթոշակ
 ստացող ուսանողների վերբերյալ Ա.Դավթյանը նշեց, որ ֆակուլտետները ներկայացրել են բարձր առաջադիմություն ունեցող ուսանողների ցանկը, իսկ ԵՊՀ անվանական կրթաթոշակի համար առաջադրվել էր երեք ուսանող՝ Լաուրա Խաժակի Ուլիխանյանը («Զբոսաշրջություն», 3-րդ կուրս), Տիգրան Սերյոժայի Գասպարյանը («Քարտեզագրություն և կադաստրային գործ», 4-րդ կուրս), Լիլիթ Շաքարի Դավթյանը («Տարրական մանկավարժություն և մեթոդիկա», 4-րդ կուրս), որոնցից ընտրվեց ամենաբարձր առաջադիմությունն ունեցող Տիգրան Սերյոժայի Գասպարյանը (կիսամյակային ՄՈԳ-ը՝ 20, ընթացիկ ՄՈԳ-ը՝ 19.48):

Որոշվեց.

1. Հաստատել ՀՀ ՊՆ կողմից հատկացվող «Վազգեն Սարգսյան» և «Մոնթե Մելքոնյան» անվանական կրթաթոշակների հավակնորդների թեկնածությունները:
2. Անվանական կրթաթոշակների ներկայացված մյուս ուսանողների ցանկը ներկայացնել ԵՊՀ ԻՄ-ի գիտական խորհրդի հաստատմանը:

Ընթացիկ հարցերը 3-ն էին, որոնցից 1-ինի վերաբերյալ զեկուցեց ԵՊՀ ԻՄ-ի կրթական բարեփոխումների և դասախոսների վերապատրաստման բաժնի վարիչ Ն.Գրիգորյանը: Նա մասնավորապես նշեց, որ ըստ հրամանի ձևավորված աշխատանքային խմբերը փետրվարի 1-ից սկսել են 2021թ. կրթական ծրագրերի վերանայման աշխատանքները: ԵՊՀ ԻՄ-ի 2020թ. կրթական ծրագրերը տեղադրված են պաշտոնական կայքէջում: Որոշ խնդիրներ են առկա Կիրառական արվեստի ֆակուլտետում, սակայն մինչև փետրվարի 20-ը դրանք կշտկվեն: Հեռակա ուսուցման մագիստրատուրայի «Դպրոցական մանկավարժություն և մեթոդիկա» կրթական ծրագրի մշակումը դեռևս ընթացքի մեջ է:

Որոշվեց.

1. Հանձնարարել ԿԲԴՎ, ՄԿՈԱ բաժիններին և ֆակուլտետների դեկաններին հետևել կրթական ծրագրերի վերանայման ժամանակացույցների կատարմանը:
2. Հանձնարարել Հեռակա ուսուցման մագիստրատուրայի «Դպրոցական մանկավարժություն և մեթոդիկա» կրթական ծրագրի համակարգող Ա.Մարգարյանին ձևավորել աշխատանքային խումբ՝ մագիստրատուրայի կրթական ծրագիրը վերանայելու համար:

Ընթացիկ 2-րդ հարցի վերաբերյալ զեկուցեց Ուսումնամեթոդական վարչության պետ Ա.Դավթյանը: Նա մասնավորապես նշեց, որ ԵՊՀ ԻՄ-ի հեռակա ուսուցման համակարգի 6 ուսանող դիմել է 2020-2021 ուստարվա 2-րդ կիսամյակում, իսկ 1 ուսանող՝ 2021-2022 ուտարվա 1-ին կիսամյակում համապատասխան մասնագիտություններով իրենց ուսանողական իրավունքները վերականգնելու համար: ՈՒՄՎ կողմից ստուգվել է ուսանողների ներկայացրած փաստաթղթերի համապատասխանությունը «Հայաստանի Հանրապետության բարձրագույն ուսումնական հաստատությունների ուսանողների հեռացման (ազատման) և վերականգնման կարգ»-ին (17.12.2018, N1676 -Ն), և դրանք բավարարում են վերոնշյալ կարգի III մասի կետերին: Ա.Դավթյանը հավելեց, որ հեռակա ուսուցման համակարգի «Ինֆորմատիկա և կիրառական մաթեմատիկա» մասնագիտության 2-րդ կուրսի ուսանող Տիգրան Աշոտի Բադալյանը չի հանձնել ուսումնական պլանով առաջացած առարկայական տարբերությունները և չի վճարել ուսման վճարը:

Որոշվեց.

1. «ՀՀ բարձրագույն ուսումնական հաստատությունների ուսանողների հեռացման (ազատման) և վերականգնման կարգ»-ի III մասի կետերին համապատասխան՝ վերականգնել ԵՊՀ ԻՄ-ի հեռակա ուսուցման համակարգի ներկայացված ուսանողների ուսանողական իրավունքները 2020-2021 ուստարվա 2-րդ և 2021-2022 ուստավա 1-ին կիսամյակներում:
2. «ՀՀ բարձրագույն ուսումնական հաստատությունների ուսանողների հեռացման (ազատման) և վերականգնման կարգ»-ի 17 կետի համաձայն՝ Տիգրան Աշոտի Բադալյանին հեռացնել մասնաճյուղից:

Ընթացիկ 3-րդ հարցի վերաբերյալ զեկուցեց Մասնագիտական կրթության որակի ապահովման բաժնի վարիչ Մ.Ճաղարյանը: Նա նշեց, որ ԵՊՀ ԻՄ-ի ստորաբաժանումներին է ներկայացվել մասնաճյուղի ռազմավարական ծրագրի այն խնդիրների ցանկը, որոնք տնօրենի հետ քննարկումների արդյունքում որոշվել է դնել ստորաբաժանումների 2021թ․ աշխատանքային պլանների հիմքում։ Ըստ Մ.Ճաղարյանի՝ աշխատանքային պլանները գրեթե ամբողջությամբ պատրաստ են:

Ա.Մակարյանը հանձնարարեց, որ ՄԿՈԱ բաժինը հետևողական լինի աշխատանքային պլանների վերջնական կազմման հարցում:

Որոշվեց հանձնարարել ստորաբաժանումների վարիչներին, որ մինչև 2021թ. փետրվարի 20-ը աշխատանքային պլանները ներկայացնեն տնօրենի հաստատմանը:

2021թ. հունվարի 21-ին տեղի ունեցավ ԵՊՀ ԻՄ-ի տնօրենության հերթական նիստը, որը նախագահում էր Ա.Մակարյանը:

Նիստում քննարկվեցին օրակարգով նախատեսված հետևյալ հարցերը.

1. 2020-2021 ուստարվա 1-ին կիսամյակում իրականացրած պրակտիկաների վերաբերյալ հաշվետվություն:
2. 2020-2021 ուստարվա 1-ին կիսամյակի առկա ուսուցման համակարգում հետազոտական աշխատանքների արդյունքների վերլուծություն:
3. Երկրորդ կիսամյակի նախապատրաստական աշխատանքների քննարկում:
4. ԵՊՀ ԻՄ-ի՝ 2021-2022 ուստարվա ուսման վճարների չափերի քննարկում:
5. Ընթացիկ հարցեր:

Մինչհամալսարանական կրթության և պրակտիկայի կազմակերպման բաժնի վարիչ Լ.Բեգինյանը առաջին հարցի վերաբերյալ նշեց, որ 2020-2021 ուստարվա աշխատանքային ուսումնական պլանների համաձայն՝ մասնաճյուղում առաջին կիսամյակի ընթացքում պետք է իրականացվեր 14 պրակտիկա: Մինչ այժմ իրականացվել է 12 պրակտիկա. երկու պրակտիկա դեռևս ընթացքի մեջ է: ՀՀ-ում հայտարարված արտակարգ, ինչպես նաև ռազմական դրությամբ պայմանավորված՝ պրակտիկաններն իրականացվել են առցանց եղանակով՝ ամբիոններում նախապես հաստատված ծրագրերին համապատասխան: 2020թ․նոյեմբերի 20-ի տնօրենության նիստի որոշման հիման վրա առաջին անգամ ընդհանուր պահանջ է դրվել առցանց պրակտիկաները տեսաձայնագրել հետագա մասնագիտական քննարկումների և պրակտիկայի բարելավման նպատակով։ Առկա ուսուցման համակարգում ուսանողների մասնակցությունը կազմել է 100%, իսկ հեռակա ուսուցման համակարգում՝ 82%:

Որոշվեց ընդունել ՄԿՊԿ բաժնի հետևյալ առաջարկությունները.

1. Մասնագիտական ամբիոններում պրակտիկաների ծրագրերը քննարկել և հաստատել կրթական ծրագրով սահմանված պրակտիկայի վերջնարդյունքներին համապատասխանելու տեսանկյունից,
2. պրակտիկաների ղեկավար նշանակել ոլորտում մասնագիտական հարուստ փորձ ունեցող աշխատակիցների/մանկավարժների,
3. պրակտիկաների ծրագրով հաստատված վերջնարդյունքների ձևավորման վերահսկողությունն ապահովել ամբիոնների կողմից,
4. ուսումնական պրակտիկաների ծրագրային խնդիրների կատարման (բացառությամբ Կիրառական արվեստի ֆակուլտետի) առցանց կազմակերպման ձևը համարել դրական և այդ փորձը կիրառել նախքան երթուղային եղանակով պրակտիկաների կազմակերպումը,
5. մանկավարժական պրակտիկաների ընթացքում ուշադրություն դարձնել ոչ միայն դասավանդման ժամանակակից մեթոդներին, այլև առցանց կրթական գործիքակազմին,
6. նախքան արտադրական պրակտիկաների սկսելը (Բնական գիտությունների ֆակուլտետ) ունենալ տեղեկատվություն ուսանողների տեխնիկական միջոցների ապահովվածության վերաբերյալ,
7. հանձնարարել ՄԿՈԱ բաժնին ուսանողների շրջանում անցկացնել պրակտիկայի կազմակերպումից և անցկացումից բավարարվածության գնահատման վերաբերյալ հարցում:

Երկրորդ հարցի վերաբերյալ Կրթական բարեփոխումների և դասախոսների վերապատրաստման բաժնի վարիչ Ն.Գրիգորյանը նշեց, որ 2020-2021 ուստարվա առաջին կիսամյակի առկա ուսուցման համակարգում հետազոտական բաղադրիչ պարունակող դասընթացների թիվը եղել է 24, 12-ը՝ եզրափակիչ գնահատումով, 10-ը՝ առանց եզրափակիչ գնահատման և 2-ը՝ առանց ընթացիկ գնահատման:

Ն.Գրիգորյանը նշեց, որ առաջին կիսամյակում ամիսը մեկ պարբերականությամբ ԵՊՀ ԻՄ-ի տնօրենը բաժնի հետ համատեղ կազմակերպել է հանդիպում-քննարկումներ հետազոտական բաղադրիչ պարունակող դասընթացները վարող դասախոսների հետ: Հանդիպումների ժամանակ քննարկվել են հետազոտական աշխատանքների թեմաների ընտրության, կատարման, գնահատման հետ կապված տարաբնույթ հարցեր: Մասնաճյուղի առկա ուսուցման համակարգում ընթացիկ քննություններով գնահատվող հետազոտական աշխատանքների ընդհանուր թիվը 127 է, որից 15 աշխատանք չի ներկայացվել, 0 միավոր է գնահատվել 2 աշխատանք, 1 միավոր՝ 2 աշխատանք, 2 միավոր՝ 12 աշխատանք, 3 միավոր՝ 19 աշխատանք, 4 միավոր՝ 26 աշխատանք, 5 միավոր՝ 51 աշխատանք:

Ընթացիկ ստուգումներով գնահատվող հետազոտական աշխատանքների թիվը 111 է, որից 2 աշխատանք չի ներկայացվել, 2 միավոր գնահատվել է 1 աշխատանք, 4 միավոր՝ 5 աշխատանք, 5 միավոր 13 աշխատանք, 6 միավոր՝ 13 աշխատանք, 7 միավոր՝ 8 աշխատանք, 8 միավոր՝ 15 աշխատանք, 9 միավոր 14 աշխատանք, 10 միավոր՝ 40 աշխատանք:

Որոշվեց.

1. հետազոտական աշխատանքների արդյունքների վերլուծությունն ընդունել ի գիտություն,
2. հանձնարարել դեկաններին ֆակուլտետային գիտական խորհուրդներում կազմակերպել հետազոտական աշխատանքների կատարման ամբիոնային վերլուծությունների քննարկումներ:

Օրակարգի երրորդ հարցը ներկայացրեց ՈՒՄՎ պետ Ա.Դավթյանը: Նա նշեց, որ ընթացքի մեջ են բակալավրի կրթական ծրագրով առկա և հեռակա ուսուցման ուսումնական գործընթացի երկրորդ կիսամյակի ժամանակացույցների մշակման աշխատանքները, որոնք մինչև հունվարի վերջը կներկայացվեն տնօրենի հաստատմանը: Երկրորդ կիսամյակի առկա ուսուցմամբ դասապրոցեսը նախատեսվում է սկսել ս.թ. փետրվարի 9-ից, իսկ հեռակա ուսուցմանը՝ մարտի 9-ից:

Որոշվեց հանձնարարել ֆակուլտետների դեկաններին մինչև 2021թ. հունվարի 30-ը ՈՒՄՎ ներկայացնել ֆակուլտետների դասացուցակները:

Չորրորդ հարցի վերաբերյալ Ա.Մակարյանը նշեց, որ երկար տարիներ անփոփոխ մնալուց հետո, հաշվի առնելով, որ մասնաճյուղում վարձավճարները ամենացածրերից են հանրապետությունում, անցյալ տարի գիտխորհրդի որոշմամբ վերանայվել են 5 մասնագիտության վարձավճարները: Քննարկումների ժամանակ գիտխորհրդում առաջարկ էր հնչել տարեկան փոքր բարձրացումների միջոցով վարձավճարները համապատասխանեցնել մասնաճյուղի ծախսերին, տարադրամի փոխարժեքի փոփոխություններին և այլ գործոնների: Բացի այդ՝ կառավարությունը պլանավորում է ավելացված արժեքի հարկով լրացուցիչ 20%-ով հարկել ուսումնական հաստատությունները:

Որոշվեց 2021-2022 ուստարվա ԵՊՀ ԻՄ-ի ուսման վարձաչափերի փոփոխման հարցը ներկայացնել ԵՊՀ ԻՄ-ի գիտական խորհրդի քննարկմանը:

Առաջին ընթացիկ հարցը վերաբերում էր ԵՊՀ ԻՄ-ի շրջանավարտ Ժիրայր Արմենի Մատինյանին, ով պատերազմական իրավիճակում կորցրել է փաստաթղթերը և դիմել է մասնաճյուղ՝ դիպլոմի կրկնօրինակը ստանալու համար:

Որոշվեց բավարարել շրջանավարտի դիմումը:

Երկրորդ ընթացիկ հարցը վերաբերում էր ֆակուլտետների գիտական խորհուրդների երկրորդ կիսամյակի աշխատանքային պլանների քննարկմանը:

Ա.Մակարյանը նշեց, որ ներկայացված պլանները հիմնականում վերաբերում եմ կազմակերպական աշխատանքներին և ստացվում է, որ ուշադրությունից դուրս են մնում ամբիոններում բովանդակային գործունեության քննարկումները և վերլուծությունները, կրթության որակի հետ կապված հարցերը:

Որոշվեց հանձնարարել գիտական քարտուղարին, ՈՒՄՎ-ին և ՄԿՈԱ բաժնին մինչև հունվարի 25-ը պատրաստել և տնօրենին ներկայացնել այն գործողությունները, որոնք պետք է պարտադիր ներառվեն ֆակուլտետների աշխատանքային պլաններում, դրանց հիման վրա վերանայել ֆակուլտետների պլանները և ներկայացնել տնօրենի հաստատմանը: